Mga Importanteng Panghitabo sa ika-193 nga Tinuig nga Kinatibuk-ang Komperensiya

“Kita gipakaon sa espirituhanon nga paagi niining kataposang duha ka adlaw.,” miingon si Presidente Russell M. Nelson sa pagtapos sa Ika-193 nga Tinuig nga Kinatibuk-ang Komperensiya sa Ang Simbahan ni Jesukristo sa mga Santos sa Ulahing mga Adlaw (tan-awa sa 127). Kana nga pagsaulog naglakip sa tambag sa pagsunod sa Manluluwas nga si Jesukristo—pulihan ang panagbingkil og gugma nga putli, kapuangod, ug kalinaw (tan-awa sa Presidente Nelson, pahina 98; tan-awa usab sa Elders Christofferson ug Soares, mga pahina 77 ug 85).

“Karon ako modapit kaninyo sa pagsusi sa inyong pagkadisipulo sa konteksto sa paagi sa inyong pagtagad sa uban,” si Presidente Nelson miingon. Ako mopanalangin kaninyo sa paghimo og bisan unsa nga mga kausaban nga tingali gikinahanglan aron nga inyong kinaiya maligdong, matinahoron, ug representante sa tinuod nga sumusunod ni Jesukristo” (pahina 98)

Uban ni Presidente Nelson, ang ubang mga lider sa Simbahan mipahayag nga ang tubag sa atong mga pangutana, mga hagit, nga kahigawad, ug mga kapildihan makita sa ehemplo, mga pagtulon-an, Pag-ula, ug Pagkabanhaw sa Manluluwas nga si Jesukristo, kinsa nagtanyag kanato “sa gasa sa kalinaw” (Presidente Eyring, pahina 29; tan-awa usab sa Presidente Oaks, pahina 102; Presidente Johnson, pahina 81; ug Elder Meurs, pahina 39). Ang mga mamumulong miawhag nato sa pagtutok sa Manluluwas (tan-awa sa Elder Camargo, pahina 64), pagsimba Kaniya (tan-awa sa Elder Stevenson, pahina 6), duol ngadto Kaniya (tan-awa sa Presidente Cordon, pahina 10), pagpalig-on sa atong mga pagpamatuod Kaniya (tan-awa sa Presidente Ballard, pahina 105), pagpangalagad sama sa Iyang pagpangalagad (tan-awa sa Elder Gong ug Elder Uceda, mga pahina 16 ug 70), ug pagpalambo sa atong pagkadisipulo (tan-awa sa Elder Bednar, Elder Rasband, ug Elder Bragg, mga pahina 123, 108, ug 60).

Ang mga lider sa Simbahan nag-awhag usab nato sa paghatag og bili sa atong patriyarkal nga panalangin. Kadtong wala pa makadawat sa ilang patriyarkal nga panalangin gitambagan sa pag-ampo mahitungod “kon ang panahon husto na” nga modawat niini (tan-awa sa Elder Bennett ug Elder Yamashita, mga pahina 42 ug 88).

Si Presidente Nelson, kinsa mipahibalo nga magtukod og 15 ka bag-ong templo, nagpahinumdom nato, “Si Jesukristo mao ang rason nga kita nagtukod og mga templo” (pahina 127; tan-awa usab sa Elder Renlund, Elder De Hoyo, ug Elder Duncan, mga pahina 35, 52, ug 95).

Gipaluyohan nato ang lima ka bag-ong Kinatibuk-ang Awtoridad nga Seventy, bag-ong Kinatibuk-ang Kapangulohan sa Young Women, ug usa ka bag-ong sakop sa Kinatibuk-ang Kapangulohan sa Young Men, samtang naghatag og kinasingkasing nga pasalamat ngadto niadtong gi-released o i-release sa Agosto 1, 2023.

Samtang kita motan-aw pag-usab sa kinatibuk-ang komperensiya, magtuon sa mga mensahe, ug “mamalandong sa mga kamatuoran nga gitudlo” (Presidente Nelson, pahina 127), kita, uban niadtong namulong, mobati og tinguha sa paghisgot, paglipay, pagsangyaw, ug pagpamatuod ni Jesukristo—ang tinubdan sa atong kaluwasan (tan-awa sa 2 Nephi 25:26).