Mau parau rahi nō te 193ra’a o te ’āmuira’a rahi nō ’Ēperēra

« ’Ua fa’a’amuhia tātou i te mā’a vārua i te roara’a o teie nā mahana e piti », tā te peresideni Russell M. Nelson i parau i te hope’a o te 193ra’a o te ’āmuira’a rahi nō ’Ēperēra a Te ’Ēkālesia a Iesu Mesia i te Feiā Mo’a i te mau Mahana Hope’a nei (hi’o ’api 127). Taua fa’a’amu’a ra, e mau parau a’o ïa e pe’e i te hi’ora’a o te Fa’aora Iesu Mesia—i te monora’a i te mārōra’a i te aroha mau ’e te aumihi ’e te hau (hi’o Peresideni Nelson, ’api 98 ; hi’o ato’a Elder Christofferson ’e Elder Soares, mau ’api 77 ’e 85).

« Tē ani nei au ia ’outou ’ia hi’opo’a i tō ’outou huru ti’ara’a pipi i roto i te parau nō tō ’outou huru i ni’a ia vetahi ’ē », ’ua parau te peresideni Nelson. « Tē ha’amaita’i nei au ia ’outou nō te rave i te mau fa’atanora’a ato’a e tītauhia, ’ia ti’a i tā ’outou peu ’ia riro ’ei mea hanahana, ’ei mea tura, ’e ’ei hōho’a nō te pipi mau nā Iesu Mesia » (’api 98)

Nā muri i te peresideni Nelson, e rave atu ā ti’a fa’atere tei parau ē, tei roto i te hi’ora’a ’e te mau ha’api’ira’a ’e te tāra’ehara ’e te ti’afa’ahoura’a ’o tō tātou Fa’aora Iesu Mesia te pāhonora’a i tā tātou mau uira’a, te mau fifi, te hepohepo ’e te mau mea i mo’e, nāna ho’i e pūpū mai i te « hōro’a nō te hau » (Peresideni Eyring, ’api 29 ; hi’o ato’a Peresideni Oaks, ’api 102 ; Peresideni Johnson, ’api 81 ; ’e Elder Meurs, ’api 39). ’Ua fa’aitoito mai te tahi mau ta’ata a’o ’ia rōtahi i ni’a i te Fa’aora (hi’o Elder Camargo, ’api 64), ’ia ha’amori iāna (hi’o Elder Stevenson, ’api 6), ’ia haere mai iāna ra (hi’o Peresideni Cordon, ’api 10), ’ia ha’apūai i tō tātou ’itera’a pāpū nōna (hi’o Peresideni Ballard, ’api 105), ’ia tāvini i te ta’ata mai tāna e tāvini (hi’o Elder Gong ’e Elder Uceda, mau ’api 16 ’e 70), ’e ’ia ha’amaita’i i tō tātou ti’ara’a pipi (hi’o Elder Bednar, Elder Rasband, ’e Elder Bragg, mau ’api 123, 108, ’e 60).

’Ua fa’aitoito ato’a mai te feiā fa’atere o te ’Ēkālesia ’ia fa’aherehere i tō tātou ha’amaita’ira’a patereareha. Rātou tei ’ore i fāri’i i tō rātou ha’amaita’ira’a patereareha, ’ua a’ohia rātou ’ia pure nō te fāri’ira’a i te reira « ’ia ti’a te taime » (hi’o Elder Bennett ’e Elder Yamashita, mau ’api 42 ’e 88).

’Ua fa’aha’amana’o mai te peresideni Nelson, tei fa’aara e 15 hiero ’āpī : « ’O Iesu Mesia te tumu e patu ai tātou i te mau hiero » (’api 127 ; hi’o ato’a Elder Renlund, Elder De Hoyos, ’e Elder Duncan, mau ’api 35, 52, ’e 95).

’Ua pāturu tātou e pae Hitu ’Ahuru huimana fa’atere rahi ’āpī, i te hō’ē peresidenira’a rahi ’āpī nō te Feiā ’Āpī Tamāhine ’e i te hō’ē melo ’āpī nō te peresidenira’a rahi o te Feiā ’Āpī Tamāroa, ’e ’ua fa’atae-ato’a-hia tō tātou māuruuru rahi ia rātou tei ha’amāuruuruhia ’aore rā ’o tē ha’amāuruuruhia i te 1 nō ’Ātete 2023.

’Ia hi’o fa’ahou tātou i te ’āmuira’a rahi, ’ia tuatāpapa tātou i te mau a’ora’a ’e ’ia hi’o tātou « i te mau parau mau i ha’api’ihia » (Peresideni Nelson, ’api 127), e ’ite mai tātou, nā muri i te feiā tei a’o mai, i te hina’aro ’ia parau, ’ia ’oa’oa, ’ia poro ’e ’ia fa’a’ite pāpū nō Iesu Mesia—te puna nō tō tātou fa’aorara’a (hi’o 2 Nephi 25:26).