Mga Balita sa Simbahan
Usa ka Pagtuon sa Lima ka Tuig nga Pangalagad ni Presidente Russell M. Nelson isip Presidente sa Simbahan
Sa iyang unang pakigpulong isip ang ika-17 nga Presidente sa Ang Simbahan ni Jesukristo sa mga Santos sa Ulahing mga Adlaw, nga gipamulong lima ka tuig na ang milabay, si President Russell M. Nelson migiya sa pagtagad palayo gikan kaniya ngadto ni Jesukristo ug dayon mopadayon.
“Ang Ginoo kanunay nga nagtudlo ug kanunay nga motudlo ug modasig sa Iyang mga propeta,” siya mipahayag. “Ang Ginoo ang nangulo. Kami nga gi-orden sa pagsaksi sa Iyang balaan nga ngalan sa tibuok kalibotan mopadayon sa pagtinguha nga mahibalo sa Iyang kabubut-on ug mosunod niini” (“Samtang Dungan Kita nga Magpadayon sa Unahan,” Liahona, Abr. 2018, 6).
Pagdawat og Pagpadayag sa Paggiya sa Simbahan
Si Presidente Nelson milihok subay sa direksyon sa Ginoo samtang siya mibiyahe ngadto sa 35 ka nasod, mihimo og haom nga mga kausaban sa organisayon sa Simbahan, migamit og teknolohiya sa pagpakigbahin sa ebanghelyo, migiya sa Simbahan atol sa pandemya, miisyu og makasaysayanong mga imbitasyon, ug mihimo og mga taytayan sa pagsabot.
Atol sa iyang termino isip Presidente sa Simbahan, si Presidente Nelson nakapamulong ngadto sa gatosan ka kaliboan nga mga Santos sa Ulahing mga Adlaw ug mibisita og mga hari, mga presidente, ug mga primero ministro. Gihupay niya ang mga biktima sa krimen ug ang uban nga naguol ug mipalawom sa mga relasyon sa dagko nga mga lider sa National Association for the Advancement of Colored People (NAACP), nakadawat og imbitasyon sa pagpamulong sa 2019 NAACP nga kombensyon didto sa Detroit, Michigan, USA.
Pinaagi sa pagpadayag ug sa tibuok suporta sa Unang Kapangulohan ug sa Korum sa Napulog Duha ka Apostoles, siya usab mihimo og daghang mga kausaban sa palisiya sulod sa Simbahan.
Ubos sa iyang dinasig nga pagpangulo, gipulihan sa mga lider sa mga Santos sa Ulahing mga Adlaw ang home ug visiting teaching ngadto sa pagpangalagad; miusab sa eskedyul sa mga miting sa Dominggo aron sa pagpahiluna sa nakasentro sa panimalay, gisuportahan sa Simbahan nga pagtuon sa ebanghelyo; ug mihangyo sa mga miyembro sa paggamit sa tibuok ug sakto nga ngalan sa Simbahan. Ang Simbahan mipahiluna og palisiya nga nagtugot sa mga magtiayon kinsa sibil nga nakasal nga maselyo dayon sa templo kon sila andam na; miusab sa ngalan sa husay sa ikapulo ngadto sa pamahayag sa ikapulo; ug miestablisar og palisiya nga nagtugot sa mga babaye nga moserbisyo isip mga saksi sa mga pagselyo diha sa templo ug mga babaye, kabatan-onan, ug mga bata nga takos nga mga miyembro sa Simbahan nga moserbisyo isip mga saksi alang sa mga bunyag.
“Usa sa mga butang nga gibalikbalik sa Espiritu og gisil-sil sa akong hunahuna sukad sa akong bag-o nga tawag isip Presidente sa Simbahan mao ang pagkaandam sa Ginoo nga mopadayag sa Iyang hunahuna ug kabubut-on,” miingon si Presidente Nelson atol sa Abril 2018 nga kinatibuk-ang komperensiya sa Simbahan (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 94).
Niadtong 2020 ang Simbahan nagsaulog sa ikaduhang siglo sa Unang Panan-awon ni Joseph Smith, dili sa inggrande nga kasaulogan apan ang mga lider sa Simbahan nagdapit sa mga Santos sa Ulahing mga Adlaw sa tibuok kalibotan nga mas magkat-on og maayo ug mas kanunay nga maminaw sa tingog sa Ginoo. Sa usa ka pakigpulong sa Abril 2020 nga kinatibuk-ang komperensiya, si Presidente Nelson mipresentar sa makasaysayanong pamahayag, “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan” (tan-awa sa “Paminaw Kaniya,” Liahona, Mayo 2020, 91–92).
Paggiya sa Simbahan taliwala sa COVID-19
Uban sa kasinatian nga nag-una sa pagkadoktor sa kasingkasing apan mas ilabi na isip propeta ug lider sa Ginoo sa usa ka tibuok kalibotan nga relihiyon, si Presidente Nelson migiya sa Simbahan taliwala sa COVID-19 nga pandemya nga nagsugod niadtong 2020.
Ang tubag sa Latter-day Saint Charities sa pandemya nahimong ang labing dako nga pagtubag sa kasaysayan sa Simbahan hangtod niining petsaha, uban sa tabang nga gihatag sa labaw sa 150 ka nasod.
Niadtong Mayo 2020 nga interbiyo sa Mga Balita sa Simbahan, si Presidente Nelson miingon, “Bisan og adunay panganod sa kasubo, adunay mga timailhan sa paglaom nga makita” (sa Sarah Jane Weaver, “Video: President Nelson Talks about the ‘Painful’ Decision to Close Temples amid COVID-19,” Church News, Hulyo 27, 2020, thechurchnews.com). Ang mga timailhan sa paglaom sa pandemya, siya miingon, mao ang pagpangita og mga paagi sa pagpakigkita sa mga Santos sa Ulahing mga Adlaw nga dili na mosakay og eroplano. Pinaagi sa teknolohiya, si Presidente Nelson namulong ngadto sa mga Santos sa Ulahing mga Adlaw sa Venezuela ug Urope ingon man usab sa California, Canada, ug Oklahoma. Namulong usab siya ngadto sa mga young adult sa tibuok kalibotan.
Niadtong Agosto 2022, si Presidente Nelson mibiyahe sa gawas sa Utah sa unang higayon sukad sa pandemya nga gipalig-on niadtong Marso 2020 alang sa pagpahinungod pag-usab sa giayo nga Washington D.C. Temple.
Pagdawat sa Gandhi-King-Mandela Peace Prize
Ang Morehouse College, usa ka makasaysayanong Black college didto sa Georgia, USA, mipahibalo nga kini mohatag sa pasiunang Gandhi-King-Mandela Peace Prize ngadto ni Presidente Nelson. Ang eskwelahan mihatag niining bag-ong dungog sa 98 anyos nga propeta niadtong Abril 13, 2023, sa Worldhouse Interfaith ug Interdenominational Assembly didto sa Martin Luther King Jr. Internasyonal nga Chapel sa Atlanta.
Ang ganti gipangalan kang Mahatma Gandhi, Martin Luther King Jr., ug Nelson Mandela. Kini gitumong, miingon ang eskwelahan, alang sa usa ka tawo nga nagpasiugda og kalinaw ug positibo nga sosyal nga kausaban pinaagi sa dili bayolente nga mga paagi ug naggamit sa ilang tibuok kalibotan nga pagkalider sa pagtuboy og kalinaw, hustisya, pagkadaiya, ug pagkalainlain.
Si Presidente Nelson midawat sa ganti pinaagi sa video, ug ang Tabernacle Choir sa Temple Square mipasundayag usab sa virtual nga paagi.
Ang lima ka tuig nga pangalagad sa propeta napuno sa mga awhag sa paghigugma ug sa pagtahod sa tanan. Sa usa ka kalihokan niadtong 2018 nga nagsaulog sa ika-40 nga anibersaryo sa 1978 nga pagpadayag sa mga panalangin sa pagkapari nga ihatag ngadto sa takos nga mga miyembro sa tanang kaliwat, siya mitudlo sa mga Santos sa Ulahing mga Adlaw sa “pagtukod og mga tulay sa kooperasyon imbis mga paril sa pagpalain” (“Building Bridges,” New Era, Ago. 2018, 6).