“Kutangalaja Lumu Luimpa lua Yezu Kilisto,” Liahona, Ngondu wa Muandamuteketa 2023.
Mukenji wa ku Ngondu wa Liahona Ngondu wa Muandamuteketa 2023
Kutangalaja Lumu Luimpa lua Yezu Kilisto
Patudi tuela meji bua mabenesha atudi tupeta bualu tudi bidimba bia Ekelezia wa Yezu Kilisto wa Bansantu ba Matuku a Ndekelu, tudi tujinga kutangalaja Lumu Luimpa ne aba batudi bananga. Tudi bua kutangalaja bujadiki buetu bua bulelela mu kuakula kuetu anyi mu bikadilu bietu. Tudi bua kusambila bua kupeta lungenyi lua Nyuma bua kumanya utudi bua kutangalaja nenda ne tshia kuamba.
Kunanga Bakuabu
Tshitupa tshia mushinga mu kutangalaja kua lumu Luimpa tshidi dinanga dia bakuabu. Patudi tuleja dinanga dietu kudi bakuabu kupitshila ku bienzedi bia buikadi bua buena Kilisto, tudi tutangalaja lumu luimpa lua Yezu Kilisto—misangu mikuabu katuyi nansha tuakula. Ne padi bakuabu bamanya ne tudi tusumpakana buabu, badi bunzuluka bikola bua kumvua ngenyi yetu pa lumu luimpa. (Tangila Gary E. Stevenson, “Love, Share, Invite,” Liahona, Ngondu Muitanu. 2022, 84– 87.)
Tangalaja mu Mushindu Muakana ne Mupepela
Tudi mua kutangalaja bitudi bananga pa lumu luimpa. Patudi tuenza nunku bu tshitupa tshia moyo wetu matuku onso, kabia kututonda anyi kututshiokesha nansha. Tshilejilu, tudi bua kuyukila ne dîku dietu ne balunda betu pa bitudi tuenza mu Dialumingu. Anyi tudi mua kubambila pa disanka ditudi tumvua patudi tusadila bakuabu. (Tangila Dieter F. Uchtdorf, “Missionary Work: Sharing What Is in Your Heart,” Liahona, Ngondu Muitanu 2019, 15–18.)
Kubikila Bakuabu bua Kusangila Netu
Tudi bua kubikila bakuabu bua kulonga bikola pa lumu luimpa. Tshilejilu, tudi bua kubabikila bua kulua mu tshisangilu tshia Ekelezia anyi mu tshibilu, kubala Mukanda wa Molomo, kutangila bindidimbi bia Ekelezia, anyi kubatantshila ne bena bukenji. Bibidilu ebi bidi bibambuluisha bua kumvua Nyuma ne kujinga kumanya bia bungi.
Kukonka pa Dibidila Diabu
Panyima pa balunda ne bidimba bia dîku bilua ku ekelezia anyi balonga ne bena bukenji, tudi bua kubakonka pa dibidila diabu. Malongesha makuabu a lumu luimpa adi bua kuikala mapia-mapia buabu, tudi bua kuandamuna makonka adibu nawu. Tudi mua kuleja dinanga dietu ne diambuluisha bua kudifila kuabu bua kulua kudi Kilisto.
Kukumbaja ku Ditaba Diabu
Tudi tutua mushinga ne tunemeka ditaba dia bakuabu, ne tudi tuteta kukumbaja ku ditabuija dikadibu nadi. Tshilejilu, mulunda udi mupeta busambi mu mifundu ya mu Bibiliya udi mua kupeta kabidi busambi mu malongesha atudi tutangalaja mu Mukanda wa Molomo.
Kuambuluisha Bidimba Bipia-bipia bia Ekelezia
Padi bantu babuela mu Ekelezia, tudi mua kubambuluisha bua kukolesha ditabuija diabu. Tudi bua kuikala balunda babu, tuandamuna ku nkonku yabu, ne tubambuluisha padibu bapeta mabikila. Tudi bua kubakankamika bua kutunguluka kulonda Yezu Kilisto ne kulonga pa bidi bitangila lumu luimpa luenda.
Kusadila mu Bukenji bua Diba Dionsu
Bua kukumbaja ku kutangalaja kua lumu luimpa mu matuku etu onsu a moyo, bidimba bia Ekelezia bidi bua kubikidibua bua kusadila bu bena bukenji ba diba dionsu. Bobu badilongolola, nsongalume idi mua kusadila kubangila pa bidimu 18. Nsongakaji ne bantu bakulumpa badi mua kusadila pabu. Udi mua kupeta ngumu ya bungi ku ChurchofJesusChrist.org/callings/missionary.
© 2023 by Intellectual Reserve, Inc. All rights reserved. Bipatula mu USA Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, July 2023. Language. 19045 760