Mānava ia ’outou i roto i teie ve’a

Te anira’a a te Fa’aora ’ia fa’a’ite i tōna māramarama

I ni’a i te purūmu nō Emausa, nā Wendy°B. Keller, ma te parau fa’ati’a a Havenlight

Hou ’oia ’a haere atu ai i te ra’i, ’ua ani te Mesia tei ti’afa’ahou i tāna mau ’āpōsetolo nō te Faufa’a ’Āpī, ’ia riro ’ei ’ite nōna « e tae noa atu i te hope’a o te fenua » (Te ’Ohipa 1:8). Ma te fa’auruhia e teie hōpoi’a, « ’aore e mahana tu’ua ia rātou [te mau ’āpōsetolo] i te a’o ’e te ha’api’i atu i te ta’ata ē, ’o Iesu ā te Mesia » (Te ’Ohipa 5:42).

I roto i tāna parau pāpa’i i roto i teie ve’a, ’ua fa’ata’a mai te hō’ē ’āpōsetolo nō teie ’anotau o Elder Quentin°L. Cook, e nāhea e nehenehe ai ia tātou ’ia fa’a’ite i te ’evanelia a te Fa’aora, noa atu tō tātou ’aravihi ’ore. ’Ua pāpa’i ’oia, « ’a ora ai tātou i te ’evanelia, e here ’e e tāvini ia vetahi ’ē, e ti’a pūai noa i mua i te fa’ahemara’a ’e te hāmani-’ino-ra’a, ’e e fa’a’ite i te ’itera’a pāpū nā roto i te parau ’e te ’ohipa, e huti mai tātou ia vetahi ’ē ia Iesu Mesia ra » (’api°4).

Nā roto i te ha’afātatara’a ia tātou iho i te Fa’aora, tē poro nei tātou nā roto i te ’itera’a pāpū ’e te hi’ora’a maita’i. E vai ’oia i rōpū ia tātou, mai tā’u e fa’ata’a nei i roto i tā’u parau pāpa’i nō teie ve’a, mai te mea e fa’atura tātou i tā tātou mau fafaura’a ’e e ’imi i tāna parau a’o nā roto i te mau parau a te mau peropheta (hi’o ’api°40).

I roto i tā tātou tuatāpapara’a nō te mau tāvinira’a a te mau ’āpōsetolo i roto te Mai, pe’e mai i teie ’āva’e, ’a feruri ai tātou i tā tātou iho hōpoi’a ’e te pi’i ’ia fa’a’ite i te māramarama o te Fa’aora i te feiā ati a’e ia tātou. ’Ua ta’uma te Mesia i ni’a i te ra’i e rā ’ē te tau, mai te mea rā te tāparu nei tātou iāna ’ia « pārahi mai i pīha’i iho ia tātou » (Luka 24:29) i teie mahana, e haere ’oia nā muri iho ia tātou hō’ē ta’ahira’a i te taime hō’ē.

Elder Patricio°M. Giuffra

Nō te Hitu ’Ahuru