Internasyonal nga mga Mag-aawit Miapil sa Tabernacle Choir alang sa Komperensiya

Sa unang higayon, ang mga partisipante nga nagpuyo sa gawas sa Estados Unidos miapil sa Tabernacle Choir sa Temple Square atol sa kinatibuk-ang komperensiya.

Ang choir bag-o lang mipalapad sa iyang misyon aron moabot sa tibuok kalibotan nga tigpaminaw, miingon ang presidente sa choir nga si Michael O. Leavitt, kinsa mihulagway sa eksperimento nga programa isip usa ka natural nga pag-uswag sa pagtubo sa choir. “Gihimo namo kini sa bugtong paagi nga among nahibaloan, nga mao ang usa ka lakang sa matag higayon—pagkat-on, pagpalambo, ug pagpangayo sa Ginoo og dugang nga giya,” siya miingon. “Sa matag lakang, mas naklaro na karon nga kini mahitabo.”

Tungod sa estrikto nga eskedyul sa pagbansay, ang mga sakop sa choir kinahanglan nga nagpuyo sulod sa 100 ka milya (160 km) sa makasaysayanong Tabernakulo sa Siyudad sa Salt Lake. Hinuon, si Brother Leavitt miingon nga ang eksperimento nga programa naghatag og oportunidad sa uban nga adunay talagsaon nga mga abilidad sa musika sa pag-apil sa temporaryo lamang.

Subay sa ilang abilidad sa tingog, ang internasyonal nga mga partisipante kinahanglan nga mopakita og kahanas sa teyoriya sa musika ug Iningles atol sa proseso sa pagpili.

Kadtong napili nga mokanta sa choir nagagikan sa unom ka nasod:

Si Alvaro Jorge Martins sa Natal, Brazil, baritone
Si Rodrigo Domaredzky sa Curitiba, Brazil, baritone
Si Thalita De Carvalho sa Sao Paulo, Brazil, ikaduhang soprano
Si Tubo-Oreriba Joseph Elisha sa Accra, Ghana, tenor
Si Jonathan How sa Kuala Lumpur, Malaysia, ikaduhang tenor
Si Denisse Elorza Avalos sa Tijuana, Mexico, ikaduhang soprano
Si Georgina Montemayor Wong sa Monterrey, Mexico, ikaduhang soprano
Si Ronald Baa sa Cagayan de Oro, Philippines, tenor
Si Sundae Mae Indino sa Cagayan de Oro, Philippines, unang soprano
Si Pei-Shan Chung (Kylie Zhong) sa Taipei, Taiwan, unang alto

Ang internasyonal nga mga partisipante miapil sa praktis sa choir, mitambong sa eskwelahan sa choir, mibisita sa pipila ka makasaysayanong dapit sa Simbahan, ug milibot sa Welfare Square sa Simbahan, Temple Square, ug sa Bishops’ Central Storehouse.

Sa pagtapos sa kinatibuk-ang komperensiya, ang mga sakop sa choir nga nakabase sa Utah mikanta sa “Ang Dios Magauban Kanimo” ngadto sa nagbisita nga mga partisipante isip kataposan nga panamilit.

Ang Tigdumalang Bishop nga si Gérald Caussé mipadayag sa iyang gugma ug pasalamat sa mga partisipante sa tibuok kalibotan. “Ako manghinaot nga kon kamo mopauli sa inyong nasod, kamo mopamatuod niini nga kasinatian ug kamo makatabang sa pagpalambo og bag-ong henerasyon sa mga mag-aawit bisan asa—sa tibuok kalibotan,” siya miingon.

Ang duha ka semana nga kasinatian nakatabang sa mga partisipante nga mobati og mas dakong pagbati sa koneksyon ug panaghiusa sa komunidad sa Simbahan. “Kami naggahin og daghang panahon sa departamento sa musika sa Simbahan. Samtang nakigmiting nila, ako tinud-anay nga mibati nga ang mga lider sa Simbahan naglaom nga ang mga Santos sa Ulahing mga Adlaw sa tibuok kalibotan makabaton og mas lawom nga espirituhanong kasinatian pinaagi sa musika,” miingon si Pei-Shan Chung.