Zaj Lus hauv phau Liyahaunas Txhua Hli, Rau Hli Ntuj 2023

Tus Vaj Ntsuj Plig Dawb Huv Muaj Peev Xwm Pab Peb

ib tug txiv neej zaum thiab saib hnub tuaj

Tus Vaj Ntsuj Plig Dawb Huv yog tus thib peb hauv Pawg Vajtswv. Cov vaj lug kub hais tias Nws kuj yog tus Ntsuj Plig, tus Ntsuj Plig Dawb Huv, los sis tus Nplij Siab. Thaum peb kawm mloog Nws lub suab, Nws yuav ua tim khawv rau peb txog Yexus Khetos thiab pab peb kawm tej lus tseeb ntawm txoj moo zoo.

Ib tug nyob hauv Pawg Vajtswv

Leej Txiv Saum Ntuj Ceeb Tsheej, Yexus Khetos, thiab tus Vaj Ntsuj Plig Dawb Huv yog Pawg Vajtswv. Lawv hlub peb thiab koom siab ua hauj lwm kom thiaj muaj raws li txoj hau kev cawm seej. Txawm Leej Txiv Saum Ntuj Ceeb Tsheej thiab Yexus Khetos muaj cev nqaij daim tawv thiab muaj pob txha, tus Vaj Ntsuj Plig Dawb Huv tsis muaj. Nws yog ib tug ntsuj plig.

daim iav uas tsuas xim rau txog Leej Txiv thiab Leej Tub

Ua Tim Khawv txog Leej Txiv thiab Leej Tub

Tus Vaj Ntsuj Plig Dawb Huv “ua tim khawv txog Leej Txiv thiab Leej Tub” (2 Nifais 31:18). Qhov no txhais tias peb txais tau ib zaj lus tim khawv txog Leej Txiv Saum Ntuj Ceeb Tsheej thiab Yexus Khetos dhau los ntawm tus Vaj Ntsuj Plig Dawb Huv.

Ua Tim Khawv txog Qhov Tseeb

Tus Vaj Ntsuj Plig Dawb Huv ua tim khawv txog txhua yam tseeb. Nws yuav pab peb paub tias txoj moo zoo muaj tseeb—tsis hais txoj hau kev cawm seej, Vajtswv cov lus txib, Kev Muab txoj Moo Zoo Txum Tim Rov Qab Los, thiab Yexus Khetos txoj Kev Theej Txhoj los yog. Nws yuav ntxiv dag zog rau peb zaj lus tim khawv thaum peb thov Vajtswv tsis tu tsis tseg, ua raws li cov lus txib, thiab kawm txog txoj moo zoo.

txhais tes tuav ib lub koob qhia kev

Coj thiab Pov Hwm Peb

Tus Vaj Ntsuj Plig Dawb Huv coj tau peb thaum peb yuav txiav txim siab thiab pov hwm peb kom txhob raug xwm txheej ntawm sab cev nqaij daim tawv thiab sab ntsuj plig. Nws yuav pab peb nrhiav cov lus teb rau peb cov lus nug yog tias peb thov Vajtswv thiab sim ua qhov yog. Nws yeej yuav coj peb “ua qhov zoo” (Lus Qhuab Qhia thiab Kev Khi Lus 11:12).

Nplij Peb lub Siab

Tej lub sij hawm tib neeg hu tus Vaj Ntsuj Plig Dawb Huv ua “tus Nplij Siab” (Yauhas 14:26). Nws yuav ua rau peb muaj “kev cia siab thiab kev hlub uas zoo tag nrho” puv npo (Moroni 8:26) thaum peb txhawj xeeb, tu siab, los sis ntshai. Thaum Nws pab peb hnov Vajtswv txoj kev hlub, peb yuav kov yeej kev poob siab thiab txais kev txhawb nqa thaum peb raug kev sim siab.

Lub Txiaj Ntsim Vaj Ntsuj Plig Dawb Huv

Tom qab peb ua kev cai raus dej, peb txais lub txiaj ntsim Vaj Ntsuj Plig Dawb Huv nyob hauv ib txoj kab ke hu ua kev pom zoo. Thaum peb tau txais lub txiaj ntsim no, tus Vaj Ntsuj Plig Dawb Huv yuav nrog nraim peb nyob tas mus li yog tias peb ua neej ncaj ncees.

poj niam nyeem vaj lug kub

Daim duab los ntawm J. Kirk Richards

Peb Hnov tus Vaj Ntsuj Plig Dawb Huv Li Cas

Tus Vaj Ntsuj Plig Dawb Huv siv ntau txoj kev kom hais lus rau tib neeg. Tej lub sij hawm Nws yuav ua rau yus txais kev kaj siab lug, nplij yus lub siab los sis muab tswv yim rau yus paub hais thiab ua dab tsi. Thaum peb thov Vajtswv kom coj peb kev thiab mloog Nws tej kev tshoov siab, peb kawm tau hais tias Nws siv txoj kev twg hais lus rau peb.

Los ntawm cov Vaj Lug Kub

Tus Vaj Ntsuj Plig Dawb Huv yuav qhia txhua yam rau nej (saib Yauhas 14:26).

Koj muaj peev xwm paub qhov tseeb dhau los ntawm tus Vaj Ntsuj Plig Dawb Huv (saib Maulaunais 10:5).

Tus Vaj Ntsuj Plig Dawb Huv yuav hais lus rau koj hauv koj lub cim xeeb thiab hauv koj lub siab (saib Lus Qhuab Qhia thiab Kev Khi Lus 8:2).

Cov Lus Zoo Nco Ntsoov

Txoj hau kev cawm seej: Vajtswv txoj hau kev los pab Nws cov me nyuam kom hloov los ua neeg zoo li Nws thiab rov qab los cuag Nws.

Lus tim khawv: ib yam uas ua tim khawv ntawm sab ntsuj plig hais tias ib yam dab tsi muaj tseeb.

Kab ke: ib tus txheej txheem dawb ceev uas ua raws li txoj cai ntawm lub pov thawj hwj.

Kawm tej Yam Ntxiv

Yog tias koj muaj lus nug txog tus Vaj Ntsuj Plig Dawb Huv, koj kawm tau vaj lug kub, tej zaj lus los ntawm lub tuam rooj sab laj, thiab lwm yam kev pab hauv Txoj Moo Zoo cov Ntawv (ntawm ChurchofJesusChrist.org los sis hauv qhov app). Koj kuj tham tau nrog koj cov kwv tij los sis viv ncaus uas txhawb pab, koj pawg ntseeg los sis ceg ntseeg cov thawj coj, los sis cov tub txib.

© 2023 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, April 2023. Language. 19026 295