“Sister Andrea Muñoz Spannaus,” Liahona, Mayo 2023.
Sister Andrea Muñoz Spannaus
Ikaduhang Magtatambag sa Kinatibuk-ang Kapangulohan sa Young Women
Isip mga bata nga nagpuyo sa Argentina, si Andrea Veronica Muñoz ug ang iyang magulang nga igsoong babaye mieskwela sa eskwelahan nga Katoliko. Sila wala gayod makadungog sa laing relihiyoso nga mga pagtulon-an hangtod nga si Andrea nag-edad og siyam ka tuig. Mao kadto ang panahon sa dihang ang mga misyonaryo sa mga Santos sa Ulahing mga Adlaw nagsugod sa pagtudlo sa iyang pamilya mahitungod sa gipahiuli nga ebanghelyo.
Sa wala madugay pagkahuman sa mga misyonaryo sa ilang leksiyon ug mibiya, ang inahan ni Andrea mipasabot nga adunay mas daghan pa kay sa usa ka relihiyon. Si Andrea nangutana sa iyang inahan unsa nga simbahan sa iyang hunahuna ang labing maayo nga nagrepresentar sa Dios. Ang iyang inahan mitubag, “Sa akong hunahuna kini”—Ang Simbahan ni Jesukristo sa mga Santos sa Ulahing mga Adlaw, mahitungod sa unsay bag-o lang gitudlo sa mga misyonaryo kanila.
Sa iyang tibuok kinabuhi, si Andrea kanunay nga “gusto nga mopahimuot sa Dios,” mao nga siya nabalaka mahitungod sa pagdawat og bag-ong tinuohan. Hinuon, ang pagbati milungtad lang og pipila ka minuto, ug napulihan og tinguha nga makat-on pa mahitungod sa Simbahan.
Ang pamilya nabunyagan, “ug kami nagsugod og bag-ong kinabuhi,” miingon si Sister Spannaus. “Talagsaon kaayo ang paagi nga nausab ang among kinabuhi sa pamilya alang namong tanan.”
Si Andrea Veronica Muñoz Spannaus natawo niadtong Mayo 18, 1968, sa Buenos Aires, Argentina, ngadto nila ni Carlos Alberto Muñoz ug Elida Menicucci. Siya nagdako sa Béccar, Argentina. Siya naminyo ni Alin Spannaus sa Buenos Aires Argentina Temple niadtong Oktubre 1992. Mga ginikanan sila sa duha ka anak nga babaye.
Si Sister Spannaus nakaangkon og degree sa edukasyon sa early childhood, ug siya nagtuon og art ug interior design. Siya karon nagserbisyo sa konseho sa general advisory sa Relief Society. Kaniadto, siya nagserbisyo sa Komitiba sa South America South Area Alang sa Kalig-on sa Kabatan-onan, sa Komitiba sa Komperensiya sa FSY Utah Latino, ug uban sa iyang bana isip usa ka lider sa Mexico Cuernavaca Mission.
Siya usab nagserbisyo isip presidente sa Relief Society, Young Women, ug Primary, magtutudlo sa sayo sa buntag nga seminary, tigtambag sa young single adult nga Kinatsila ang pinulongan, ug misyonaryo sa Argentina Resistencia Mission.