Peresideni Emily Belle Freeman

Peresideni rahi nō te Feiā ’Āpī Tamāhine

E rave rahi paha ta’ata tei mātau a’ena ia Emily Belle Freeman ei ta’ata ’ōrero, paraparau, ’ei ta’ata pāpa’i, ’ei ta’ata podcaster ’e ’ei ’orometua ha’api’i. Nō rātou rā ’aita i mātau iāna—’e nō rātou ato’a tei mātau—tē ti’aturi nei te peresideni Freeman i te mea mātāmua tā rātou i ’ite nō ni’a iāna, ’oia ho’i, e ti’aturira’a hōhonu ’e te tāmau tōna ia Iesu Mesia.

« E mea nā roto i tō’u iho mau ’itera’a iāna, i noa’a ai iā’u te ’ite i te Metua i te Ao ra ’e ’ua fāri’i au i te ’itera’a i te heheura’a », te parau ïa a te peresideni Freeman. « Terā te ’ohipa faufa’a rahi i roto i tō’u orara’a—taua auhoara’a ra nō te orara’a tā’āto’a e ’ōna ».

I te ha’amatara’a ’oia i tāna ’ohipa ’ei ta’ata pāpa’i ’e ’ei ta’ata podcaster, ’ua ui ’oia iāna iho e aha tāna e hina’aro e rōtahi atu. Te pāhonora’a o te fa’a’ite-pāpū-ra’a ïa nō Iesu Mesia ’e tāna tāra’ehara.

’Ua fānauhia ’oia i te 31 nō Tītema 1969, i Boston, Massachusetts, Fenua Marite, ’a haere ai tōna metua tane, ’o McKinley McVichie Oswald, i te fare ha’api’ira’a tuatoru nō Harvard. ’Ua parau te peresideni Freeman ē, tōna metua vahine, ’o Leslie James Oswald, te hō’ē ïa o te mau rēni vahine « ma te pūai rahi ’e te here rahi ».

’Ua pa’ari te peresideni Freeman, te matahiapo o nā tamari’i e ono, i Sandy, Utaha. ’Ua taui tōna orara’a i te matahiti ha’api’ira’a tuarua i te taime a pi’ihia ai tōna nā metua nō te fa’atere i te misiōni nō Ventura i California. ’Ua ’ohipa ’oia ’e tōna mau teina i roto i te ’āmuira’a misiōni, te ’āmuira’a ārea, ’e te ’āmuira’a titi tāta’itahi ’e tō rātou nā metua. I muri a’e i te ha’api’ira’a tuarua, ’ua fa’aru’e ’oia ia California nō te haere i te ha’api’ira’a i te fare ha’api’ira’a teitei nō Brigham Young.

I te ho’ira’a mai ’o Gregory Garth Freeman i Bountiful (Utaha), tei tāvini i roto i te misiōni nō California Ventura, ’ua ani tōna mau ti’a fa’atere misiōni iāna ’ia haere e māta’ita’i i tā rāua tamāhine i roto i te hō’ē o tāna mau ’ohipa ’orera’a i Utaha. ’Aita i maoro roa, ’ua ha’amata Emily ’e Gregory i te arapae i muri iho, ’e ’ua fa’aipoipohia rāua i te ’āva’e Tītema 1989 i roto i te hiero nō Los Angeles California. E pae tamari’i tā rāua.

’Ua pāpa’i te peresideni Freeman hau atu i te hō’ē tātini buka ’e ’ua paraparau i roto i te mau ’āmuira’a rau, te mau fare ha’api’ira’a ’e te mau putuputura’a. E rave rahi matahiti tōna ha’api’ira’a i roto i te Fa’anahora’a Ha’api’ira’a a te ’Ēkālesia ’e ’ua tāvini ’oia ’ei ’orometua ha’api’i nō te ha’api’ira’a tumu o te ’evanelia, ’e ’ei peresideni nō te Feiā ’Āpī Tamāhine ’e te Sōtaiete Tauturu o te pāroita.