Si Presidente Johnson ug Presidente Cordon Mibisita sa Africa

Ang Kinatibuk-ang Presidente sa mga organisasyon sa Relief Society ug Young Women miadto sa silangan ug tunga-tungang Africa niadtong Marso aron mohimamat sa mga Santos sa Ulahing mga Adlaw ug sa mga lider sa gobyerno ug sa pagbisita sa makitawhanon nga mga dapit. Si Camille N. Johnson Kinatibuk-ang Presidente sa Relief Society ug si Bonnie H. Cordon Kinatibuk-ang Presidente sa Young Women misugod sa ilang siyam ka adlaw nga pangalagad sa Nairobi, Kenya.

Si Presidente Cordon mibiyahe ngadto sa Kenya, Uganda, ang Democratic Republic of the Congo, ug sa Republic of the Congo. “Nakigsulti kami sa mga lider sa mga gobyerno nga adunay tinguha sa pagtabang sa mga pamilya, ug kami nakadayeg kaayo sa mga lider nga gusto nga mosunod ni Jesukristo,” miingon si Presidente Cordon. “Isip mga lider sa relihiyon, kami mipakigbahin og komon nga tumong sa pagtabang sa pagpalig-on og mga pamilya, mao nga talagsaon kaayo kadto.”

Si Presidente Johnson mibiyahe ngadto sa amihanang silangang Uganda uban UNICEF (sa una United Nations International Children’s Emergency Fund, karon United Nations Children’s Fund) ug nakigkita sa mga Santos sa Ulahing mga Adlaw sa Lubumbashi, ang Democratic Republic of the Congo. “Kini usa ka paningkamot sa pagtabang sa mga panginahanglan sa dili lang sa mga miyembro—sa makitawhanon nga mga panginahanglan—sa kabataan sa kalibotan, ug sila among nakit-an. Mahimayaon kini,” miingon si Presidente Johnson sa biyahe uban sa UNICEF. “Kadto makapadasig ug makapasubo sa samang higayon, apan ako mibiya didto nga mibati nga malaomon.”