Elder J. Kimo Esplin

Kinatibuk-ang Awtoridad nga Seventy

Pipila ka bulan human sa iyang misyon, si Elder J. Kimo Esplin naaksidente sa sakyanan nga nakapatay sa iyang amahan. Paglabay lang sa pipila ka bulan, uban sa iyang inahan nga naglingkod tupad niya, ang iyang sakyanan gidasmagan sa luyo. Naligid ang sakyanan, ug ang iyang inahan ug ang pag-umangkon nga babaye namatay.

Bisan pa sa mga trahedya ug mga kaguol nga iyang nasinati, si Elder Esplin mikonsiderar sa iyang kaugalingon nga bulahan. Iyang gipahinungod kana nga pagbati ngadto sa Ginoo ug sa Iyang kaayo ug malumong mga kaluoy.

“Maayo ang kinabuhi,” siya miingon.

Usa sa iyang paborito nga panultihon mao “Ang Ginoo wala maghimo niini nganha kanimo; gihimo Niya kini alang kanimo.”

Sa haya sa mga kamatayon sa iyang mga ginikanan, ang iyang magulang nga mga igsoong babaye nag-amotay ug mipadala niya sa gawas aron moeskwela sa Brigham Young University Jerusalem Center. Didto, iyang nahimamat si Kaye Davis.

Ang duha nahimong suod nga managhigala samtang nagkamping ang ilang grupo didto sa desiyerto sa Sinai, nagtrabaho sa uma sa kasagingan, ug nagdungan sa pagtuon sa Daan ug Bag-ong Tugon.

Human mabalik ngadto sa Provo, Utah, sila nagsugod sa pag-date. Sila naminyo sa Salt Lake Temple niadtong 1985. Sila adunay walo ka anak.

Jon Ross Kimo Esplin natawo niadtong Agosto 18, 1962, sa Kahuku, Hawaii, USA. Siya ang kinamanghoran nga anak—ug ang bugtong lalaki—sa walo ka anak nila ni Ross S. ug Olive Ora Moody Esplin.

Si Elder Esplin nakakuha og degree sa accounting gikan sa Brigham Young University niadtong 1987. Human balhina ang iyang pamilya ngadto sa Chicago, Illinois, siya nagsugod sa pagtrabaho sa investment banking ug nakakuha og master of business administration degree.

Sa dihang si Elder Esplin nahimong ehekutibo nga bise presidente ug labaw nga opisyal sa panalapi alang sa Huntsman Corporation, ang pamilya mibalhin ngadto sa Belgium sa wala pa manimuyo sa Cottonwood Heights, Utah.

Si Elder Esplin, kinsa usa ka Area Seventy sa panahon sa iyang pagkatawag isip usa ka Kinatibuk-ang Awtoridad nga Seventy, nagserbisyo isip usa ka presidente sa misyon sa Japan Tokyo ug Japan Tokyo South Missions. Isip usa ka batan-ong full-time nga misyonaryo, siya nagserbisyo sa Japan Kobe Mission. Siya nagserbisyo usab isip presidente sa stake, high councilor, ug bishop.