Umyalezo Wanyanga Zonke weLiyahona wangoJuni 2023

UMoya oNgcwele UngasiSiza

indoda ehleli ibuka ilanga liphuma

UMoya oNgcwele uyilungu lesithathu eMkhandlwini kaNkulunkulu. Imibhalo engcwele imubiza ngoMoya, uMoya oNgcwele, noma uMduduzi. Lapho sifunda ukulalela izwi Lakhe, Uzofakaza kithi ngoJesu Kristu asisize sifunde amaqiniso evangeli.

Ilungu loMkhandlu kaNkulunkulu

UBaba oseZulwini, uJesu Kristu, uMoya oNgcwele banguMkhandlu kaNkulunkulu. Bayasithanda futhi basebenza ngobunye ukuze kufezeke isu lensindiso. Nakuba uBaba oseZulwini noJesu Kristu benemizimba yenyama namathambo, uMoya oNgcwele yena akanakho lokho. Ungumoya.

umfanekiso wengilazi kaBaba neNdodana

UFakazi kaBaba neNdodana

UMoya oNgcwele “ufakaza ngoBaba kanye neNdodana” (2 Nefi 31:18). Lokhu kusho ukuthi singathola ubufakazi buka Baba oseZulwini noJesu Kristu ngoMoya oNgcwele.

UFakaza NgeQiniso

UMoya oNgcwele ufakaza ngalo lonke iqiniso. Uzosisiza sazi ukuthi ivangeli––okubalwa kulo nesu lensindiso, imiyalelo kaNkulunkulu, ukuBuyiselwa, kanye neNhlawulo kaJesu Kristu––kuyiqiniso. Uzobuqinisa ubufakazi bethu njengoba siqhubeka nokukhuleka, sigcina imiyalelo futhi silifunda ivangeli.

isandla sibambe inkombandlela

UsiHlahlela indlela futhi Asivikele

UMoya oNgcwele angasihlahlela indlela ezinqumweni zethu futhi asivikele ezingozini zempilo nezangokomoya. Uzosisiza sithole izimpendulo emibuzweni yethu uma sikhuleka futhi sizama ukwenza okulungileyo. Uyohlezi esihola “ekwenzeni okuhle” (iMfundiso neziVumelwano 11:12).

Uyasiduduza

UMoya oNgcwele ngesinye isikhathi kuthiwa “nguMduduzi” (NgokukaJohane 14:26). Uyasigcwalisa “ngethemba nangothando olupheleleyo”(uMoroni 8:26) lapho sikhathazekile, sidangele noma sinokwesaba. Ngesikhathi Esisiza sizwe uthando lukaNkulunkulu, singakunqoba ukudumazeka futhi siqiniswe ezivivinyweni zethu.

Isipho sikaMoya oNgcwele

Emva kokubhabhadiswa, samukeliswa isipho sikaMoya oNgcwele ngesimiso esibizwa ngokuthi ukuqiniswa. Uma sesamukele lesi sipho, sesingaba nobudlelwane njalo noMoya oNgcwele uma nje siphila ngokulunga.

owesifazane efunda imibhalo engcwele

Umfanekiso wenziwe nguJ. Kirk Richards

Indlela Esimuzwa Ngayo uMoya oNgcwele

Umoya oNgcwele ukhuluma kubantu ngezindlela ezahlukene. Lokhu kungaba ukuthula, imizwa yokududuzeka noma ulwazi mayelana nesingakukhuluma nesingakwenza. Lapho sisakhulekela ukuqondiswa silalela nokufunzelelwa Kwakhe, singafunda ukuthi ukhuluma kanjani nathi.

Okuvela emibhalweni engcwele

UMoya oNgcwele uzokufundisa konke (bheka NgokukaJohane 14:26).

Ungalazi iqiniso ngoMoya oNgcwele (bheka uMoroni 10:5).

UMoya oNgcwele angakhuluma nawe emqondweni wakho nasenhliziyweni yakho (bheka IMfundiso neziVumelwano 8:2).

Amagama okufanele Uwakhumbule

Isu lensindiso: Isu likaNkulunkulu lokusiza abantwana Bakhe bafane Naye futhi babuyele Kuye.

Ubufakazi: ubufakazi bangokomoya bokuthi okuthile kuyiqiniso.

Isimiso: isenzo esingcwele esenziwa ngegunya lobupristi.

Thola Olunye Ulwazi

Uma unemibuzo ngoMoya oNgcwele, ungafunda imibhalo engcwele, izinkulumo zengqungquthela jikelele nokunye okutholakala kuMthombo woLwazi lweVangeli (ku ChurchofJesusChrist.org noma kwi-mobile app). Ungakhuluma futhi nabafowenu noma odadewenu abasizayo, abaholi bamawadi noma begatsha lakho, noma abefundisi bevangeli.

© 2023 by Intellectual Reserve, Inc. All rights reserved. Ishicilelwe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, April 2023. Language. 19026 783