Bag-ong mga Calling

Elder Ahmad S. Corbitt

Kinatibuk-ang Awtoridad nga Seventy

Si Elder Ahmad S. Corbitt miingon nga ang pagpangalagad sa tibuok kalibotan isip usa ka magtatambag sa Kinatibuk-ang Kapangulohan sa Young Men nakatabang nga madala diha sa iyang bag-ong calling “ang mas dako nga abilidad sa pagpaminaw sa mapanagnaon ug apostolikanhong direksyon ug panudlo uban ang nagkadugang nga pag-amping ug hugot nga pagtuo.”

Gitawag nga moserbisyo sa Kinatibuk-ang Kapangulohan sa Young Men niadtong Abril 2020, si Elder Corbitt migahin sa milabay nga tulo ka tuig nga nakigtambayayong sa ubang mga lider sa kabatan-onan sa pagpalig-on sa nagtubo nga henerasyon ug sa pagdapit kanila nga aktibong moapil sa buhat sa kaluwasan ug kahimayaan.

“Wala ko magtuo nga ang akong gibati nga kadinalian sa pagpalig-on sa nagtubo nga henerasyon makunhoran,” siya miingon. “Sila mahimong mas maayong mga lider kay kanato tungod kay sila nagtubo nga adunay mga oportunidad sa paghimo sa buhat sa kaluwasan ug kahimayaan sa mas taas ug mas balaan nga mga paagi.”

Si Ahmad Saleem Corbitt, 60, natawo niadtong Agosto 16, 1962, ngadto nila ni James Earl Corbitt ug Amelia Corbitt, sa Philadelphia, Pennsylvania, USA. Sa iyang ika-18 nga adlaw nga natawhan, si Ahmad miapil sa Simbahan, misunod sa iyang inahan ug sa pipila sa iyang mga igsoon ngadto sa katubigan sa bunyag. Ang iyang amaama nabunyagan pagkasunod tuig.

Human mitambong sa Ricks College (karon Brigham Young University–Idaho) ug nagserbisyo sa Puerto Rico San Juan Mission gikan sa 1982 hangtod 1984, iyang nahimamat si Jayne Joslin atol sa young single adult nga biyahe ngadto sa templo. Ang duha naminyo niadtong Agosto 1985 didto sa Washington D.C. Temple. Sila mga ginikanan sa unom ka anak.

Si Elder Corbitt adunay mga degree gikan sa unsa na karon nga Stockton University sa New Jersey ug gikan sa Rutgers University School of Law. Siya nagserbisyo isip presidente sa Dominican Republic Santo Domingo East Mission, presidente sa stake, magtatambag sa duha ka kapangulohan sa stake ug high councilor.

Si Elder Corbitt nakatrabaho isip usa ka abogado sa husay, sa publiko ug gobyerno nga mga relasyon, isip direktor sa New York Office of Public and International Affairs sa Simbahan, ug isip usa ka espesyalista sa misyon sa area.