Parau fa’ata’ara’a nō 2022 : Ha’apa’o i te feiā tei hina’aro i te tauturu

Tē fa’a’ite nei te parau fa’ata’ara’a a te ’Ēkālesia nō te matahiti 2022, nō ni’a i te ha’apa’ora’a i te feiā tei hina’aro i te tauturu ē, ’ua hau atu i te 1 miriā moni marite nō te mau ha’amau’ara’a, e 6,3 mirioni hora ’ohipa hōro’a noa, ’e e 3 692 ’ohipa tauturura’a i roto i nā fenua e 190.

’Ua tu’uhia te moni i roto i te moni tauturu o te ō ha’apaera’a mā’a, te tauturura’a i te ao nei, te mau tauha’a i ’ōperehia mai roto atu i te mau fare vaira’a tao’a a te ’episekōpo ’e te mau fare toa Deseret Industries, ’e i roto i te mau fa’anahora’a ’ohipa mai te mau fa’a’apu, te fa’anahora’a mā’a, te fa’anahora’a piha ’ohipa nō te ’utuāfare, ’e te mau pū ohipara’a.

Te tino moni rahi roa a’e tā te ’Ēkālesia i hōro’a i te matahiti 2022 ra, ’oia ho’i, e 32 mirioni tārā marite i te Fa’anahora’a mā’a nā te ao nei (PAM) ’e e 5 mirioni tārā marite i te fa’anahora’a mā’a UNICEF nā te ao ato’a nei, ’o tē tauturu nei i te mau tamari’i nava’i ’ore i te mā’a.

« E ’ā’au here tō Iesu nō te mau tamari’i », te parau ïa a te peresideni rahi nō te Sōtaiete Tauturu, ’o Camille N. Johnson, i te taime’ a fa’aarahia ai te ō nō te PAM. « Tē ’oto nei ’oia ’ia ’ite ia rātou ’ia po’ia. ’E tē ’oa’oa nei ’oia i te tauto’ora’a ha’iha’i roa a’e nō te tauturu ia rātou. »

I roto i te tahi atu mau ō rahi, tē vai ra terā e 5,1 mirioni tārā marite i te Croix-Rouge nō Marite (ta’a ’ē atu terā 1 mirioni ti’ahapa fāito toto tei hōro’ahia e te feiā mo’a i te mau mahana hope’a nei) ’e te tahi ato’a 5 mirioni tārā marite tei hōro’ahia i te Rotary International nō te mau pātia ma’i puomo’o pāparu ’e ma’i ’īriti o te tamari’i ri’i ’e te ’aru’aru.

’Ua hōro’a ato’a te ’Ēkālesia i te mau tauturu moni rahi nō te tauturu i te rahira’a ta’ata tei ro’ohia e te mau ’ati nātura ’e te mau ’ati tama’i. Tei roto i te reira te tauturura’a i te mau tītīhoria nō ’Ūterenia, te feiā i ora mai i te miti fa’a’ī i Tona, te feiā tei ro’ohia e te ’ati vero i Kentucky (Florida), ’e i ’Āfirita Apato’a ; ’e te feiā tei ’ati i roto i te ’arora’a tīvira i te Rēpupirita manahune o Tōneto.

« E mea fa’ahiahia mau ’ia hi’o i te here ’e te hina’aro ’ia tauturu », te parau ïa a Julia, te hō’ē melo nō te ’Ēkālesia i Auteria tei tauturu i te mau tītīhoria i te mau fenua e rave rahi nō Europa Hiti’a o te rā. « ’Ua ’umehia te ’a’au o te ta’ata i ni’a i te tahi ’e te tahi. »

’Ua tauturu ato’a te ’Ēkālesia i te ’āfa’ira’a i te uira i roto i te hō’ē huira’atira Navajo nō Utaha, ’e ’ua ’ohipa te mau melo o te ’Ēkālesia i pīha’i iho i te mau ta’ata Sikhs i roto i te hō’ē ’ohipa totauturu nō te Hau ari’i ’ārapia ’āmui. ’Ua ’āpiti te feiā mo’a i te mau mahana hope’a nei i te NAACP i roto i te mau ’ohipa tāvinira’a a te ’oire, nō te mau metua vahine i Memphis i Tennessee, i te Fenua Marite, ’e nō te feiā e hina’aro i te mā’a maita’i i San Francisco, i California. ’E ’ua ha’aputuputu te mau mātini hōro’a Light the World (Tūrama i te ao) i te moni nō te ho’o i te mā’a ’e te tahi atu mau mea nō te feiā tei hina’aro i te tauturu i roto e 28 vāhi ’ati a’e te ao nei.

I roto i te 6,3 mirioni hora ’ohipa hōro’a noa i roto i te matahiti 2022, tē vai nei te mau ’ohipa fa’a’apu, te mau ’āua mā’a hotu, te mau fare tāpunura’a mā’a ’e te mau fare toa Deseret Industries ; te mau misiōni nō te aupuru i te feiā tei hina’aro i te tauturu ; ’e te ’ohipa tāmāra’a i muri a’e i te mau ’ati nātura.

Ta’a ’ē atu terā e 3 692 ’ohipa tauturura’a i te ao nei, e 16 285 ’ohipa tāvinira’a ’āpī tei fa’a’ōhiehia nā roto i te JustServe.org, te ’ūputa natirara tāmoni ’ore a te ’Ēkālesia e vai ra i roto e 14 fenua. E fa’atū’ati teie mauiha’a i te ta’ata i te mau rāve’a tāvinira’a ’o tē tano i tō rātou mau hina’aro ’e tō rātou vāhi nohora’a.

’Ua parau te ’Ēpisekōpo fa’atere rahi Gérald Caussé nō JustServe, « e hurira’a ’e e rave’a ho’i nō te ora i tā tātou mau fafaura’a » ’e « nō te ha’amaita’i ’e nō te ha’apūai i [tō tātou] ’oire » (i roto « The Blessings Follow : Benefits of Implementing JustServe » [video], ChurchofJesusChrist.org).

’Ua tāmau noa ato’a te ’Ēkālesia i tāna mau ’ōpuara’a ha’apa’ora’a i te heipuni. Mai te matahiti 2018 mai ā, ’ua fa’aiti te pū fa’atere o te ’Ēkālesia i tāna fa’a’ohipara’a tāmatahiti i te pape i te fāito 38 mirioni tarani. Hau atu i te 500 fare purera’a ’ati a’e i te ao nei e mau ’apa itorā tā rātou i teienei. ’Ua fa’a’āpī ’o Deseret Industries e 73 mirioni tauha’a. ’E ’ua fa’a’ohipa ’āpī te Pū ’ōperera’a buka a te ’Ēkālesia fātata e 4 000 tāne ’api parau, te ’auri, te parau pa’ari ’e te ’ūrina.