Sister Tamara W. Runia

Unang Magtatambag sa Kinatibuk-ang Kapangulohan sa Young Women

Sa iyang tibuok kinabuhi, si Sister Tamara (Tammy) W. Runia adunay nagkalainlain nga mga callings—magtutudlo sa klase sa kasulatan, magtatambag sa kapanguloan sa Relief Society sa stake, lider uban sa iyang bana sa Australia Sydney Mission—apan siya migahin sa kadaghanan sa iyang pagserbisyo uban sa Young Women.

“Ganahan ko sa matag calling nga akong naserbisyohan,” si Sister Runia, kinsa nagserbisyo usab isip usa ka presidente sa Young Women sa stake. Apan, siya midugang, “Ako moingon nga komportable ra ko uban sa Young Women.”

Si Sister Runia miingon nga siya nakaapil sa Young Women camp sobra sa 20 ka higayon. Usa ka tuig gihangyo gani siya nga motambong isip camp cheerleader.

Siya gusto nga ang tanang batan-ong babaye makahibalo kon unsa sila ka mahal sa ilang Langitnong Amahan. Kana nga gugma “lapad sama sa langit, lawom sama sa lawod,” siya miingon. Ang Langitnong Amahan, siya midugang, “gusto nga silang tanan makapauli.”

Siya miingon nga ang pagbati niana nga koneksyon makapausab sa kinabuhi alang sa mga batan-ong babaye “tungod kay kini nakapausab kanako.”

Si Sister Runia natawo niadtong Marso 2, 1961, didto sa Concord, California, USA, ngadto nila ni Vincent Alma Wood ug Gail Hilton Wood. Siya nagdako sa Walnut Creek, California.

Siya usa ka freshman sa Brigham Young University nag-eskwela og broadcast journalism sa dihang iyang nahimamat si R. Scott Runia. Nagminyo sila niadtong Mayo 1981 sa Oakland California Temple. Sila adunay pito ka anak ug karon nagpuyo sa Provo, Utah.

Si Sister Runia gipaluyohan atol sa Abril nga kinatibuk-ang komperensiya isip Unang Magtatambag sa bag-ong Kinatibuk-ang Kapangulohan sa Young Women. Siya magsugod sa iyang pagserbisyo sa Agosto 1.

Agig dugang sa iyang pagserbisyo sa Simbahan, siya migahin og 20 ka tuig sa hunta sa Food and Care Coalition sa Provo, nga naghatag og mga kapanguhaan alang sa walay mga panimalay ug gamay og kinitaan nga mga tawo.