Nahibalo Ka ba Nganong Ako Isip usa ka Kristiyano Mituo kang Kristo?

Ni Elder Ahmad S. Corbitt

Sa Seventy

Si Jesukristo kinahanglan nga mag-antos, mamatay, ug mobangon pag-usab aron pagtubos sa tanang katawhan gikan sa pisikal nga kamatayon ug sa paghatag og kinabuhing dayon uban sa Dios.

Usa ka gabii human sa trabaho, mga tuig nang milabay, misakay ko sa naandan nakong bus pauli sa New Jersey gikan sa Siyudad sa New York. Ang babaye nga tupad nako nakabantay sa unsay akong gisulat sa akong computer ug nangutana, “Mituo ka ni … Kristo?” Miingon ko, “Oo, mituo ko!” Samtang nag-istorya kami, nahibaloan nako nga bag-o lang siyang mibalhin sa dapit gikan sa iyang matahom nga nasod sa Asya aron motrabaho sa kinamaayohang sektor sa information technology sa New York.

Natural lang, nangutana ko niya, “Nahibalo ka ba nganong ako isip usa ka Kristiyano mituo kang Jesukristo?” Mitubag usab siya sa normal nga paagi ug midapit kanako sa pagsulti kaniya. Apan sa dihang mosulti na unta ko, dihay daghang misantop sa akong hunahuna diin daghan niini misantop sa inyong hunahuna. Primero kining higayon nga mopasabot ko og “ngano” bahin sa Kristiyanismo ngadto sa tawo nga dili gayod pamilyar niini ug labihan ang ka maalamon. Dili mahimo nga moingon lang ko nga, “Akong gisunod si Jesukristo tungod kay andam Siya nga mag-antos ug namatay alang sa akong mga sala.” Basin maghunahuna siya nga, “Kinahanglan ba nga si Jesus mamatay? Dili ba mahimong pasayloon ug limpiyohan na lang kita sa Dios sa atong mga sala kon kita mohangyo Kaniya?”

Unsaon kaha ninyo sa pagtubag sulod lang sa pipila ka minutos? Unsaon kaha ninyo kini sa pagpasabot ngadto sa usa ka higala? Mga kabataan ug kabatan-onan: mahimo bang pangutan-on ninyo unya ang inyong mga ginikanan o lider, “Nganong si Jesus kinahanglan nga mamatay?” Ug mga kaigsoonan, duna koy itug-an: bisan pa sa tanan nga akong gihunahuna nga akong nahibaloan mahitungod sa doktrina sa Simbahan, kasaysayan, palisiya, ug uban pa, ang tubag niining tumpak nga pangutana bahin sa atong tinuohan naglisod ko sa pagtubag. Nianang adlawa mihukom ko nga mas tutokan nako ang unsay labing gikinahanglan alang sa kinabuhing dayon.

Apan, gipahibalo nako ang akong bag-ong higala¹ nga kita dunay espiritu agig dugang sa lawas ug nga ang Dios mao ang Amahan sa atong mga espiritu.² Gisultihan nako siya nga nagpuyo kita uban sa atong Langitnong Amahan sa wala pa kita matawo dinhi sa mortal nga kalibotan.³ Kay Siya nahigugma kaniya ug sa Iyang tanan nga anak, mihimo Siya og plano alang kanato aron makadawat og lawas sa hitsura sa Iyang nahimaya nga lawas,⁴ mahimong kabahin sa usa ka pamilya,⁵ ug makabalik sa Iyang mahigugmaon nga presensiya aron motagamtam og kinabuhing dayon kauban sa atong mga pamilya⁶ sama sa Iyang gihimo sa Iyang pamilya.⁷ Apan, miingon ko nga kita mag-atubang og duha ka dagkong babag nga gikinahanglan dinhi sa napukan nga kalibotan:⁸ (1) pisikal nga kamatayon—ang panagbulag sa atong mga lawas ug sa atong mga espiritu. Siyempre, nahibalo siya nga tanan kita mamatay. Ug (2) espirituhanong kamatayon—ang atong pagkahibulag gikan sa Dios tungod sa atong mga sala, mga sayop ug mga depekto samtang ang pagkamortal mopadistansiya kanato gikan sa Iyang balaan nga presensiya.⁹ Nasabtan usab niya kini.

Gipahibalo nako siya nga epekto kini sa balaod sa kaangayan. Kini nga mahangtorong balaod nag-ingon nga ang usa ka mahangtoron nga silot ibayad alang sa matag usa natong mga sala o mga pagsupak sa mga balaod sa Dios o kamatuoran, o kita dili na gayod makabalik sa Iyang balaan nga presensiya.¹⁰ Dili kini makiangayon, ug “dili mahimong ilimod sa Dios ang kaangayan.”¹¹ Nasabtan niya kini apan dali niyang nasabtan nga ang Dios manggiloy-on usab, mapinanggaon, ug mahinamon nga mopahitabo sa atong kinabuhi nga dayon.¹² Gipahibalo nako ang akong higala nga aduna usab kitay maliputon, gamhanan nga kaaway—ang tinubdan sa daotan ug mga bakak—nga atong kaatbang.¹³ Busa, ang usa ka tawo nga nagbaton og walay kinutoban nga diosnong gahom nga mobuntog sa tanan niana nga oposisyon ug mga babag gikinahanglan aron sa pagluwas kanato.¹⁴

Dayon gipakigbahin nako ngadto kaniya ang maayong balita—ang “maayong balita nga makalipay kaayo … sa tanang katawhan”¹⁵—nga “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag, kondili makabaton hinuon sa kinabuhing dayon.”¹⁶ Mipamatuod ko sa akong higala, ug ako mosaksi kaninyo, nga si Jesukristo mao kana nga Manluluwas, nga Siya kinahanglan nga mag-antos, mamatay, ug mobangon pag-usab—ang Iyang walay kinutoban nga Pag-ula—aron pagtubos sa tanang katawhan gikan sa pisikal nga kamatayon¹⁷ ug sa paghatag og kinabuhing dayon uban sa Dios ug sa atong mga pamilya¹⁸ ngadto sa tanan nga mosunod Kaniya. Ang Basahon ni Mormon mipahayag nga, “Sa ingon ang Dios … nakaangkon sa kadaogan ibabaw sa kamatayon; naghatag sa Anak og gahom sa pagpangamuyo alang sa mga katawhan …; nga napuno sa [kaluoy ug] kapuangod …; nakabugto sa mga higot sa kamatayon, nadala diha sa iyang kaugalingon ang ilang pagkadaotan ug ang ilang mga kalapasan, nakatubos kanila, ug nakatagbaw sa mga gipangayo sa kaangayan.”¹⁹

Ang mga lakang nga gipadayag sa Dios nga kinahanglan natong buhaton aron mosunod ni Jesus ug modawat og kinabuhing dayon gitawag nga doktrina ni Kristo. Naglakip kini sa “hugot nga pagtuo kang Jesukristo ug sa Iyang Pag-ula, paghinulsol, bunyag [ngadto sa Ang Simbahan ni Jesukristo sa mga Santos sa Ulahing mga Adlaw], pagdawat sa gasa sa Espiritu Santo, ug paglahutay hangtod sa kataposan.”²⁰ Gipakigbahin ko kini nga mga lakang ngadto sa akong higala, apan aniay pipila ka paagi nga bag-o lang gitudlo sa mga propeta ug mga apostoles kon sa unsang paagi ang doktrina ni Kristo makapanalangin sa tanan nga anak sa Dios.

Si Presidente Russell M. Nelson mitudlo: “Ang putli nga doktrina ni Kristo gamhanan. Makapausab kini sa kinabuhi sa tanan kinsa makasabot niini ug magtinguha sa paggamit niini sa iyang kinabuhi.”²¹

Si Elder Dieter F. Uchtdorf mitudlo, “[Ang] Alang sa Kalig-on sa mga Kabatan-onan nga [giya] walay lipod-lipod sa pagpamahayag sa doktrina ni Kristo [ug] sa pagdapit kaninyo [mga batan-on] sa paghimo og mga pagpili nga magbase [niini].”²²

Si Elder Dale G. Renlund mitudlo, “Among dapiton ang mga misyonaryo sa [pagbuhat sa] unsay gihangyo nila ngadto sa ilang mga gitudloan nga buhaton: … [sa paggamit] sa doktrina ni Kristo sa ilang kinabuhi [ug] pagbuhat ug pagpabilin diha sa dalan sa pakigsaad.”²³

Ang doktrina ni Kristo mihatag og katungod niadtong mga nanglimbasog o mibati nga sila wala mahisakop sa Simbahan kay kini makatabang nila, sama sa giingon ni Elder D. Todd Christofferson, “makapamatuod nga: si Jesukristo namatay alang kanako [ug] nahigugma kanako.”²⁴

Mga ginikanan, kon ang inyong mga anak nanglimbasog sa usa ka baroganan sa ebanghelyo o sa pagtulon-an sa propeta, palihog batoki ang bisan unsang matang sa pagsulti og daotan²⁵ o aktibismo batok sa mga lider sa Simbahan. Kining mas ubos, sekyular nga pamaagi anaa sa inyong luyo ug makabugto sa taas og tagal nga pagkamatinud-anon sa inyong anak.²⁶ Kini makatabang kaayo kaninyo aron inyong maprotektahan o mapanalipdan ang inyong bililhon nga anak o aron mas masuod kamo kaniya. Apan ang akong asawa, nga si Jayne, ug ako nasayod gikan sa personal nga kasinatian nga ang pagtudlo sa inyong pinalangga nga anak kon nganong tanan kita nagkinahanglan gayod kang Jesukristo ug unsaon sa paggamit ang Iyang makalipay nga doktrina mao ang mopalig-on ug moayo kaniya. Paduolon nato sila ngadto ni Jesus, kinsa maoy ilang tinuod nga manlalaban ngadto sa Amahan. Si Apostol Juan mitudlo, “Kon may moanha kaninyo … ug motuman sa mga pagtulon-an ni Kristo … ang Amahan ug ang Anak anaa kaniya.” Dayon siya mipasidaan kanato sa pagbantay “kon may moanha kaninyo nga dili magtudlo niining pagtulon-ana.”²⁷

Si Jayne ug ako bag-o lang mibisita sa kamingawan diin si Moises nagbutang og bronse nga bitin sa tumoy sa tukon atubangan sa nahisalaag nga mga anak sa Israel. Misaad ang Ginoo nga mamaayo ang tanan nga napaakan sa makamatay nga mga bitin kon sila motan-aw lamang niini.²⁸ Sa pagtudlo sa doktrina ni Kristo sa atong mga miyembro, kini mao usab ang gihimo sa propeta sa Ginoo, “nga siya moalim sa mga nasod.”²⁹ Bisan unsa nga pinaakan o hilo o mga panglimbasog nga atong nasinati niining mortal nga kamingawan, dili kita magpenarehas niadtong kinsa, kaniadto ug sa karon, nga pwede ra untang ayohon apan, subo lang, “dili motan-aw … kay sila dili motuo nga kini makaayo kanila.”³⁰ Gipamatud-an sa Basahon ni Mormon: Tan-awa, … kini mao ang agianan; ug walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios. Ug karon, tan-awa, kini mao ang doktrina ni Kristo.”³¹

Nianang gabhiona sa New Jersey, ang pagpaambit nganong kita nagkinahanglan ni Jesukristo ug sa Iyang doktrina nakahatag kanako og bag-o nga sister ug kaniya usa ka bag-o nga brother. Mibati kami sa malinawon, makapanghimatuod nga saksi sa Espiritu Santo. Natural lang, gipangayoan nako siya og kontak nga impormasyon ug ipadayon ang pagpakigsulti uban sa atong mga misyonaryo. Malipayon siya nga miuyon.

“Busa, unsa ka dako ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta,” ang Basahon ni Mormon namahayag—sa paghigugma, pagpaambit ug pagdapit³² samtang magpundok kita sa Israel diha sa atong tanan nga komunidad ug mga pamilya—“aron sila masayod nga walay tawo nga makapuyo nga buhi atubangan sa Dios, gawas pinaagi sa mga maayo nga buhat, kaluoy, ug grasya [ug doktrina] sa Balaang Mesiyas.”³³ Sa ngalan ni Jesukristo, amen.