Mukenji wa ku Ngondo wa Liahona Ngondo Muisambombo 2023

Nyuma wa Tshijila Udi Mua Kutuambuluisha

muntu muluma musomba mutangila dipatuka dia diba

Nyuma wa Tshijila udi tshidimba tshisatu tshia Bunzambi. Mifundu idi imubikila bu Nyuma, Nyuma wa Tshijila, anyi Musambi. Pa tudi tulonga bua kuteleja diyi dienda, Neajadika kutudi bua Yezu Kilisto ne udi utuambuluisha bua kulonga bulelela bua lumu luimpa.

Tshidimba tshia Bunzambi

Tatu wa mu Diûlu, Yezu Kilisto, ne Nyuma wa Tshijila badi Bunzambi. Badi batunanga ne badi benza mudimu pamue bua kukumbaja dilongolola dia lupandu. Nansha mudibi ne Tatu wetu wa mu Diulu ne Yezu Kilisto badi ne mibidi ya misunya ne mifuba, Nyuma wa Tshijila kena nabi to. Udi nyuma.

Tshimfuanyi tshia mu lumuenu tshia Tatu ne Muana

Bujadiki bua Tatu ne bua Muana

Nyuma wa Tshijila “udi ujadika bua Tatu ne Muana” (2 Nephi 31:18). Tshidi tshiumvuija ne tudi mua kupeta bujadiki bua Tatu wa mu Diulu ne bua Yezu Kilisto kupitshila ku Nyuma wa Tshijila.

Dijadika dia Bulelela

Nyuma wa Tshijila udi ujadika bulelela bonso. Neatuambuluisha bua kumanya ne lumu luimpa—ne dilongolola dia lupandu, mikenji ya Nzambi, Dipingaja ne Bupikudi bua Yezu Kilisto—bidi bilelela. Neakankamika bujadiki buetu pa tuatungunuka ne kusambila, kulama mikenji ne kulonga lumu luimpa.

tshianza tshikuata kaleji njila

Udi Utuludika ne Utukuba

Nyuma wa Tshijila udi mua kutuludika mu mapangadika etu ne utukuba ku njiwu ya mu nyuma ne ya mubidi. Neatuambuluisha bua kupeta mandamuna ku nkonku yetu patuikala tusambila ne tuteta kuenza tshidi tshimpa. Neatulombola diba dionsu bua kuenza bimpa (Dilongesha ne Bipungidi 11:12).

Udi Utusamba

Nyuma wa Tshijila udi utumibua misangu mikuabu bu “Musambi” (Yone 14:26). Udi mua kutuuja “ditekemena ne dinanga dijima” (Moloni 8:26) patudi tutata, babungama, anyi ne bowa. Bumudiyi utuambuluisha bua kuumvua dinanga dia Nzambi, tudi mua kutamba bidi bitutekesha ne kuikala bakankamana mu matêta etu.

Dipa dia Nyuma wa Tshijila

Panyima pa tetu batambushibua, tudi tupeta dipa dia Nyuma wa Tshijila mu mululu udi ubikidibua dijadika. Patudi tupeta dipa edi, musangu umua, tudi tupeta buikadianganyi bua Nyuma wa Tshijila misangu yonsu pa tuikala ne nsombelu mululama.

muntu mukaji ubala mifundu

Bimfuanyi bia kudi J. Kirk Richards

Mushindu Kayi Utudi Tuteleja Nyuma wa Tshijila

Nyuma wa Tshijila udi uyukila ne bantu mu mishindu mishilangana. Ebi bidi mua kuikala ditalala, ngumvuilu wa busambi anyi ngenyi pa tshia kuamba anyi tshia kuenza. Patudi tusambila bua kupeta buludiki, tuteleja meji enda, tudi mua kulonga mushindu udiyi wakula netu.

Bifumina ku Mifundu

Nyuma wa Tshijila neakulongesha bintu bionsu (tangila Yone 14:26).

Udi mua kumanya bulelela kupitshila ku Nyuma wa Tshijila (tangila Moloni 10:5).

Nyuma wa Tshijila neakula kûdi kupitshila mu meji mueba ne mu mutshima weba (tangila Dilongesha ne Bipungidi 8:2).

Miaku ya Kuvuluka

Dilongolola dia lupandu: dilongolola dia Nzambi bua kuambuluisha bana benda bua kufuanangana nenda ne kualukila kudiye.

Bujadiki: dijadika dia kudi nyuma ne tshintu kampanda tshidi tshilelela.

Mululu: tshienzedi tshia tshijila tshidi tshikumbajibua ku bukôkeshi bua buakuidi.

Peta Bia Bungi

Wewa muikala ne nkonku pa Nyuma wa Tshijila, udi mua kulonga mifundu, miyuki ya mpungilu munene, ne biambuluishi bikuabu bidi mu Tshisangi tshia mikanda ya Lumu Luimpa (ku ChurchofJesusChrist.org anyi mu Application mobile). Udi mua kuakula kabidi ne batatu anyi bamamu bakubi beba anyi balombodi ba tshikongu anyi ba ditamba, anyi bena bukenji.

© 2023 by Intellectual Reserve, Inc. All rights reserved. Mupatula mu USA Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, April 2023. Language. 19006 760