I muri mai i te mahara’a o te manaha

Nā Elder W. Mark Bassett

Nō te Hitu ’Ahuru

’A haere ai tātou i mua ma te fa’aro’o ia Iesu Mesia, e tae mai iho ā te mahara’a o te mahana. E haere mai iho ā ’oia e tauturu ia tātou.

Mai tei fa’aha’amana’ohia mai ia tātou i teie po’ipo’i, e sābati nō te ’āma’a tamara teie mahana, e tāpa’o nō te tomora’a hanahana rahi o te Fa’aora i Ierusalema ’e te ha’amatara’a nō teie hepetoma mo’a hou tāna Tāra’ehara rahi, ’oia ho’i tōna mamae rahi, tōna fa’asātaurora’ahia ’e tōna ti’afa’ahoura’a.

Tau taime ri’i hou tōna tomora’a tei tohuhia i roto i te ’oire, ’ua fafau rahi Iesu Mesia iāna i roto i tāna tāvinira’a, ’a fāri’i ai ’oia i te parau nā roto mai i tōna mau hoa here ’o Maria ’e ’o Mareta ē, ’ua ma’ihia tō rāua tua’ana ’o Lazaro.¹

Noa atu te ma’i fifi rahi ’o Lazaro, ’ua pārahi fa’ahou iho ra te Fatu « i taua vāhi ra e ru’i piti. E muri a’era ’ua parau atu ra ’oia i tāna mau pipi, mai haere ā tātou i Iudea ».² Hou te ha’amatara’a i te rātere i te fare o tōna mau hoa i Betania, « ’ua parau pāpū atu ra Iesu ia rātou [tāna mau pipi], ’ua pohe roa Lazaro ».³

I te haerera’a Iesu i Betania ra ’e ’ua fārerei atu nā mua ia Mareta i muri iho ia Maria, penei a’e ma te pe’ape’a nō tōna taere i te taera’a atu, ’ua aroha atu rāua iāna ma te parau ē, « e te Fatu, ’āhiri ’oe i’ō nei e ’ore e pohe tā’u tua’ane ».⁴ Parau ato’a atu ra Mareta : « ’Ua hau’a i tena na, ’o te ru’i maha ho’i teie ».⁵

Terā e maha mahana e mea faufa’a roa ïa nō Maria ’e Mareta. ’Ia au i te mana’o o te tahi mau fare ha’api’ira’a rabbin, tē mana’ohia nei ē e fa’aea noa mai te vaerua o te ta’ata pohe i roto i te tino e toru mahana, ma te vai te tīa’ira’a e ora fa’ahou mai te ta’ata. Nō reira, i te maha o te mahana, ’ua mo’e teie tīa’ira’a, penei a’e nō te mea tē ha’amata nei te tino i te ’ino ’e i te « hau’a »⁶

Tei roto Maria ’e ’o Mareta i te huru tīa’ira’a ’ore. « E ’ite a’era Iesu ia [Maria] i te ’otora’a… ’ū’uru iho ra ’oia ’e horuhoru atu ra tāna vārua,

« Nō ’ō atu ra, teihea ’oia i te vaiihora’ahia e ’outou ? « ’Ua nā ’ō mai ra rātou iāna, e te Fatu, ’a haere mai nā ’a hi’o ».⁷

I te reira taime tātou e ’ite ai i te hō’ē o te mau temeio rahi o te tāvinira’a a te Fa’aora i te fenua nei. Nā mua roa, ’ua parau te Fatu : « ’A huri ē atu nā i te ’ōfa’i »⁸ I muri mai, i muri a’e i te ha’amāuruurura’a i tōna Metua, « ’ua fa’ateitei a’era i tāna reo, ’ua pi’i atu ra e Lazaro ’a haere mai i rāpae.

« ’Ua haere mai ra taua ta’ata i pohe ra i rāpae, ’ua tā’amuhia nā rima ’e nā ’āvae, i vehīhia ho’i te mata i te ’ahu. ’Ua parau atu ra Iesu ia rātou, ’a tātara ’e ’a tu’u atu iāna ’ia haere nā ».⁹

Mai ia Maria ’e ia Mareta, e rāve’a tā tātou nō te ora i te tā’āto’ara’a o te tāhuti nei, ’oia ato’a i te ’oto¹⁰ ’e te paruparu.¹¹ E ’ite tātou tāta’itahi i te ’oto e tae mai nā roto i te pohera’a te hō’ē ta’ata tei herehia e tātou. Tei roto i tō tātou tere i te tāhuti nei te ma’i nō te ta’ata iho ’aore rā te ma’i tū’ino o te hō’ē tei herehia ; te topatarira’a, te ahoaho ’e te tahi atu mau fifi o te ea pae ferurira’a, te fifi i te pae moni ; te ha’avare ; te hara. ’E i te tahi mau taime, e ’āpitihia mai teie mau fifi i te mana’o hepohepo. ’Aita vau i ta’a ’ē atu. Mai ia ’outou, ’ua fa’aruru vau e rave rahi roa tāmatara’a tei tīa’ihia i roto i teie orara’a. ’Ua ’umehia mai au e teie parau iti nō ni’a i te Fa’aora ’e te mea tāna i ha’api’i iā’u nō ni’a i tō tātou aura’a ’e ’ōna.

I roto i tō tātou mau pe’ape’a rahi a’e, tātou, mai ia Maria ’e Mareta, e ’imi tātou i te Fa’aora ’aore rā e ani tātou i te tauturu hanahana a te Metua. Tē ha’api’i nei te ’ā’amu ’o Lazaro ia tātou i te mau parau tumu e ti’a ’ia fa’a’ohipahia i tō tātou iho orara’a, ’ia fa’aruru ana’e tātou i tō tātou iho mau tāmatara’a tāta’itahi.

I tō te Fa’aora taera’a i Betania, ’ua mo’e roa i te tā’āto’ara’a te tīa’ira’a ē, e nehenehe Lazaro e ora fa’ahou mai—’ua ma’iri ho’i e maha mahana, ’e ’ua reva ’oia. I te tahi mau taime, i roto i tō tātou iho mau tāmatara’a, e riro tātou i te mana’o ē ’ua taere roa te Mesia i te tae mai, ’e e nehenehe roa tō tātou tīa’ira’a ’e te fa’aro’o e tāmatahia. Tō’u ’itera’a ’e tā’u ha’apāpūra’a ’oia ho’i, mai te peu e haere tātou i mua ma te fa’aro’o ia Iesu Mesia, e tae mai iho ā te maha o te mahana. E haere mai iho ā ’oia e tauturu ia tātou ’aore rā nō te hōro’a fa’ahou mai i te ora i tō tātou tīa’ira’a. ’Ua fafau ’oia :

« ’Eiaha e horuhoru tō ’outou ’ā’au ».¹²

« E’ita vau e vaiiho ’ōtare noa ia ’outou, e ho’i mai ā vau ia ’outou nei ».¹³

I te tahi mau taime, e au ra e’ita ’oia e haere mai ia tātou ra hou te mahara’a o te mahana, ē tae roa atu i taua mahara’a o te mahana, mai te huru ra ’ua mo’e te tīa’ira’a ato’a. Nō te aha rā i taere roa ai ? ’Ua ha’api’i te peresiden Thomas S. Monson, « tō tātou Metua i te ao ra, ’o tē hōro’a nei ia tātou e rave rahi ’oa’oa, ’ua ’ite ato’a ē tē ’apo mai nei, tē tupu rahi nei, ’e tē riro nei tātou e mea pūai atu ā, ’a fa’aruru ai ’e ’a upo’oti’a ai tātou i te mau tāmatara’a tā tātou e ti’a ’ia tomo atu.¹⁴

’Ua fa’aruru ato’a te peropheta Iosepha Semita i te hō’ē ’itera’a rahi i te maha o te mahana. Tē ha’amana’o ra ’outou i tāna ti’aorora’a ? « E te Atua, tei hea rā ’oe ? ’E tei hea rā te ti’ahapa o tē tāpo’i nei i tō ’oe nā vāhi tāpunira’a ? »¹⁵ ’A ti’aturi ai tātou iāna, e nehenehe tātou e fāri’i i te hō’ē ā pāhono mai teie : « E tā’u tamaiti (’aore rā tamāhine), ’ia vai te hau i roto i tō ’oe vārua ; e vai poto noa tō ’oe fifi ’e tō ’oe mau ’ati ».¹⁶

Hō’ē atu ha’api’ira’a tā tātou e nehenehe e ’apo mai i roto i te ’ā’amu, ’oia ho’i e aha tō tātou ti’ara’a i roto i te tauturura’a hanahana ’o tā tātou e ’imi nei. I tō Iesu ha’afātatara’a atu i te mēnema, ’ua nā mua ’oia i te paraura’a i te feiā e vai ra i reira « ’a huri ē atu na i te ’ōfa’i ».¹⁷ Ma te mana i mauhia e te Fa’aora, ’aita ānei e ti’a iāna ma te temeio e huri ē atu i te ’ōfa’i ma te tauto’o ’ore ? E riro te reira ’ei ’ohipa fa’ahiahia mau ’ia hi’o mata ’e hō’ē ’itera’a e ’ore roa e mo’e, ’ua parau rā ’oia ia vetahi ’ē, « ’a huri ē atu na i te ’ōfa’i ».

Te piti, « ’ua tū’ou atu [te Fatu] ma te reo pūai, e Lazaro, ’a haere mai i rāpae ».¹⁸ E ’ere ānei e riro e mea fa’ahiahia atu ā ’āhiri te Fatu iho ma te temeio e tu’u ia Lazaro i te ’ūputa ’ia ti’a i te rahira’a ta’ata ’ia ’ite ’oi’oi mai iāna i te huri-ē-ra’a-hia te ’ōfa’i ?

Te toru i tō Lazaro haerera’a mai i rāpae, « ’ua tā’amuhia nā rima ’e nā ’āvae, ’e ’ua vehihia ho’i te mata i te ’ahu. ’Ua parau atu Iesu ia rātou, ’ia tātara ’e ’ia tu’u atu iāna ’ia haere nā ».¹⁹ ’Ua pāpū roa iā’u ē, ’ua nehenehe i te Fatu ’ia fa’ahaere mai ia Lazaro ma te ti’a i te ’ūputa, tei mā a’ena ’e te ineine, ma tōna mau tāpo’i ro’i tei tūfetufetu-maita’i-hia.

E aha te tumu nō te ha’afaufa’ara’a i teie mau mea ? Hō’ē mea e fa’atū’ati nei i teie nā ’ohipa e toru tāta’itahi—’aita hō’ē e tītau nei i te fa’a’ohipara’a i te mana hanahana o te Mesia. Te mea tā tāna mau pipi e nehenehe e rave, ’ua ha’api’i ’oia ia rātou ’ia rave. Pāpū roa ’ua nehenehe i te mau pipi ’ia huri ē atu rātou iho i te ’ōfa’i ; Lazaro, i muri a’e i te ti’afa’ahoura’a, ’ua nehenehe iāna e ti’a i ni’a ’e i te fa’a’ite mai iāna i te ’ūputa o te mēnema ; ’e ’ua nehenehe roa i te feiā tei here ia Lazaro e tauturu iāna ’ia tātara i te mau ’ahu o te mēnema.

Nō reira, tō te Mesia ana’e mana ’e te ha’amanara’a nō te fa’ati’afa’ahou mai ia Lazaro mai te pohe mai. E au ra iā’u ē, tē tīa’i nei te Fa’aora ia tātou ’ia rave tātou i te mau mea ato’a tā tātou e nehenehe e rave, ’e e rave ’oia i te mea tāna ana’e e nehenehe e rave.²⁰

’Ua ’ite tātou ē, « te fa’aro’o [i te Fatu ia Iesu Mesia] e parau tumu ïa nō te ’ohipa »²¹ ’e « ’aita te mau temeio e fa’atupu i te fa’aro’o, na te ha’apa’ora’a rā i te ’evanelia a Iesu Mesia e fa’arahi mai i te fa’aro’o. ʼOia ho’i, e tupu mai te faʼaroʼo nā roto i te ʼohipa parauti’a ».²² ’A tītau ai tātou i te rave ma te parauti’a ma te fafaura’a atu ’e te ha’apa’ora’a i te mau fafaura’a mo’a ’e te fa’a’ohipara’a i te ha’api’ira’a tumu a te Mesia i roto i tō tātou orara’a, ’aita tō tātou fa’aro’o e nāva’i noa nō te ’āfa’i ia tātou i te maha o te mahana, nā roto rā i te tauturu a te Fa’aora, e nehenehe ato’a ia tātou e huri ē i te mau ’ōfa’i e vai ra i ni’a i tō tātou ’ē’a, ’o te tae mai nā roto i te tīa’i-’ore-ra’a, ’e ’ia fa’aora ia tātou i te mau mea ato’a ’o tē ruuruu nei ia tātou. Nō reira ’a tīa’i ai te Fatu ia tātou « ’ia rave ’ana’anatae tātou i te mau mea ato’a nā roto i tō tātou mana »,²³ ’a ha’amana’o ē e hōro’a mai ’oia i te tauturu e hina’arohia i roto i teie mau mea ato’a, mai te mea e ti’aturi tātou iāna.

Nāhea tātou e nehenehe ai e huri ē i te mau ’ōfa’i ’e e patu ai i ni’a i tōna papa ?²⁴ E nehenehe tātou e pe’e i te mau parau a’o a te mau peropheta.

’Ei hi’ora’a, i te ’āva’e ’Ātopa i ma’iri iho nei, ’ua ti’aoro te peresideni Russell M. Nelson ia tātou ’ia ha’apa’o maita’i i tō tātou iho ’itera’a pāpū nō te Fa’aora ’e tāna ’evanelia, ’ia ha’a nō te reira ’e ’ia fa’a’amu i te reira i te parau mau ’e ’ia ’ape i te ha’avi’ivi’i i te reira i te mau ha’api’ira’a hape a te feiā ti’aturi ’ore. ’Ua fafau mai ’oia ia tātou, « ’a ha’apūai tāmau noa ai ’outou i tō ’outou ’itera’a pāpū nō Iesu Mesia ’ei ’ohipa e rave mātāmua roa, ’a hi’o maīte i te mau temeio e tupu mai i roto i tō ’outou orara’a »²⁵

E nehenehe tātou e nā reira !

Nāhea tātou ’ei hi’ora’a, ’ia ti’a mai ’e ’ia haere mai i rāpae ? E nehenehe tātou e tātarahapa ma te ’oa’oa ’e e mā’iti ’ia ha’apa’o i te mau fa’auera’a. ’Ua parau te Fatu, « tei iāna tā’u ra parau ’e ’ua ha’apa’o ’oia i taua parau ra, ’oia tei hina’aro mai iā’u ; ’e tei hina’aro mai iā’u ra, e herehia mai ’oia e tau Metua ra ; ’e e here ho’i au iāna, ’e e fa’a’ite atu ho’i au iāna iā’u iho ».²⁶ E nehenehe tātou e tītau e tātarahapa i te mau mahana ato’a ’e e haere ma te ’oa’oa i mua ma te ’ā’au tei ’ī i te here nō te Fatu.

E nehenehe tātou e nā reira !

Nāhea tātou, ma te tauturu a te Fatu, ’ia ti’amā i te mau mea ato’a e ruuruu nei ia tātou ? E nehenehe tātou ma te hina’aro mau e ruuruu ia tātou nā mua roa ’e hope roa i tō tātou Metua i te ao ra ’e i tāna Tamaiti, ia Iesu Mesia, nā roto i te mau fafaura’a. ’Ua ha’api’i Elder D. Todd Christofferson : « E aha te puna nō [tō tātou] pūai morale ’e pae vārua, ’e e mea nāhea tātou ’ia fāri’i i te reira ? ’O te Atua te puna. Nā roto i tā tātou mau fafaura’a ’e ’ōna tātou e fāri’i ai i te reira mana […] I roto i teie mau fa’aaura’a hanahana, e ru’uru’u mai te Atua iāna iho nō te pāturu, te ha’amo’a, ’e te fa’ateitei ia tātou, ’ia fafau ana’e tātou e tāvini iāna ’e ’ia ha’apa’o i tāna mau fa’auera’a ».²⁷ E nehenehe tātou e rave ’e e ha’apa’o i te mau fafaura’a mo’a.

E nehenehe tātou e nā reira !

« ’A huri ē atu i te ’ōfa’i ». « ’A haere mai i rāpae ». « ’A tātara e tu’u atu iāna ’ia haere na ».

Parau a’o, fa’auera’a, ’e fafaura’a E nehenehe tātou e nā reira !

’Ua fafau mai Elder Jeffrey R. Holland, « e tae ’oi’oi mai te tahi mau ha’amaita’ira’a, e maoro te tahi, ’e te tahi e tae mau hau te ra’i ; nō rātou rā e tauahi i te ’evanelia a Iesu Mesia, e tae mai iho ā te reira ».²⁸

I te pae hope’a, « nō reira, ’a fa’aitoito, ’e ’eiaha e mata’u, nō te mea tei pīha’i iho vau, ’o te Fatu, ia ’outou na ».²⁹

’O teie tō’u ’itera’a ’e tō’u ’itera’a pāpū, i te i’oa mo’a ’o ’oia o te tae iho ā mai, ’o Iesu Mesia, ’āmene.