Taea’e Bradley R. Wilcox

Tauturu hō’ē i roto i te peresidenira’a rahi nō te Feiā ’Āpī Tamāroa

E rave rahi matahiti hou ’a tāvini ai ’oia ’ei tauturu i roto i te peresidenira’a rahi nō te Feiā ’Āpī Tamāroa, ’ua tono te taea’e Bradley R. Wilcox ’e tāna vahine ’o Debi, i tā rāua tamaiti taiā 14 matahiti, i te Especially for Youth [Nā te Feiā ’Āpī] (EFY) i te fare tuatoru nō Brigham Young.

’Ua pe’ape’a rāua ē « ’aita tōna e ivi pae vārua i roto i tōna tino ». E mea ta’a ’ē te ho’ira’a mai te taure’are’a i te fare—e mea rotahi hau atu ’oia ’e te ’ite ’ōhie i te mau mea pae varua. I teienei, e rave rahi matahiti i muri mai, tē tāvini nei ’oia i roto i te hō’ē ’episekōpora’a ’e tē arata’i nei ’oia i te feiā ’āpī i roto i tāna iho pāroita.

Terā tā te taea’e Wilcox i parau tāmau i te pu’e tau ve’ave’a i ma’iri a’enei ’a ’āmui ai te feiā ’āpī nō te ao ato’a nei i roto i te mau ’āmuira’a Nō te Pūai o te Feiā ’Āpī (JSF). E rave rahi taime, ’o rātou « ’aita i pāpū e hina’aro ānei e haere mai » ’ua ho’i rātou i te fare ma te huru ta’a ’ē ’e te maita’i a’e.

’Ua tāvini te taea’e Wilcox ’ei tauturu piti i roto i te peresidenira’a rahi nō te Feia ’Āpī Tamāroa mai te matahiti 2020 mai ā ’e ’ua pāturuhia ’ei tauturu mātāmua i roto i te ’āmuira’a rahi nō ’Ēperēra 2023—’ua parau ’oia ē, ua riro teie ’ei taime ’oa’oa nō te tāvini i te feiā ’āpī mo’a i te mau mahana hope’a nei. Tē rave ’āmui tāmau nei te mau peresidenira’a rahi nō te Feiā ’Āpī Tamāroa ’e te feiā ’āpī tamāhine i te ’ohipa, ’e « ’ua rahi roa atu te feiā ’āpī e fārereihia nei nā roto i te mau ’āmuira’a JSF, te arata’i ’e te ve’a ».

’Ua fānauhia ’o Bradley Ray Wilcox, 63, i Provo, Utaha, USA, i te 25 nō Tītema 1959, nā Ray T. Wilcox ’e ’o Val C. Wilcox. ’Ua pa’ari ’oia i Provo ta’a ’ē atu i te tahi tau matahiti i Etiopia, i tōna tamari’iri’ira’a.

I muri a’e i tōna tāvinira’a i te hō’ē misiōni rave tāmau i Viña del Mar, i Tirēni, ’ua fa’aipoipohia te taea’e Wilcox ia Deborah Gunnell i roto i te hiero nō Provo Utaha i te ’āva’e ’Ātopa 1982. E maha tā rāua tamari’i ’e tē ora nei rātou i Provo, Utaha.

’Ua roa’a te parau tū’ite licence ’e te maîtrise a te taea’e Wilcox i te fare ha’api’ira’a tuatoru nō Brigham Young ’e tāna doctorat nō te ha’api’ira’a, i te fare ha’api’ira’a tuatoru nō Wyoming. E ’orometua ha’api’i ’oia i roto i te tuha’a fa’atere nō te pāpa’ira’a mo’a tahito i BYU. Mai te matahiti 1985 mai ā, ’ua hōro’a ’oia i te rahira’a o tāna mau tau ve’ave’a i te fa’anahora’a EFY a BYU.

’Ua tāvini te taea’e Wilcox ’ei ’ēpisekōpo ’e i roto i te hō’ē peresidenira’a titi, ’ei peresideni nō te misiōni nō Tīreni Santiago Hiti’a o te rā, ’e i roto i te ’āpo’ora’a fa’atere rahi nō te Ha’api’ira’a Sābati.