Ang Pagpangalagad sa Apostoles sa Tibuok Kalibotan Nagpadayon

Si Elder David A. Bednar mibisita sa Switzerland, Austria, Albania, ug Hungary niadtong Oktubre 2022. Sa Switzerland, iyang gibista ang taas og ranggo nga mga diplomatiko sa U.N. ug ang mga representante sa tibuok kalibotan nga mga organisasyon nga nakigtambayayong sa Simbahan sa makitawhanon nga mga proyekto. Sa ubang mga nasod nakighimamat siya sa mga miyembro, kadaghanan nila mga pioneer sa tinuohan niadtong mga nasod.

“Kami nakig-inter-aksiyon sa mga Santos nga nag-establisar sa pundasyon sa Simbahan nga molungtad sa mga henerasyon,” miingon siya.

Gikan sa São Paulo Temple Visitors’ Center niadtong Nobyembre 10, 2022, si Elder Ronald A. Rasband miapil sa sibya sa Facebook Live, mipakigbahin sa iyang pagsaksi bahin sa Manluluwas nga si Jesukristo.

“Hinumdomi kanunay nga si Jesukristo mao ang Hari sa mga hari. Siya ang Ginoo sa mga ginoo ug Prinsipe sa Kalinaw,” pamatuod ni Elder Rasband.

Niadtong Nobyembre usab, si Elder Gary E. Stevenson namulong sa G20 Religion Forum didto sa Bali, Indonesia. Siya miingon nga ang mga tinuohan labing makatabang sa pagsulbad sa mga problema sa kalibotan kon “sila magmatinud-anon sa ilang importante nga mga baroganan samtang gigiyahan usab sa dugang nga balaan nga kahayag ug kahibalo.”

Si Presidente M. Russell Ballard, Akting nga Presidente sa Korum sa Napulog Duha ka Apostoles, namulong ngadto sa mga misyonaryo sa Mexico City Missionary Training Center niadtong Disyembre 2022 ug mipamatuod sa “pribilehiyo sa pagpahayag ngadto sa kalibotan nga si Jesukristo mao ang Manluluwas ug ang Manunubos sa katawhan.”

Si Elder Jeffrey R. Holland mibisita sa klase sa seminary didto sa California, USA, ug namulong ngadto sa mga miyembro nga Kinatsila ang pinulongan sa walo ka stake libot sa Ventura, California, niadtong Disyembre 2022. Siya namulong sa Iningles ug Kinatsila. Miawhag siya sa mga miyembro nga tutokan ang kabatan-onan ug mihangyo sa kabatan-onan ug sa mga lider nga nanambong nga mahimong mga misyonaryo karon dayon tungod kay ang “Dios buhi, mga kaigsoonan, ang Dios buhi. Ang Simbahan tinuod.”

Si Presidente Dallin H. Oaks, Unang Magtatambag sa Unang Kapangulohan, namulong sa mga miyembro ug mga higala sa Simbahan didto sa Illinois, Indiana, ug Wisconsin, USA, niadtong Pebrero 11, 2023. Namulong siya gikan sa sentro sa stake sa Wilmette, Illinois, nga ang miting gisibya ngadto sa 14 ka stake. Pagkasunod gabii, siya namulong ngadto sa gibanabana nga 900 ka kabatan-onan ug mga young adult nga nagpundok sa Rockford Illinois Stake Center. Ang miting gisibya ngadto sa dugang nga mga dapit sa Illinois, Indiana, ug Wisconsin.

Ang mga miyembro ug ang pang-serbisyo nga mga bolunter mihangop ni Elder Dieter F. Uchtdorf sa iyang pagbisita sa New Delhi, Hyderabad, ug sa Bengaluru gikan sa Pebrero 6 hangtod 17. “Gimahal namo ang India ug ang mga tawo,” sulti ni Elder Uchtdorf. “Natandog kami pag-ayo ug nadasig.”

Si Elder Quentin L. Cook mitudlo sa mga Santos sa Madagascar, Zambia, ug sa Mozambique atol sa usa ka pagbisita niadtong Pebrero. Labaw sa 500 ka tawo nga dili mga miyembro sa Simbahan mitambong sa hiniusang komperensiya sa stake didto sa Maputo, Mozambique, aron maminaw sa Apostol nga mosulti. “Tungod kay dihay daghan kaayo nga dili mga miyembro sa atong tinuohan sa miting sa Dominggo, among gipahaom ang among mga mensahe sa paghisgot sa mga baroganan sa doktrina ug mibilin og dakong talan-awon sa ebanghelyo, mipaila sa kaimportante sa mga propeta, ug milig-on sa hugot nga pagtuo kang Jesukristo ug sa Iyang Pag-ula,” miingon si Elder Cook.

Niadtong Pebrero, si Elder D. Todd Christofferson mibisita sa mga miyembro sa Ghana, Nigeria, Ivory Coast, ug Liberia atol sa 12 ka adlaw nga pagbisita sa Africa West Area. Ang biyahe naglakip sa usa ka miting uban sa presidente sa Ghana. Sila naghisgot sa ilang giambitan nga pagtutok sa edukasyon ug mirebyo sa mga programa sa BYU–Pathway Worldwide and Gathering Place.

Si Elder Dale G. Renlund mibisita sa Honduras, Belize, Panama, Nicaragua, ug Guatemala niadtong Pebrero. Si Elder Renlund gikuyogan sa iyang asawa, nga si Ruth. Atol sa iyang pagbisita, miadto siya sa usa ka ospital sa Nicaragua, ug si Sister Renlund mitabang sa donasyon sa Simbahan sa mga hygiene kit ug sinina alang sa mga langyaw sa Honduras.

Niadtong Marso, si Elder Neil L. Andersen mibisita sa Brazil, diin iyang nahimamat ang inila nga mga lider sa sibiko, mibisita sa dili madugay ipahinungod nga Brasília Brazil Temple, ug mitudlo ug mipamatuod ngadto sa mga miyembro, mga misyonaryo, ug mga lider sa tibuok nasod. Atol sa biyahe, siya ug si Sister Kathy Andersen mihimamat sa First Lady sa Brazil.

Atol sa pagbisita niadtong Marso ngadto sa Mexico, si Elder Gerrit W. Gong mihimamat ni Adán Augusto López, ang interyor nga ministro sa Mexico. Si López mao ang ikaduhang taas og ranggo nga opisyal sa gobyerno sa Mexico. Sa usa ka miting sa punoang buhatan sa Ministry of the Interior, si Elder Gong namulong mahitungod sa mga paningkamot nga gihimo sa Simbahan sa pagpalig-on sa mga pamilya sa Mexico. “Pinaagi sa pagbuhat sa ingon, kami nakatampo sa pagpalig-on sa katilingban,” miingon siya.

Si Elder Ulisses Soares miawhag sa mga Santos sa Ulahing mga Adlaw sa Pacific Area sa pagpadayon sa ilang pagtutok kang Jesukristo. “Kon kita motutok sa atong kinabuhi diha sa Manluluwas nga si Jesukristo ug maningkamot sa pagsunod sa gipahiuli nga ebanghelyo, kita makakaplag kanunay og kalinaw, kapahulayan, ug hingpit nga kalipay,” miingon siya niadtong Marso atol sa pagbisita sa New Zealand, Tonga, ug Fiji.