Human sa Ikaupat ka Adlaw

Ni Elder W. Mark Bassett

Sa Seventy

Kon kita magpadayon sa unahan uban sa hugot nga pagtuo diha ni Jesukristo, ang ikaupat ka adlaw sa kanunay moabot. Siya sa kanunay moabot aron sa pagtabang kanato.

Sama sa gipahinumdom kanato ganihang buntag, karon mao ang Dominggo sa Lukay, nagtimaan sa madaogong pagsulod sa Manluluwas ngadto sa Jerusalem ug sinugdanan nianang semana santa sa wala pa ang Iyang mahinungdanong Pag-ula, nga maglakip sa Iyang pag-antos, Paglansang sa Krus, ug Pagkabanhaw.

Wala magdugay sa wala pa ang gipanagna nga Iyang pagsulod ngadto sa siyudad, si Jesukristo walay hunong sa Iyang pangalagad sa dihang Siya nakadawat sa balita gikan sa Iyang minahal nga mga higala nga sila si Maria ug Marta nga ang ilang igsoong lalaki nga si Lazaro nasakit.¹

Bisan og grabe ang sakit ni Lazaro, ang Ginoo “nagpabilin usa [og] duha pa ka adlaw niadtong dapita. Dayon human niana miingon siya sa iyang mga disipulo, Mamalik kita sa Judea.”² Sa wala pa magsugod sa panaw ngadto sa panimalay sa Iyang mga higala sa Betania, “gisultihan ni Jesus [ang Iyang mga disipulo] sa walay lipudlipod, Patay na si Lazaro.”³

Sa pag-abot ni Jesus sa Betania ug unang nakita si Marta ug dayon si Maria—tingali tungod sa kasagmuyo sa Iyang ulahi na nga pag-abot—matag usa nila miingon Kaniya, “Kon dinhi ka pa lamang, Ginoo, dili unta mamatay ang akong igsoon.”⁴ Si Marta midugang sa pagpahayag, “Ginoo, baho na siya karon kay upat na man siya ka adlaw sulod sa lubnganan.”⁵

Kining upat ka adlaw mahinungdanon nila ni Maria ug Marta. Sumala sa pipila ka gitudlo sa mga Judeo, gituohan nga ang espiritu niadtong namatay magpabilin sa lawas sulod sa tulo ka adlaw, nagtanyag og paglaom nga posible pa nga mabuhi. Apan, sa ikaupat ka adlaw wala nay paglaom, tingali tungod kay ang lawas magsugod na og ka dugta ug ka “baho.”⁶

Sila si Maria ug Marta anaa niining kahimtang sa kasagmuyo. “Sa pagkakita ni Jesus nga naghilak si [Maria], … natandog siya pag-ayo ug nanghupaw siya,

“Hain mang lubnganan ninyo siya gibutang? nangutana siya. Dali ngari ug tan-awa, Ginoo, mitubag sila.”⁷

Niining higayona nga atong makita ang usa sa mahinungdanong mga milagro atol sa mortal nga pangalagad sa Manluluwas. Una ang Ginoo miingon, “Kuhaa ninyo ang bato.”⁸ Unya, human sa pagpasalamat sa Iyang Amahan, “misinggit siya, Lazaro, gula ngari.

“Ug migula ang namatay nga binugkosan ug mga bendahi ang iyang mga kamot ug tiil ug ang iyang nawong pinutos og panapton. Badbari ninyo siya ug palakta, giingnan sila ni Jesus.”⁹

Sama nila ni Maria ug Marta, kita adunay kahigayonan nga makasinati sa tanan sa pagka-mortal, bisan ang kagul-anan¹⁰ ug kahuyang.¹¹ Matag usa kanato makasinati og kasakit gumikan sa pagkawala sa usa ka tawo nga atong gimahal. Ang atong mortal nga panaw mahimong maglakip sa personal nga sakit o makapaluya nga sakit sa usa ka minahal; depresyon, kahasol, o ubang mga hagit sa kahimsog sa pangisip; pinansyal nga kalisdanan; pagluib; sala. Ug usahay pagaubanan kini og mga pagbati sa kawalay paglaom. Apil ko niini. Sama ninyo, nakasinati ko og nagkadaiyang mga hagit nga atong gidahoman niini nga kinabuhi. Naghunahuna ko niini nga asoy mahitungod sa Manluluwas ug unsay gitudlo niini kanako mahitungod sa atong relasyon uban Kaniya.

Panahon sa atong labihan ka dako nga mga kabalaka, kita, sama nila ni Maria ug Marta, magtinguha sa Manluluwas o mohangyo sa Amahan sa Iyang balaanong tabang. Ang istorya ni Lazaro nagtudlo nato og mga baroganan nga mahimong magamit sa atong kaugalingong kinabuhi samtang mag-atubang kita sa atong indibidwal nga mga hagit.

Pag-abot sa Manluluwas didto sa Betania, ang tanan nawad-an og paglaom nga si Lazaro maluwas—upat na ka adlaw, ug wala na siya. Usahay panahon sa atong kaugalingong mga hagit, tingali mobati kita nga ulahi na kaayo si Kristo, ug ang atong paglaom ug hugot nga pagtuo tingali morag gisulayan. Ang akong pagsaksi ug pagpamatuod mao nga kon kita magpadayon sa unahan uban sa hugot nga pagtuo diha ni Jesukristo, ang ikaupat ka adlaw sa kanunay moabot. Siya sa kanunay moabot aron sa pagtabang kanato o pagbuhi og balik sa atong hugot nga pagtuo. Siya misaad:

“Ayaw kamog kaguol.”¹²

“Dili ko kamo biyaan nga daw mga ilong tuwapos: Mobalik ako kaninyo.”¹³

Usahay morag dili Siya moduol kanato hangtod sa gihulagway nga ikaupat ka adlaw, human nga ang tanang paglaom daw nawala na. Apan nganong ulahi na man kaayo? Si Presidente Thomas S. Monson mitudlo, “Ang atong Langitnong Amahan, nga mihatag nato og daghang angayng ikalipay, nasayod usab nga kita makat-on ug molambo ug mas molig-on kon kita makasagubang ug makalahutay sa mga pagsulay nga atong masinati.”¹⁴

Bisan si Propeta Joseph Smith nakasinati og grabeng ikaupat ka adlaw nga kasinatian. Nakahinumdom ba kamo sa iyang pangamuyo? “O Dios, hain ba ikaw? Ug hain ang imong gambalay nga nagsalipod sa imong tagoanan?”¹⁵ Kon kita mosalig Kaniya, makalaom kita og sama nga tubag: “Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon.”¹⁶

Ang laing mensahe nga atong makat-onan gikan sa istorya ni Lazaro mao kon unsa ang atong kaugalingong tahas diha sa balaanong tabang nga atong gitinguha. Sa dihang miduol si Jesus sa lubnganan, Siya miingon una niadtong anaa didto, “Kuhaa ninyo ang bato.”¹⁷ Pinaagi sa gahom nga anaa sa Manluluwas, dili ba Siya makakuha sa bato sa milagrosong paagi nga wala nay buhaton? Makapahingangha unta kining tan-awon ug dili makalimtan nga kasinatian, apan miingon Siya sa uban nga, “Kuhaa ninyo ang bato.”

Ikaduha, ang Ginoo, “misinggit, Lazaro, gula ngari.”¹⁸ Dili ba mas makapahingangha unta kon ang Ginoo Mismo ang milagrosong mibutang ni Lazaro sa ganghaan aron makit-an dayon siya sa pundok sa mga tawo kon ang bato gikuha na?

Ikatulo, sa dihang migula si Lazaro, “binugkosan og mga bendahi ang iyang mga kamot ug tiil: ug ang iyang nawong pinutos ug panapton. Badbari ninyo siya ug palakta, giingnan sila ni Jesus.”¹⁹ Sigurado ko nga ang Ginoo makahimo sa pagpabarog ni Lazaro sa ganghaan, limpyo ug maduol na, nga ang iyang mga sapot sa lubnganan maayong pagkapilo.

Unsay tuyo sa paghisgot niini nga mga aspeto? Matag usa niining tulo ka butang adunay komon—wala magkinahanglan nga mogamit og balaanong gahom ni Kristo. Kanang mabuhat sa Iyang mga disipulo, Siya mimando nila nga buhaton. Ang mga disipulo siguradong makahimo sa pagkuha sa bato; si Lazaro, human nga gibuhi og balik, adunay kapasidad sa pagbarog ug pagpakita sa iyang kaugalingon sa ganghaan sa lubnganan; ug kadtong nahigugma kang Lazaro makatabang gayod niya sa pagtangtang sa mga sapot sa lubnganan.

Apan, si Kristo lamang ang adunay gahom ug katungod sa pagbuhi og balik ni Lazaro gikan sa pagkamatay. Ang akong hunahuna mao nga ang Manluluwas naglaom nato sa pagbuhat sa tanan kutob sa atong mahimo, ug Siya mobuhat sa unsay Siya lamang ang makabuhat.²⁰

Kita nasayod nga ang “hugot nga pagtuo [diha ni Ginoong Jesukristo] usa ka baroganan sa buhat”²¹ ug “ang mga milagro dili mamunga og hugot nga pagtuo, apan ang lig-on nga hugot nga pagtuo motubo pinaagi sa pagkamasulundon sa ebanghelyo ni Jesukristo. Sa lain nga pagkasulti, ang hugot nga pagtuo moabot pinaagi sa pagkamatarong.”²² Kon maningkamot kita sa pagbuhat og matarong pinaagi sa paghimo ug pagtuman sa sagradong mga pakigsaad ug paggamit sa doktrina ni Kristo sa atong kinabuhi, ang atong hugot nga pagtuo dili lang igo nga kita makalahutay ngadto sa ikaupat ka adlaw, apan pinaagi sa tabang sa Ginoo kita makahimo sa pagkuha sa mga bato nga anaa sa atong agianan, pagbangon gikan sa kawalay paglaom, ug pagbadbad sa atong kaugalingon nianang tanan nga nakabugkos kanato. Samtang ang Ginoo naglaom nato “sa pagbuhat sa tanan nga mga butang nga ubos sa atong gahom,”²³ hinumdomi nga Siya mohatag sa gikinahanglan nga tabang sa tanan niini nga mga butang kon kita mosalig Kaniya.

Sa unsang paagi nga kita makakuha sa mga bato ug matukod diha sa ibabaw sa Iyang bato?²⁴ Kita makasunod sa tambag sa mga propeta.

Pananglitan, sa miaging Oktubre si Presidente Russell M. Nelson nangamuyo nato sa pag-ako sa responsibilidad sa atong mga pagpamatuod sa Manluluwas ug sa Iyang ebanghelyo, sa pagtrabaho niini ug pag-atiman niini, pagpalambo niini gamit ang kamatuoran, ug paglikay nga mahugawan kini sa sayop nga mga pilosopiya sa mga dili matuohon. Siya misaad sa matag usa nato, “Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.”²⁵

Makahimo kita niini!

Sa unsang paagi kita mahulagwayong mobangon ug mogula? Kita malipayong makahinulsol ug makapili sa pagsunod sa mga sugo. Ang Ginoo miingon, “Ang modawat sa akong mga sugo ug magtuman niini mao ang nahigugma kanako. Ang akong Amahan mahigugma kaniya nga nahigugma kanako ug ako usab mahigugma kaniya ug magpaila sa akong kaugalingon ngadto kaniya.”²⁶ Kita makapaningkamot sa paghinulsol matag adlaw ug malipayong makapadayon sa unahan nga may andam nga kasingkasing nga puno sa gugma alang sa Ginoo.

Makahimo kita niini!

Unsaon nga kita, pinaagi sa tabang sa Ginoo, makabadbad sa atong kaugalingon nianang tanang nakabugkos kanato? Kita makatuyo sa pagbugkos sa atong kaugalingon una ug labaw sa tanan ngadto sa atong Langitnong Amahan ug sa Iyang Anak, si Jesukristo, pinaagi sa mga pakigsaad. Si Elder D. Todd Christofferson mitudlo: “Unsa ang tinubdan sa [atong] moral ug espirituhanong gahom, ug unsaon nga kita makabaton niini? Ang tinubdan mao ang Dios. Ang atong paggamit niana nga gahom ipaagi sa atong mga pakigsaad uban Kaniya. … Niining balaanong mga panagsabot, ang Dios misaad sa Iyang kaugalingon nga mopaluyo, mobalaan, ug mohimaya kanato agig bugti sa atong pasalig nga moserbisyo Kaniya ug motuman sa Iyang mga sugo.”²⁷ Kita makahimo ug makatuman sa sagrado nga mga pakigsaad.

Makahimo kita niini!

“Kuhaa ninyo ang bato.” “Gula ngari.” “Badbari ninyo siya ug palakta.”

Mga tambag, mga sugo, ug mga pakigsaad. Makahimo kita niini!

Si Elder Jeffrey R. Holland misaad, “Ang ubang panalangin moabot diha dayon, ang uban dugay, ug ang uban dili moabot hangtod didto sa langit; apan para niadtong mohangop sa ebanghelyo ni Jesukristo, moabot kini.”²⁸

Ug sa kataposan, “Busa, paglipay, ug ayaw kahadlok, kay Ako ang Ginoo anaa uban kaninyo, ug mobarog diha kaninyo.”²⁹

Kini mao ang akong pagsaksi ug pagpamatuod, diha sa sagrado nga ngalan Kaniya kinsa sa kanunay moabot, gani si Jesukristo, amen.