Hosanna ngadto sa Labing Halangdon nga Dios

Ni Elder Ronald A. Rasband

Sa Korum sa Napulog Duha ka Apostoles

Ang madaugon nga pagsulod ni Jesukristo ngadto sa Jerusalem ug ang mga panghitabo sa semana nga misunod nagpakita og ehemplo sa doktrina nga atong magamit sa atong mga kinabuhi karon.

Karon, sama sa gikasulti na, kita miduyog sa mga Kristiyano sa tibuok kalibotan sa pagpasidungog kang Jesukristo niining Dominggo sa Lukay. Dul-an sa 2,000 na ka tuig ang milabay, ang Dominggo sa Lukay nagtimaan sa pagsugod sa kataposang semana sa mortal nga pagpangalagad ni Jesukristo. Mao kadto ang labing importanteng semana sa tawhanong kasaysayan.

Ang unsay nasugdan sa madasigon nga pagpahibalo nga si Jesus isip ang gisaad nga Mesiyas sa Iyang madaugon nga pagsulod ngadto sa Jerusalem natapos sa Iyang Pagpalansang ug Pagkabanhaw.¹ Pinaagi sa balaan nga laraw, ang Iyang maulaon nga pagsakripisyo mitapos sa Iyang mortal nga pagpangalagad, nakapahimo nga posible alang kanato nga mabuhi uban sa atong Langitnong Amahan sa kahangtoran.

Ang mga kasulatan nagsulti kanato nga ang semana gisugdan sa mga panon sa katawhan nga nanagbarog sa mga ganghaan sa siyudad aron makita si “ang profeta nga si Jesus nga taga-Nazaret sa Galilea.”² Sila “nanguha [og] mga palwa sa palmera ug nanggula aron sa pagsugat kaniya ug naninggit: Dalaygon ang Dios! Bulahan siya nga mianhi sa ngalan sa Ginoo.”³

Kanang biblikanhong asoy nga dugay na kaayo nakapahinumdom kanako nga naa sa usa ka tahas sa Simbahan didto sa Takoradi, Ghana. Maayo gyod, nga didto ko atol sa Dominggo sa Lukay.

Miadto ko sa pagbahin sa Takoradi Ghana Stake aron sa paghimo sa Mpintsin Ghana Stake. Karon, aduna nay kapin sa 100,000 ka mga miyembro sa Simbahan sa Ghana.⁴ (Atong gihangop ang Ga Mantse, Ang Kamahalan nga si Haring Nii Tackie Teiko Tsuru II sa Accra, Ghana, kinsa uban kanato karon.) Sa pakighimamat niining mga Santos, ako mibati sa ilang lawom nga gugma ug debosyon ngadto sa Ginoo. Akong gipadayag ang akong dakong gugma alang kanila, ug nga ang Presidente sa Simbahan nahigugma kanila. Ako mikutlo sa mga pulong sa Manluluwas nga narekord ni Juan: “Paghigugmaay kamo. Ingon nga ako nahigugma kaninyo.”⁵ Sila miisip niini nga “Komperensiya bahin sa gugma.”⁶

Si Elder Rasband nakiglamano didto sa Takoradi, Ghana

Sa akong pagtan-aw niadtong mga kaigsoonan nga naglaray ug sa ilang mga pamilya diha sa chapel, akong makita diha sa ilang mga panagway ang kasanag sa ilang mga pagpamatuod ug hugot nga pagtuo kang Jesukristo. Akong nabati ang ilang tinguha nga mahimong kabahin sa Iyang Simbahan sa tibuok kalibotan. Ug sa dihang ang choir mikanta, sila mikanta sama sa mga anghel.

Si Elder Rasband uban sa mga miyembro didto sa Gana

Sama sa Dominggo sa Lukay sa karaan, kini ang mga disipulo ni Jesukristo nagkapundok aron sa paghatag og pasidungog ngadto Kaniya sama niadtong anaa sa mga ganghaan sa Jerusalem kinsa, nanaggunit og mga palmera, misinggit og, “Hosanna … : Bulahan siya nga mianhi sa ngalan sa Ginoo.”⁷

Pagwarawara sa mga palmera didto sa Ghana

Bisan ang mga parokyano diha sa duol nga simbahan mitahod sa Dominggo sa Lukay. Samtang namulong ko gikan sa pulpito, akong nabatyagan nga sa gawas sa bintana sila malipayong nanglakaw sa kadalanan nga nagwara-wara sa mga palmera diha sa ilang mga kamot, sama kaayo nianang anaa niining hulagway. Usa kadto ka talan-awon nga dili gayod nako hikalimtan—tanan kanamo nianang adlawa nagsimba sa Hari sa mga hari.

Si Presidente Russell M. Nelson mipahimangno kanato sa paghimo sa Dominggo sa Lukay nga “tinud-anay nga balaan pinaagi sa paghinumdom, dili lamang sa mga lukay nga giwara-wara sa pagpasidungog sa pagsulod ni Jesus ngadto sa Jerusalem, apan pinaagi sa paghinumdom sa mga palad sa Iyang mga kamot.” Dayon si Presidente Nelson mikutlo ngadto kang Isaias, kinsa namulong sa Manluluwas nga nagsaad, “Ako dili gayod malimot kanimo,” uban niini nga mga pulong, “Tan-awa, gikulit ko ang imong ngalan diha sa mga palad sa akong mga kamot.”⁸

Ang Ginoo unang nasayod nga ang mortalidad lisod. Ang Iyang mga samad nagpahinumdom kanato nga Siya “Mikunsad ubos … [sa] tanan”⁹ nga Siya unta makatabang kanato kon kita mag-antos ug mahimong atong ehemplo sa “[pag]padayon sa imong pamaagi,”¹⁰ ang Iyang pamaagi, nga “ang Dios mouban [kanato] hangtod sa kahangtoran.”¹¹

Ang Dominggo sa Lukay dili lang usa ka panghitabo, laing pahina sa kasaysayan nga may petsa, oras, ug lugar. Ang madaugon nga pagsulod ni Jesukristo ngadto sa Jerusalem ug ang mga panghitabo sa semana nga misunod nagpakita og ehemplo sa doktrina nga atong magamit sa atong mga kinabuhi karon.

Atong tan-awon ang pipila sa mahangtoron nga doktrina nga namugna pinaagi sa Iyang pagpangalagad nga gitapos didto sa Jerusalem.

Una, panagna. Pananglitan, ang propeta sa Daang Tugon nga si Zacarias nanagna kabahin sa madaugon nga pagsulod ni Jesukristo ngadto sa Jerusalem, gani naghulagway nga Siya mosakay sa usa ka asno.¹² Si Jesus nanagna sa Iyang Pagkabanhaw samtang Siya nangandam sa pagsulod sa siyudad, nag-ingon:

“Tan-awa, nagatungas kita padulong sa Jerusalem; ug ang Anak sa Tawo igatugyan ngadto sa mga sacerdote nga punoan ug sa mga escriba, ug ilang pagahukman siya sa kamatayon,

“Ug igatugyan ngadto sa mga Gentil aron pagabugalbugalan, ug pagahampakon, ug ilansang sa krus, apan sa ikatulo ka adlaw pagabanhawon siya.”¹³

Ikaduha, ang pakig-uban sa Espiritu Santo. Si Joseph Smith nagtudlo, “Walay makaingon nga si Jesus Ginoo, kon dili pinaagi sa Espiritu Santo.”¹⁴ Ang Manluluwas misaad sa Iyang mga disipulo¹⁵ diha sa Kataposan nga Panihapon¹⁶ didto sa taas nga lawak,¹⁷ “Dili ko kamo biyaan nga daw mga ilong tuwapos.”¹⁸ Sila dili mag-inusara nga magpadayon sa pagdala sa mga kamatuoran sa ebanghelyo apan makabaton og hingpit nga gasa sa Espiritu Santo sa paggiya kanila. “Kaninyo ibilin ko ang kalinaw, kaninyo ihatag ko ang akong kalinaw,” Siya misaad nga; “dili sama sa hinatagan sa kalibotan.”¹⁹ Uban sa gasa sa Espiritu Santo kita adunay sama nga kasiguroan—nga kita “sa kanunay makabaton sa iyang Espiritu uban [kanato]”²⁰ ug “pinaagi sa gahom sa Espiritu Santo [kita] mahimo nga masayod sa kamatuoran sa tanan nga mga butang.”²¹

Ikatulo, ang pagkadisipulo. Ang tinuod nga pagkadisipulo mao ang walay kapakyasan nga pasalig, pagkamasulundon sa mahangtoron nga mga balaod, ug sa gugma sa Dios, una ug labaw sa tanan. Walay pagduhaduha. Ang panon sa katawhan kinsa mihatag og pasidungog gamit ang mga palmera nanagdayeg Kaniya isip ang Mesiyas. Mao kadto ang eksakto kon si kinsa Siya. Sila napaduol ngadto Kaniya, sa Iyang mga milagro, ug sa Iyang mga pagtulon-an. Apan ang pagdayeg alang sa kadaghanan wala molungtad. Ang pipila sa nahauna nga nanasinggit og, “Hosanna,”²² sa wala madugay mibali ug misinggit og, “Ilansang siya.”²³

Ikaupat, ang Pag-ula ni Jesukristo.²⁴ Sa iyang kataposan nga mga adlaw, pagkahuman sa Dominggo sa Lukay, Iyang gituman ang iyang dalaygon nga Pag-ula, gikan sa paghingutas sa Getsemani hangtod ngadto sa pagbugalbugal sa Iyang paghukom, sa Iyang pagtortyur diha sa krus, ug sa Iyang paglubong diha sa hinulaman nga lubnganan. Apan wala kadto mohunong didto. Uban sa kaharianon sa Iyang tawag isip ang Manunubos sa tanan sa mga anak sa Langitnong Amahan, tulo ka adlaw ang milabay Siya migawas gikan niana nga lubnganan, nabanhaw²⁵ sumala sa Iyang gipanagna.

Nagpadayon ba kita sa pagkamapasalamaton alang sa walay ikatandi nga Pag-ula ni Jesukristo? Atoa bang nabati ang makapaputli nga gahom niini, karon mismo? Mao kana nganong si Jesukristo, ang Tagsulat ug ang Tigtapos sa Kaluwasan, miadto sa Jerusalem, aron sa pagluwas kanatong tanan. Kini ba nga mga pulong ni Alma importante: “Kon kamo nakasinati og usa ka kausaban sa kasingkasing, ug kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?”²⁶ Ako tinuod nga moingon, ang choir didto sa Takoradi nianang Dominggo sa Lukay nanganta “sa awit sa matubsanon nga gugma.”

Nianang makalilisang nga kataposang semana sa Iyang mortal nga pagpangalagad, si Jesukristo mihatag sa sambingay sa napulo ka dalagang berhin.²⁷ Siya nagtudlo kabahin sa Iyang pagbalik ngadto niadtong andam sa pagdawat Kaniya, dili uban sa mga palmera diha sa ilang mga kamot apan uban sa kahayag sa ebanghelyo diha kanila. Siya migamit og imahe sa mga lampara nga gidagkotan ug nagsiga, nga may sobra nga lana aron sa pagpasiga, isip sa usa ka paghulagway sa kaandam sa pagsunod sa Iyang mga pamaagi, paghangop sa Iyang mga kamatuoran, ug sa pagpakigbahin sa Iyang kahayag.

Kahibalo mo sa istorya. Ang napulo ka dalagang birhen nagrepresentar sa mga miyembro sa Simbahan, ug ang pamanhonon nagrepresentar ni Jesukristo.

Ang napulo ka dalagang berhin mikuha sa ilang mga lampara ug “miadto sa pagsugat sa pamanhonon.”²⁸ Ang lima nga maalamon, miandam og lana sa ilang mga lamparahan ug nagbilin og tagana, ug ang lima mga boangboang, ang mga lamparahan pawong nga walay lana nga gitagana. Sa dihang miabot ang tawag, “Tan-awa, ang pamanhonon; panggula kamo ug sugata ninyo siya,”²⁹ ang lima nga “maalamon ug [mi]dawat sa kamatuoran, ug [mi]dawat sa Balaan nga Espiritu Santo alang sa ilang paggiya”³⁰ andam na alang sa “ilang hari ug [sa] ilang magbabalaod,”³¹ nga “ang iyang himaya [ma]anaa diha kanila.”³² Ang laing lima nagkaboang sa pagpaningkamot sa pagpangita og lana. Apan ulahi na kaayo. Ang prosisyon mipadayon nga wala sila. Sa dihang sila nanuktok ug mihangyo aron makasulod, ang Ginoo mitubag, “wala ako makaila kaninyo.”³³

Unsa kaha ang atong bation kon Siya moingon ngari kanato, “wala ako makaila kaninyo!”

Kita, sama sa napulo ka mga dalagang berhin, adunay mga lampara; apan kita aduna bay lana? Ako nabalaka nga ang uban gamay ra gyod ang pagkaespirituhanon, nagkapuliki og maayo sa kalibotanong mga pagpamugos aron tukma nga maandam. Ang lana moabot gumikan sa pagtuo ug pagbuhat subay sa panagna ug sa mga pulong sa buhi nga mga propeta, ilabi na ni Presidente Nelson, sa iyang mga magtatambag, ug sa Napulog Duha ka Apostoles. Ang lana mopuno sa atong mga kalag kon kita makadungog ug mobati sa Espiritu Santo ug mobuhat nianang balaan nga paggiya. Ang lana mabubo ngadto sa atong mga kasingkasing kon ang atong mga pagpili magpakita nga kita nahigugma sa Ginoo ug kita mohigugma sa unsay Iyang higugmaon. Ang lana moabot gikan sa paghinulsol ug pagtinguha sa pagkaayo sa Pag-ula ni Jesukristo.

Kon ang pipila kaninyo nagtinguha sa pagpuno sa unsay gitawag sa uban og “listahan sa buhatunon,” mao na kini: Pun-a ang inyong listahan sa buhatunon sa lana sa matang sa buhi nga tubig ni Jesukristo,³⁴ nga mao ang representasyon sa Iyang kinabuhi ug mga pagtulon-an. Sa pagkuha og kalainan, ang pagtsek sa mga buhatonon nga dili espirituhanon nga mahinungdanon dili gayod makapahimo sa inyong kalag nga mobati nga nakompleto o natagbaw; kondili ang pagsunod sa doktrina nga gitudlo ni Jesukristo mao ang makapatagbaw. Ako naghisgot kaganina og mga ehemplo: hangopa ang panagna ug ang propetikanhon nga mga pagtulon-an, buhata ang mga pag-aghat sa Espiritu Santo, mamahimong usa ka tinuod nga disipulo, ug tinguhaa ang makaayo nga gahom sa Pag-ula sa atong Ginoo. Kana nga listahan sa buhatonon modala kaninyo sa dapit nga gusto ninyong adtoan—balik sa inyong Amahan sa Langit.

Kadto nga Dominggo sa Lukay sa Takoradi mao ang espesyal kaayo nga kasinatian alang nako tungod kay ako miambit niini uban sa matinud-anon nga kongregasyon sa mga kaigsoonan. Maong anaa na kini sa mga konteninte ug mga isla sa tibuok kalibotan. Ang akong kasingkasing ug kalag, sama sa inyo, gustong mosinggit og, “Hosanna ngadto sa Labing Halangdon nga Dios.”³⁵

Bisan og kita wala magbarog diha sa mga ganghaan sa Jerusalem karon dala ang mga palmera diha sa atong mga kamot, ang panahon moabot kon, sumala sa gipanagna diha sa Gipadayag, “[usa ka] dakong panon sa katawhan nga walay makaihap, gikan sa nagkalainlaing nasod, banay, katawhan ug pinulongan ug nagbarog sila sa atubangan sa trono ug sa Nating Karnero, nagbisti silag puti ug nagbitbit ug mga palwa [sa palmera].”³⁶

Ibilin ko kaninyo ang akong panalangin isip usa ka Apostol ni Jesukristo nga kamo magmakugihon sa pagpaningkamot nga magpakabuhi sa pagkamatarong ug malakip niadtong kinsa, adunay mga palmera sa ilang mga kamot, modayeg sa Anak sa Dios, ang Halangdon nga Manunubos kanatong tanan. Sa ngalan ni Jesukristo, amen.