Brother Michael T. Nelson

Ikaduhang Magtatambag sa Kinatibuk-ang Kapangulohan sa Young Men

Alang ni Brother Michael T. Nelson, ang iyang panahon isip presidente sa misyon nagkompirma nga ang pagtudlo sa nagtubo nga henerasyon og eksakto nga mga baroganan ug dayon sa pagsalig nila nga makahimo og labing maayong mga resulta—alang sa misyonaryo nga buhat ug sa mga kinabuhi sa indibidwal nga mga misyonaryo.

“Kining tanan mahitungod sa pagsalig. Kami nakat-on sa pagsalig kanila,” miingon siya sa pagtrabaho uban sa full-time nga mga misyonaryo sa California San Bernardino Mission, diin ang mga Nelson nagserbisyo isip mga lider sa misyon gikan sa 1998 hangtod 2001.

Si Brother Nelson miingon nga ang pagkat-on—ug paghatag sa mga batan-on og oportunidad sa paggiya—nagpabilin nga tibuok kabahin sa iyang pagserbisyo sa Simbahan ug mopadayon sa iyang bag-ong calling diha sa Kinatibuk-ang Kapangulohan sa Young Men. Sulod sa miaging tulo ka tuig, si Brother Nelson nakaserbisyo isip executive secretary sa Kinatibuk-ang Kapangulohan sa Young Men. Sulod sa duha ka tuig kaniadto, siya nagserbisyo isip usa ka miyembro sa gitawag na karon nga Kinatibuk-ang Konseho sa Pagtambag sa Young Men.

Si Michael Terry Nelson natawo niadtong Hunyo 10, 1956, sa Siyudad sa Salt Lake, Utah, USA, ngadto nila ni Monte Cannon ug Viola Eliza Nelson ug nagtubo didto sa dapit sa Salt Lake. Human makaserbisyo sa Chile Santiago Mission, siya nag-eskwela og organizational communications sa Brigham Young University ug sa University of Utah. Niadtong 1982 siya naminyo ni Barbara Fluckiger didto sa Jordan River Temple. Ang mga Nelson nagpuyo sa Sandy, Utah, sa wala pa mobalhin ngadto sa Wallsburg, Utah. Sila adunay siyam ka anak.

Si Brother Nelson mao ang labaw nga opisyal sa panalapi sa usa ka komersyal ug residensyal nga real state ug kompaniya sa pamuhunan. Ang mga Nelson, lakip sa duha ka anak nga nagpuyo sa panimalay, nagpadagan og gamay nga uma sa ilang yuta nga gipanag-iya. Ang pagkaaktibo ug paggahin og panahon sa gawas kinahanglang importante alang sa kabatan-onan sa Simbahan, si Brother Nelson miingon, sama nga kini importante sa iyang pamilya.

Si Brother Nelson nakaserbisyo isip presidente sa stake, magtatambag sa kapangulohan sa stake, executive secretary sa stake, bishop, ug presidente sa Young Men sa ward ug stake. Siya mitabang sa pagpangita og pundo, sa pagpangrehistro, ug sa mga logistic niadtong 1997 alang sa sinto singkwenta nga lumbay sa karomata nga mipasundayag pag-usab sa unang pundok nga mibiyahe padulong sa Walog sa Salt Lake.