Zaj Lus hauv phau Liyahaunas Txhua Hli, Xya Hli Ntuj 2023

Kev Qhia Yexus Khetos txoj Moo Zoo

tus ntxhais hluas uas muab phau vaj lug kub nthuav

Thaum peb xav txog cov koob hmoov uas peb txais vim peb yog cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb xav qhia txoj moo zoo rau cov neeg uas peb hlub. Peb txawj qhia peb zaj lus tim khawv txog qhov tseeb los ntawm peb tej lus thiab peb tus yam ntxwv. Peb thov Vajtswv kom txais kev tshoov siab los tau peb thiaj li paub yuav tsum qhia leej twg thiab yuav tsum hais dab tsi.

Yexus ncav tes pab ib tug txiv neej tuag ceg

Hlub Lwm Tus

Ib yam tseem ceeb ntawm kev qhia txoj moo zoo yog kev hlub lwm tus. Thaum peb qhia tias peb hlub lwm tus los ntawm tej yam peb ua zoo li Yexus Khetos, peb qhia Yexus Khetos txoj moo zoo—tej lub sij hawm peb tsis tas hais ib lo lus hlo li. Thiab thaum lwm tus paub tias peb hlub lawv tiag tiag, tej zaum lawv yuav qhib siab xav hnov peb tej kev xav txog txoj moo zoo. (Saib Gary E. Stevenson, “Hlub, Qhia, Caw,” Liyahaunas, Tsib Hlis Ntuj 2022, 84–87.)

Qhia Los ntawm tej txoj Kev uas Tsis Txawv thiab Yooj Yim Hais

Peb qhia tau tej yam uas peb nyiam txog txoj moo zoo. Thaum peb ua tej no txhua hnub hauv peb lub neej, ces yeej yuav tsis txawv heev los sis ua rau peb tsis txaus siab. Piv txwv hais tias, peb nrog peb tsev neeg thiab phooj ywg tham txog tej yam uas peb thaum hnub Sunday los tau. Los sis peb qhia tau lawv txog kev zoo siab uas peb muaj thaum peb pab lwm tus. (Saib Dieter F. Uchtdorf, “Cov Tub Txib txoj Hauj Lwm: Qhia tej Yam hauv Nej lub Siab,” Liyahaunas, Tsib Hlis Ntuj 2019, 15–18.)

Caw Lwm Tus Koom Nrog Peb

Peb caw tau lwm tus kom kawm ntxiv txog txoj moo zoo. Piv txwv hais tias, peb caw tau lawv los koom lub Koom Txoos txoj kev sib ntsib los sis yam ntxim saib ntxim ua, nyeem Phau Ntawv Maumoos, saib lub Koom Txoos qhov vidi-aus, los sis nrog cov tub txib tham. Tej no yua pab lawv hnov tus Ntsuj Plig thiab xav kawm ntxiv.

ob tug poj niam laus zaum ua ke thiab sib tham

Nug txog tej Yam uas Lawv Kawm

Tom qab cov phooj ywg thiab tsev neeg tuaj rau lub tsev koom txoos los sis kawm ib zaj lus nrog cov tub txib ces peb nug tau lawv txog tej yam uas lawv tau kawm. Muaj tej lus qhia txog txoj moo zoo uas yog tej yam tshiab rau lawv, peb thiaj li teb tau tej lus nug uas lawv muaj. Peb qhia tau lawv tias peb hlub thiab txhawb nqa lawv tej kev siv zog los cuag Khetos.

Ntxiv rau Lawv txoj Kev Ntseeg

Peb hwm thiab saib lwm tus txoj kev ntseeg rau nqi, thiab peb sim muab ntxiv rau txoj kev ntseeg uas lawv twb muaj lawm. Piv txwv hais tias, ib tug phooj ywg uas txais tau kev nplij siab los ntawm phau Npaivnpaum tej nqe vaj lug kub kuj yuav txais kev nplij siab los ntawm tej lus qhia uas peb qhia los ntawm Phau Ntawv Maumoos.

tus ntxhais hlaus uas pab ib tug poj laug hla txoj kev

Pab lub Koom Txoos cov Mej Zeej Tshiab

Thaum tib neeg koom lub Koom Txoos, peb pab tau lawv txhawb nqa lawv txoj kev ntseeg. Peb ua tau lawv tus phooj ywg, teb lawv tej lus nug, thiab txhawb nqa lawv thaum lawv txais tej txoj kev hu. Peb yaum tau lawv kom coj raws li Yexus Khetos thiab kawm txog Nws txoj moo zoo mus ntxiv.

ob tug txwj laug uas yog tub txib thiab ib tug txiv neej saib xov tooj ua ke

Kev Ua Ib tug Tub Txib

Ntxiv rau kev qhia txoj moo zoo txhua hnub hauv peb lub neej, lub Koom Txoos cov mej zeej txais tau kev hu ua tub txib los tau thiab. Yog tias lawv npaj lawm, cov tub hluas mus tau thaum lawv muaj 18 xyoo. Cov ntxhais hluas thiab cov neeg laus kuj mus tau. Koj nrhiav tau xov xwm ntxiv nyob ntawm ChurchofJesusChrist.org/callings/missionary.

Los ntawm cov Vaj Lug Kub

Yexus Khetos txib Nws cov thwj tim kom qhia txoj moo zoo rau txhua leej txhua tus (saib Malakaus 16:15).

Cov uas txais kev hu ua hauj lwm yuav tsum ua “kawg siab kawg ntsws thiab kawg dag kawg zog” (saib Lus Qhuab Qhia thiab Kev Khi Lus 4).

Peb yuav muaj kev xyiv fab heev thaum peb pab coj lwm tus los ntseeg txoj moo zoo (saib Lus Qhuab Qhia thiab Kev Khi Lus 18:15–16).

Tej kev Pab Nyob Online

“Kuv yuav ua li cas kom qhia los ntawm Phau Ntawv Maumoos rau ib tug phooj ywg?” “Kuv yuav ua li cas kom kuv tus phooj ywg ntsib cov tub txib?” Twb teb tej lus nug no thiab lwm yam nyob ntawm ChurchofJesusChrist.org/share.

Txoj Moo Zoo cov Ntawv (nyob ntawm ChurchofJesusChrist.org los sis siv qhov app hauv xov tooj ntawm tes) muaj ib pawg ntaub ntawv uas pab tau thiab, tsis hais tej yam tseem ceeb uas peb ntseeg los yog. Cia li xaiv “Qhia txoj Moo Zoo” kom kawm ntxiv txog qhov uas yuav tsum qhia dab tsi thiab yuav ua li cas kom qhia tau.

Yog xav kawm ntxwv txog kev txhawb nqa cov mej zeej tshaib, saib hauv Txoj Moo Zoo cov Ntawv ntawm “Cov Ntawv Coj lub Koom Txoos thiab tej Kev Hu” ces “Kev Hu hauv Pawg Ntseeg los sis Ceg Ntseeg.”

Kawm tej Yam Ntxiv

Yog koj muaj lus nug txog kev qhia txoj moo zoo, koj tham tau nrog koj cov cov kwv tij los sis cov viv ncaus uas txhawb pab, los sis koj cov thawj coj, los sis cov tub txib.

© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, July 2023. Language. 19045 295