Tē tāmau nei te tāvinira’a a te mau ’āpōsetolo nā te ao nei

’Ua tere atu ’o Elder David A. Bednar i Herevetia, Auteria, ’Arapānia, e Honeteria i te ’āva’e ’Ātopa 2022. I te fenua Herevetia, ’ua haere ’oia e fārerei i te mau ti’ati’ahau nō te O.N.U. ’e te mau ti’a nō te mau fa’anahora’a nā te ao ato’a nei e ’ohipa ’āmui nei ’e te ’Ēkālesia i roto i te mau ’ōpuara’a tauturura’a i te ao nei. I te tahi atu mau fenua ’ua farerei ’oia i te mau melo, e rave rahi o rātou e mau pionie i roto i te fa’aro’o i taua mau fenua ra.

« Tē ’āmui nei mātou i te feiā mo’a e ha’amau nei i te niu o te ’Ēkālesia ’o tē vai maoro nō te mau u’i e rave rahi », tāna ïa parau.

Mai roto mai i te Pū fāri’ira’a rātere nō te hiero nō São Paulo i te 10 nō Novema 2022, ’ua ’āmui atu ’o Elder Ronald A. Rasband i roto i te hō’ē ha’apurorora’a ti’aiho Facebook, ma te fa’a’ite i tōna ’itera’a pāpū nō ni’a i te Fa’aora ’o Iesu Mesia.

« ’A ha’amana’o tāmau noa ē, ’o Iesu Mesia te Ari’i ’o te mau ari’i. ’O ’oia te Fatu nō te mau fatu ’e te Ari’i nō te hau », ’ua fa’a’ite pāpū Elder Rasband.

I te ’āva’e Novema ato’a, ’ua a’o ’o Gary E. Stevenson i te rurura’a G20 Religion Forum i Bali, ’Īnitōnētia. ’Ua parau ’oia ē, e nehenehe te mau fa’aro’o e tauturu maita’i a’e i te fa’a’āfarora’a i te mau fifi o te ao nei mai te mea « e ha’apa’o maita’i rātou i tā rātou mau parau tumu niu ’a arata’i-ato’a-hia ai e te tahi atu māramarama ’e te ’ite hanahana. »

’Ua paraparau te peresideni M. Russell Ballard, peresideni mono nō te pupu nō te Tino ’Ahuru Ma Piti ’Āpōsetolo, i te mau misiōnare i te Pū ha’api’ipi’ira’a misiōnare nō Mexico City i te āva’e Tītema 2022 ’e ’ua parau pāpū nō te « ha’amaita’ira’a nō te fa’a’itera’a i tō te ao ē, ’o Iesu Mesia te Fa’aora ’e te Tāra’ehara o te mau ta’ata ato’a. »

’Ua haere Elder Jeffrey R. Holland e māta’ita’i i te hō’ē piha ha’api’ira’a ’evanelia i California (Fenua Marite), ’e ’ua paraparau i te mau melo reo pāniora i roto e va’u titi ’ati a’e ia Ventura, i California, i te āva’e Tītema 2022. ’Ua paraparau ’oia nā roto i te reo peretāne ’e te reo pāniora. ’Ua a’o ’oia i te mau melo ’ia rōtahi i ni’a i te feiā ’āpī ’e ’ua ani i te feiā ’āpī ’e i te feiā fa’atere ’ia riro ’ei misiōnare i teienei, « tē ora nei ho’i te Atua, e te mau taea’e ’e te mau tuahine, tē ora nei te Atua. E parau mau te ’Ēkālesia. »

’Ua paraparau te peresideni Dallin H. Oaks, tauturu hō’ē i roto i te Peresidenira’a Mātāmua, i te mau melo ’e te mau hoa o te ’Ēkālesia nō Illinois, nō Indiana ’e nō Wisconsin, i te Fenua Marite, i te 11 nō Fēpuare 2023. ’Ua paraparau mai ’oia mai roto atu i te pū nō te titi i Wilmette, i Illinois, ma te ha’apurorohia te ’āmuira’a i roto e 14 titi. I te pō i muri iho, ’ua paraparau ’oia fātata e 900 feiā ’āpī ’e feiā ’āpī pa’ari tei putuputu i te pū nō te titi nō Rockford Illinois. ’Ua ha’apurorohia te purera’a i te tahi atu mau vāhi nō Illinois, nō Indiana ’e nō Wisconsin.

’Ua fāri’i poupou te mau melo nō ’Īnītia ’e te feiā e hōro’a i tō rātou taime i te ’Ēkālesia, ia Elder Dieter F. Uchtdorf ’a tere ai ’oia i New Delhi, i Hyderabad, ’e i Bengaluru mai te 6 ē tae atu i te 17 nō Fēpuare. « ’Ua here mātou i te fenua ’Īnītia ’e i te mau ta’ata », tē parau ïa a Elder Uchtdorf. « ’Ua putapū roa māua ’e ’ua fa’ahiahia ho’i. »

’Ua ha’api’i Elder Quentin L. Cook i te feiā mo’a i Matatata, i Hamepia ’e i Mōtāpīa, i roto i te hō’ē tere fārereira’a i te ’āva’e Fēpuare. ’Ua hau i te 500 ta’ata e ’ere i te melo nō te ’Ēkālesia tei tae atu i te hō’ē ’āmuira’a titi ’āmui i Maputo, Mōtāpīa, nō te fa’aro’o i te a’ora’a a te ’āpōsetolo. « Nō te rahi o te ta’ata e ’ere i te melo nō tō tātou fa’aro’o i roto i te purera’a o te sābati, ’ua fa’atano mātou i tā mātou mau a’ora’a nō te ha’api’i i te mau ha’api’ira’a tumu ’e nō te vaiiho i te hō’ē hi’ora’a hōho’a rahi nō te ’evanelia, nō te fa’a’ite i te aura’a o te mau peropheta, ’e nō te patu i te fa’aro’o ia Iesu Mesia ’e i tāna tara’ehara », te parau ïa a Elder Cook.

I te ’āva’e Fēpuare ra, ’ua fārerei atu ’o Elder D. Todd Christofferson i te mau melo i Kana, i Nītēria, i te Fenua ’Īvori ’e i Rīpēria i roto i te hō’ē tere 12 mahana i te ārea nō ’Āfirita Tō’o’a o te rā. ’Ua fa’ata’ahia i roto i te reira tere te hō’ē fārereira’a ’e te peresideni nō Kana. ’Ua paraparau rātou nō ni’a i tā rātou rōtahira’a tāhō’ē i ni’a i te ha’api’ira’a, ’e ’ua hi’o rātou i te mau fa’anahora’a nō te BYU–Pathway Worldwide and Gathering Place.

’Ua tere ’o Elder Dale G. Renlund i Honetura, i Belize, i Pānāmā, i Nītāratua ’e Tuatemara i te ’āva’e Fēpuare. ’Ua ’āpe’ehia mai Elder Renlund e tāna vahine, ’o Ruth. I te roara’a o tōna tere, ’ua haere ’oia i roto i te hō’ē fare ma’i i Nītāratua, ’e ’ua tauturu te tuahine Renlund i te hō’ē ō na te ’Ēkālesia, e mau ’āfata tauihaa horoira’a ’e te mau ’ahu nō te mau ta’ata ’āreva i Honetura.

I te ’āva’e Māti ra, ’ua tere atu ’o Elder Neil L. Andersen i Peretīria, i reira tōna fārereira’a i te mau ti’a fa’atere tīvira rahi, ’ua tere i te hiero nō Brasília (Peretīria), fātata i te ha’amo’ahia, ’e ’ua ha’api’i ’e ’ua parau pāpū i te mau melo, te mau misiōnare, ’e te feiā fa’atere nā roto i te fenua tā’āto’a. I roto i te tere, ’ua fārerei rāua te tuahine Kathy Andersen i te vahine mātāmua nō Peretīria.

I roto i te hō’ē tere i te ’āva’e Māti i Mēhiko, ’ua fārerei ’o Elder Gerrit W. Gong ia Adán Augusto López, te fa’aterehau ha’apa’o i te pārurura’a roto nō Mēhiko. ’O López te piti o te ti’a mana teitei roa a’e i roto i te fa’aterera’a hau nō MēhiKo. I roto i te hō’ē rurura’a i te pū fa’atere o te fa’aterehau ha’apa’o i te pārurura’a roto, ’ua paraparau ’o Elder Gong nō ni’a i te mau tauto’ora’a tā te ’Ēkālesia e rave nō te ha’apa’ari i te mau ’utuāfare i Mēhiko. « Nā roto i te reira, tē tauturu nei mātou i te ha’apūaira’a i te orara’a tōtaiete », tāna ïa parau.

’Ua fa’aitoito ’o Elder Ulisses Soares i te feiā mo’a i te mau mahana hope’a nei nō te ārea nō Pātifita ’ia tāpe’a noa i tā rātou rōtahira’a i ni’a ia Iesu Mesia. « ’Ia rōtahi ana’e tātou i tō tātou orara’a i ni’a i te Fa’aora ’o Iesu Mesia ’e ’ia tūtava tātou i te ora i tāna ’evanelia i fa’aho’ihia mai, e ’itehia ia tātou te hau, te fa’afa’aeara’a ’e te ’oa’oa i roto i tō tātou tere », tāna ïa parau i te ’āva’e Māti i roto i te hō’ē tere i Niutirani, i Tona ’e i Fiti.