Ang Dili Hingpit nga Ani
Ang Manluluwas nagbarog nga andam nga modawat sa atong mapainubsanon nga mga halad ug mohingpit niini pinaagi sa Iyang grasya. Uban ni Kristo, walay dili hingpit nga ani.
Isip usa ka batang lalaki, nakat-onan nakong mahalon ang dakong mga kausaban sa panahon sa tuig didto sa habagatang kasadpang Montana, diin ako nagdako. Ang akong paborito nga panahon mao ang tinglarag—ang panahon sa ting-ani. Ang among pamilya naglaom ug nag-ampo nga ang among daghang bulan sa pagpaningkamot magantihan og buhong nga ani. Ang akong mga ginikanan nabalaka mahitungod sa panahon, sa kahimsog sa mga hayop ug mga pananom, ug daghan sa ubang mga butang nga dili nila makontrolar.
Samtang nagdako ko, nahimo kong mas nahibalo sa kadinalian nga nalambigit. Ang among panginabuhi nagdepende sa ani. Gitudloan ko sa akong amahan mahitungod sa ekipo nga among gigamit sa pag-ani sa lugas. Nagtan-aw ko samtang padaganon niya ang makinarya didto sa uma, moputol og gamay nga tudling sa lugas, ug dayon mosusi sa luyo sa combine aron sa pagseguro nga labing daghan nga posible nga lugas ang masulod sa tipiganan nga tangke ug wala malabay uban sa mga uhot. Gisubli niya kini nga proseso sa pipila ka higayon, mopahiuyon sa makina sa matag higayon. Modagan ko diha sa kilid ug nagsipat lang sa paghagpat sa mga uhot uban niya ug nagpakaaron-ingnon nga nahibalo ko sa unsay akong gibuhat.
Human siya natagbaw sa mga pagpahiangay ngadto sa makina, nakakita ko og pipila ka grano sa lugas diha sa mga uhot ug gipakita kini ngadto kaniya nga may masawayon nga dagway. Dili ko makalimot sa unsay gisulti sa akong amahan kanako: “Maayo na kana ug ang labing maayo nga mabuhat niini nga makina.” Wala gayod matagbaw sa iyang pagpasabot, namalandong ko sa mga pagkadili hingpit niini nga ani.
Sa wala madugay, sa dihang mibugnaw na ang panahon sa kagabhion, nagtan-aw ko sa liboan ka milalin nga mga swan, gangsa, ug mga itik nga mitugpa didto sa mga uma aron sa pagpakaon sa ilang kaugalingon alang sa ilang taas nga panaw sa habagatan. Gikaon nila ang salin nga lugas gikan sa among dili hingpit nga ani. Gihingpit kini sa Dios. Ug walay grano nga nausik.
Kasagaran usa kini ka tintasyon sa atong kalibotan ug gani sulod sa kultura sa Simbahan nga malinga mahitungod sa pagkahingpit. Ang social media, mga gidahom nga dili haom sa reyalidad, ug kasagaran ang atong kaugalingon nga pagpanaway sa kaugalingon magmugma og mga pagbati sa kakulang—nga kita dili igo ang kamaayo ug dili gayod mosarang. Ang uban masayop gani sa pagsabot sa pagdapit sa Manluluwas nga “magmahingpit kamo.”1
Hinumdomi nga ang pagkamahingpiton dili sama sa pagkahimong hingpit diha ni Kristo.2 Ang pagkamahingpiton nagkinahanglan og imposible, gipahamtang sa kaugalingon nga sumbanan nga nagtandi kanato ngadto sa uban. Kini makamugna og pagbati nga sad-an ug grabe nga kabalaka ug makahimo kanato nga gustong mopalayo ug mobulag sa atong kaugalingon.
Ang pagkahimong hingpit diha ni Kristo lahi ra kaayo. Kini mao ang proseso—mahigugmaon nga gigiyahan sa Espiritu Santo—sa pagkahimong mas sama sa Manluluwas. Ang mga sumbanan gitakda pinaagi sa usa ka mabination ug nasayod sa tanan nga Langitnong Amahan ug klaro nga gipasabot diha sa mga pakigsaad nga gidapit kita sa pagdawat. Kini mohupay kanato sa mga palas-anon sa pagbati nga sad-an ug kakulang, kanunay nga mohatag og gibug-aton kon kinsa kita sa panan-aw sa Dios. Samtang kini nga proseso mobayaw kanato ug modasig kanato nga mahimong mas maayo, kita gisukod pinaagi sa atong personal nga debosyon ngadto sa Dios nga atong ipakita diha sa atong mga paningkamot nga mosunod Kaniya pinaagi sa hugot nga pagtuo. Samtang dawaton nato ang pagdapit sa Manluluwas nga moduol ngadto Kaniya, kita sa dili madugay makaamgo nga ang atong labing maayo paigo na ug nga ang grasya sa usa ka mahigugmaon nga Manluluwas mao ang mopuno sa kakulang sa mga paagi nga dili nato mahanduraw.
Makita nato nga naggamit kini nga baroganan sa dihang ang Manluluwas mipakaon sa lima ka libo.
“Unya mitan-aw si Jesus sa palibot niya ug sa pagkakita niya sa daghang mga tawo nga nagpaingon kaniya, miingon siya kang Felipe, Asa man kita makapalit ug igong pagkaon alang niining mga tawo? …
“Si Felipe mitubag, Bisan pag mopalit kitag pan nga bilig 200 ka denario dili gihapon kini paigo nga ipakaon niining mga tawhana.
“Usa sa iyang mga tinun-an nga si Andres, igsoon ni Simon Pedro, miingon kang Jesus,
“Aniay batang lalaki dinhi nga may lima ka pan nga sebada ug duha ka isda. Apan mag-unsa man kini alang niining daghang tawo?”3
Nakahunahuna ba gayod kamo kon unsa kaha ang nabati sa Manluluwas bahin niining batang lalaki, kinsa uban ang hugot nga pagtuo sa usa ka bata mihalad sa unsay iyang nahibaloan nga kulang kaayo alang sa kadako sa buluhaton?
“Unya gikuha ni Jesus ang pan, nagpasalamat sa Dios ug giapod-apod niya ang pan ngadto sa mga tawo. Mao usab kini ang iyang gibuhat sa isda ug silang tanan nakakaon kutob sa ilang gusto.
“Sa nangabusog na silang tanan, miingon siya sa iyang mga tinun-an, Hiposa ninyo ang mga salin aron walay mausik.”4
Gihingpit sa Manluluwas ang mapainubsanon nga halad.
Wala madugay human niini nga kasinatian, gipadala og una ni Jesus ang Iyang mga disipulo ngadto sa usa ka sakayan. Sa wala madugay nakaplagan nila ang ilang kaugalingon didto sa usa ka unoson nga dagat diha sa tunga-tunga sa kagabhion. Nahadlok sila sa dihang nakakita sila og porma nga multo nga naglakaw paingon kanila diha sa tubig.
“Si Jesus miingon kanila, Ayaw kamo kahadlok! Ako kini!
“Unya si Pedro miingon, Ginoo, kon ikaw kana, palakta ako sa tubig nganha kanimo.
“Dali ngari, mitubag si Jesus. Busa mikawas si Pedro sa sakayan, ug milakaw sa tubig ngadto kang Jesus.
“Apan sa pagkamatikod niya sa kusog nga hangin, nahadlok siya ug misugod pagkaunlod. Busa misinggit siya, Ginoo, luwasa ako!
“Dihadiha gikuptan siya ni Jesus ug gibira ug miingon si Jesus kaniya, Pagkagamay sa imong pagtuo! Nganong nagduhaduha ka man?”5
Mga kaigsoonan, mahimong dili kana ang kataposan sa panag-istoryahanay. Nagtuo ako nga samtang si Pedro ug ang Manluluwas milakaw og balik ngadto sa barko nga nagkaw-itay ang mga bukton, si Pedro basa kaayo ug tingali mibati nga nasayop gayod, ang Manluluwas tingali misulti og sama niini: “O, Pedro, ayaw kahadlok ug ayaw kabalaka. Kon imong matan-aw ang imong kaugalingon sama sa Akong pagtan-aw kanimo, ang imong pagduhaduha mahanaw ug ang imong hugot nga pagtuo molambo. Gihigugma Ko ikaw, minahal nga Pedro, migawas ka sa sakayan. Ang imong halad madawat, ug bisan napakyas ka, kanunay Akong maanaa aron sa pagtabang kanimo sa pagbuntog sa bisan unsang kalisod, ug ang imong halad mahimong hingpit.”
Si Elder Dieter F. Uchtdorf mitudlo:
“Ako nagtuo nga ang Manluluwas nga si Jesukristo gusto nga inyong makita, mabati, ug mahibaloan nga Siya mao ang inyong kalig-on. Nga uban sa Iyang tabang, walay kinutoban ang unsay inyong mahimo. Nga ang inyong potensiyal walay kinutoban. Siya gusto nga kamo makakita sa inyong kaugalingon sa paagi nga Siya nakakita kaninyo. Ug kana lahi kaayo gikan sa paagi sa pagtan-aw sa kalibotan kaninyo. …
“Siya nagahatag og gahom ngadto sa naluya; ug ngadto sa walay mahimo, Siya nagdugang og kusog.”6
Kinahanglan natong hinumdoman nga bisan unsa ang atong labing maayo apan dili hingpit nga halad, ang Manluluwas makahimo niini nga hingpit. Bisan unsa ka daw dili mahinungdanon ang atong mga paningkamot, kinahanglan dili nato ipakaubos ang gahom sa Manluluwas. Ang usa ka yano nga pulong sa kamabination, usa ka mubo apan sinsero nga bisita sa pagpangalagad, o usa ka leksiyon sa Primary nga mahigugmaong gitudlo mahimong, uban sa tabang sa Manluluwas, makahatag og kahupayan, makapalukmay sa mga kasingkasing, ug makausab sa mahangtoron nga mga kinabuhi. Ang atong bakikaw nga mga paningkamot mahimong mosangpot sa mga milagro, ug diha sa proseso, kita makaapil sa usa ka hingpit nga ani.
Kasagaran gibutang kita sa mga sitwasyon nga moinat kanato. Tingali dili kita mobati nga matuman nato ang buluhaton nga gihangyo kanato. Tingali motan-aw kita niadtong atong gikauban sa pagserbisyo ug mobati nga dili gayod kita ingon ka maayo. Mga kaigsoonan, kon mibati kamo niini nga paagi, tan-awa ang talagsaon nga kalalakin-an ug kababayen-an nga naglingkod sa akong luyo ug kinsa akong gikauban sa pagserbisyo.
Nakasabot ko sa inyong kasakit.
Akong nakat-onan, hinuon, nga sama lang nga ang pagkamahingpiton dili pareha sa pagkahimong hingpit diha ni Kristo, ang pagtandi sa kaugalingon dili pareha sa pagsunod [emulation]. Kon atong itandi ang atong kaugalingon ngadto sa uban, adunay duha lang ka resulta. Atong makita atong kaugalingon nga mas maayo kay sa uban ug mahimong manghukom ug manaway kanila, o atong makita atong kaugalingon nga ubos kay sa uban ug mahimong mabalak-on, manaway sa kaugalingon, ug mawad-an og paglaom. Ang pagtandi sa atong kaugalingon ngadto sa uban talagsa ra kaayo nga mabungahon, dili makapabayaw, ug usahay makapasagmuyo gayod. Sa pagkatinuod, kini nga mga pagtandi mahimong espirituhanon nga makapalaglag, magpugong kanato nga makadawat sa espirituhanon nga tabang nga atong gikinahanglan. Sa laing bahin, ang pagsunod niadtong atong gitahod kinsa nagpakita og Kristohanon nga mga kinaiya mahimong makahatag og panudlo ug makapabayaw ug makatabang kanato nga mahimong mas maayo nga mga disipulo ni Jesukristo.
Ang Manluluwas mihatag kanato og sumbanan nga sundon samtang Siya misunod sa Amahan. Siya mitudlo sa Iyang disipulo nga si Felipe: “Dugay na akong nakig-uban kaninyong tanan unya wala ka pa gihapon makaila kanako, Felipe? Ang nakakita kanako nakakita usab sa Amahan. Busa nganong nag-ingon ka man, Ipakita kanamo ang Amahan?”7
Ug dayon siya mitudlo, “Sa pagkatinuod gayod, sultihan ko kamo nga ang nagtuo kanako magbuhat usab sa mga buhat nga akong gibuhat.”8
Dili igsapayan kon unsa ka daw dili mahinungdanon ang atong mga paningkamot, kon kita sinsero, ang Manluluwas mogamit kanato aron sa pagtuman sa Iyang buhat. Kon kita mobuhat lang sa labing maayo nga atong mabuhat ug mosalig Kaniya nga mopuno sa kulang, kita mahimong maapil sa mga milagro nga nagpalibot kanato.
Si Elder Dale G. Renlund miingon, “Dili kamo kinahanglang mahimong hingpit, apan kami nagkinahanglan kaninyo, tungod kay ang tanan nga andam makabuhat og usa ka butang.”9
Ug sama sa gitudlo ni Presidente Nelson kanato, “Ang Ginoo ganahan og paningkamot.”10
Ang Manluluwas nagbarog nga andam nga modawat sa atong mapainubsanon nga mga halad ug mohingpit niini pinaagi sa Iyang grasya. Uban ni Kristo, walay dili hingpit nga ani. Kita kinahanglan nga adunay kaisog nga motuo nga ang Iyang grasya para kanato — nga Siya motabang kanato, moluwas kanato sa bisan unsang kalisod kon kita masayop, ug mohingpit sa atong dili hingpit nga mga paningkamot.
Diha sa sambingay mahitungod sa magpupugas, ang Manluluwas mihulagway sa mga binhi nga gitanom diha sa maayo nga yuta. Ang uban namunga og usa ka gatos ka pilo, ang uban saysenta ka pilo, ug ang uban traynta ka pilo. Ang tanan kabahin sa Iyang hingpit nga ani.11
Si propeta Moroni midapit sa tanan, “Oo, duol ngadto kang Kristo, ug paghingpit diha kaniya, … ug kon kamo molimod sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo.”12
Mga kaigsoonan, ako mopamatuod ni Kristo, kinsa adunay gahom sa paghingpit bisan sa atong labing mapainubsanon nga halad. Buhaton nato ang atong labing maayo, magdala sa unsay atong madala, ug, uban sa hugot nga pagtuo, mobutang sa atong dili hingpit nga halad diha sa Iyang tiilan. Sa ngalan Niya kinsa ang Agalon sa hingpit nga ani, gani si Jesukristo, amen.