2022 nga Report: Pag-atiman Niadtong Nanginahanglan

Ang 2022 nga tinuig nga report sa Simbahan sa pag-atiman niadtong nanginahanglan nagpakita nga kini nga buhat naglakip sa labaw sa $1 ka bilyon nga mga gasto, 6.3 ka milyon nga oras sa pagboluntaryo, ug 3,692 nga makitawhanon nga mga proyekto sa 190 ka nasod ug mga teritoryo.

Ang kwarta naadto sa tabang gikan sa halad sa puasa, makitawhanon nga tabang, mga butang nga gipang-apud-apod gikan sa mga tipiganan sa bishop ug sa mga tindahan sa Deseret Industries, ug mga operasyon sama sa mga uma, mga pasilidad sa pagproseso og pagkaon, mga sentro sa Family Services alang pagtambag, ug panarbaho.

Ang labing dakong kwarta nga donasyon nga gihatag sa Simbahan sa 2022 naglakip sa $32 ka milyon ngadto sa World Food Programme (WFP) ug $5 ka milyon ngadto sa tibuok kalibotan nga programa sa nutrisyon sa UNICEF, nga nagtabang sa mga bata nga nakulang sa pagkaon.

“Si Jesus adunay malumo nga kasingkasing alang sa mga bata,” ang gisulti sa Kinatibuk-ang Presidente sa Relief Society nga si Camille N. Johnson sa dihang ang donayon ngadto sa WFP gipahibalo. “Maghilak siya nga makakita kanila nga gigutom. Ug Siya magmaya sa bisan labing gamay nga paningkamot sa pagtabang kanila.”

Ang ubang importanteng mga donasyon naglakip sa $5.1 milyon ngadto sa American Red Cross (agig dugang ngadto sa labaw sa 1 milyon nga mga yunit sa gidonar nga dugo gikan sa mga Santos sa Ulahing mga Adlaw) ug laing $5 ka milyon ngadto sa Rotary International alang sa polio ug mga pagbakuna og tetanus alang sa inahan ug sa bag-ong natawo nga bata.

Ang Simbahan nakahimo usab og dako-dako nga pinansyal nga kontribusyon aron sa pagtabang sa nagkadaghan nga mga tawo nga naapektohan sa natural nga mga katalagman ug gubat. Kini naglakip sa Ukrainian nga mga bakwit; sa mga nakalingkawas sa tsunami sa Tonga; nga biktima sa bagyo sa Kentucky, Florida, ug Habagtang Africa; ug mga biktima sa sibil nga gubat sa Democratic Republic of the Congo.

“Ang gugma ug tinguha sa pagtabang hilabihan ka nindot nga tan-awon,” miingon si Julia, usa ka miyembro sa Simbahan sa Austria kinsa mitabang sa mga bakwit sa pipila ka nasod sa Silingang Uropa. “Ang mga kasingkasing sa mga tawo mas nagkasuod sa usag usa.”

Ang Simbahan mitabang usab sa paghatag og elektrisidad ngadto sa komunidad sa Navajo sa Utah, ug sa mga miyembro sa Simbahan nga nagtrabaho sa Sikhs sa usa ka proyekto sa pagserbisyo sa United Arab Emirates. Ang mga Santos sa Ulahing mga Adlaw nakigtambayayong sa NAACP sa mga proyekto sa pagserbisyo sa komunidad alang sa mga inahan didto sa Memphis sa Tennessee, USA, ug niadtong kinsa nagkinahanglan og masustansyang pagkaon sa San Francisco, California. Ug ang mga Light the World Giving Machine nakakolekta og mga pundo aron ipalit og pagkaon ug ubang mga butang alang niadtong nanginahanglan sa 28 ka dapit sa tibuok kalibotan.

Ang 6.3 milyon nga giboluntaryo nga oras nga gidonar niadtong 2022 naglakip sa pagserbisyo sa mga umahan, mga prutasan, mga cannery, ug sa mga tindahan sa Deseret Industries; mga misyon sa pag-atiman niadtong nanginahanglan, ug pagpanglimpyo human sa mga katalagman.

Agig og dugang sa 3,692 ka makitawhanon nga proyekto, sa 16,285 ka bag-ong mga proyekto sa pagserbisyo nga gipahigayon sa JustServe.org, sa libre nga online volunteer portal sa Simbahan sa 14 ka nasod. Ang himan nagkonektar sa mga tawo ngadto sa mga oportunidad sa pagserbisyo nga mohaom sa ilang mga tinguha ug dapit.

Ang Tigdumalang Bishop nga si Gérald Caussé mitawag sa JustServe “usa ka kalihokan ug usa ka paagi nga kita makatuman sa atong mga pakigsaad” ug “makapanalangin ug makalig-on sa [atong] komunidad” (sa “The Blessings Will Follow: Benefits of Implementing JustServe” [video], ChurchofJesusChrist.org).

Ang Simbahan nagpadayon usab sa iyang mga inisyatibo sa pagkatinugyanan sa kalikopan. Sukad niadtong 2018, ang punoang buhatan sa Simbahan nakapakunhod sa tinuig niini nga konsumo sa tubig og 38 ka milyon ka galon. Labaw sa 500 ka meetinghouse sa tibuok kalibotan karon adunay mga solar panel. Ang Deseret Industries miproseso og 73 ka milyon ka butang nga mahimong gamiton pag-usab [recycled]. Ug ang Sentro sa Church’s Print and Distribution migamit pag-usab sa dul-an ka 4,000 ka tonelada sa papel, metal, karton, ug plastik.