Te mau niu o te ’evanelia

Fa’a’itera’a i te ’evanelia a Iesu Mesia

’Ia feruri ana’e tātou i te mau ha’amaita’ira’a tā tātou e fāri’i nō te mea e melo tātou nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e hina’aro tātou e fa’a’ite i te ’evanelia i te feiā tā tātou i here. E nehenehe tātou e fa’a’ite i tō tātou ’itera’a pāpū nō te parau mau nā roto i tā tātou mau parau ’e tō tātou hi’ora’a. E nehenehe tātou e pure nō te fāri’i i te fa’aurura’a ’ia ’ite ē, e fa’a’ite atu ia vai, ’e e aha te parau.

Here ia vetahi ’ē

Hō’ē tuha’a faufa’a roa nō te fa’a’itera’a i te ’evanelia ’o te herera’a ïa ia vetahi ’ē. ’Ia fa’a’ite ana’e tātou i tō tātou here ia vetahi ’ē nā roto i te mau ’ohipa mai tā Mesia te huru, tē fa’a’ite ra ïa tātou i te ’evanelia a Iesu Mesia—i te tahi taime ma te parau ’ore i te hō’ē parau. ’E ’ia ’ite ana’e vetahi ē, tē ha’apa’o mau nei tātou ia rātou, e nehenehe rātou e fa’aro’o maita’i a’e i tō tātou mau mana’o nō ni’a i te ’evanelia. (Hi’o Gary°E. Stevenson, « Here, fa’a’ite, ani manihini », Liahona, Mē 2022, 84–87.)

Fa’a’ite ma te ’ōhie ’e ma te au

E nehenehe tātou e fa’a’ite i te mea tā tātou here nō ni’a i te ’evanelia. ’Ia rave ana’e tātou i te reira i roto i tō tātou orara’a i te mau mahana ato’a, e’ita te reira e riro ’ei mea huru ’ē ri’i ’aore rā ’ei mea ha’amā. ’Ei hi’ora’a, e nehenehe tātou e paraparau i tō tātou ’utuāfare ’e i tō tātou mau hoa nō ni’a i te ’ohipa tā tātou e rave nei i te sābati. ’Aore rā e nehenehe tātou e fa’a’ite ia rātou i te ’oa’oa tā tātou e fāri’i nei ’ia tāvini ana’e tātou ia vetahi ’ē. (Hi’o Dieter F. Uchtdorf, « ’Ohipa misiōnare : Fa’a’itera’a i te mea i roto i tō ’outou ’ā’au », Liahona, Mē 2019, 15–18.)

Ani manihini ia vetahi ’ē ’ia ’āmui mai ia tātou

E nehenehe tātou e ani ia vetahi ’ē ’ia ha’api’i mau hau atu ā nō ni’a i te ’evanelia. ’Ei hi’ora’a, e nehenehe tātou e ani manihini ia rātou ’ia haere mai i te hō’ē purera’a ’aore rā i te hō’ē ’ātivite, ’ia tai’o i te Buka a Moromona, ’ia māta’ita’i i te hō’ē video a te ’Ēkālesia, ’aore rā ’ia fārerei i te mau misiōnare. E nehenehe teie mau ’ohipa i tupu e tauturu ia rātou ’ia fāri’i i te Vārua ’e ’ia hina’aro e ha’api’i rahi mai ā.

E ani nō ni’a i te ’ohipa i tupu nō rātou

I muri a’e i te haerera’a mai te mau hoa ’e te mau melo o te ’utuāfare i te purera’a, ’aore rā i te fāri’ira’a i te hō’ē ha’api’ira’a nā te mau misiōnare, e nehenehe tātou e ani ia rātou nō ni’a i te ’ohipa i tupu nō rātou. E nehenehe te tahi mau ha’api’ira’a o te ’evanelia e riro ’ei mea ’āpī nō rātou, nō reira e nehenehe tātou e pāhono i tā rātou mau uira’a. E nehenehe tātou e fa’a’ite i tō tātou here ’e tā tātou pāturura’a nō tā rātou mau tauto’ora’a, ’ia haere mai i te Mesia ra.

’A fa’arahi i tō rātou mau ti’aturira’a

Tē ha’afaufa’a nei ’e tē fa’atura nei tātou i te mau ti’aturira’a o vetahi ’ē, ’e e tāmata tātou i te fa’arahi ā i te fa’aro’o tei fāri’ihia e rātou. ’Ei hi’ora’a, te hō’ē hoa tei fāri’i i te tāmāhanahana i roto i te mau pāpa’ira’a mo’a o te Bibilia, e nehenehe ato’a e ’itehia iāna te tāmāhanahana i roto i te mau ha’api’ira’a tā tātou e fa’a’ite i roto i te Buka a Moromona.

Tauturu i te mau melo ’āpī o te ’Ēkālesia

’Ia tomo ana’e mai te ta’ata i roto i te ’Ēkālesia, e nehenehe tātou e tauturu i te ha’apūai i tō rātou fa’aro’o. E nehenehe tātou ’ia riro ’ei hoa nō rātou, ’ia pāhono i tā rātou mau uira’a, ’e ’ia pāturu ia rātou ’ia fāri’i ana’e rātou i te mau pi’ira’a. E nehenehe tātou e fa’aitoito ia rātou ’ia tāmau noa i te pe’e ia Iesu Mesia ’e ’ia ha’api’i mai nō ni’a i tāna ’evanelia.

Tāvini i te hō’ē misiōni rave tāmau

Ta’a ’ē atu i te fa’a’itera’a i te ’evanelia i roto i tō tātou orara’a i te mau mahana ato’a, e nehenehe te mau melo o te ’Ēkālesia e pi’ihia ’ia tāvini ’ei misiōnare rave tāmau. Mai te mea ’ua ineine rātou, e nehenehe te feiā ’āpī tamāroa e tāvini i te taime e ti’a ai tō rātou matahiti e 18. E nehenehe te feiā ’āpī tamāhine ’e te feiā pa’ari e tāvini ato’a. E ’itehia te mau ha’amāramaramara’a hau atu i ni’a ChurchofJesusChrist.org/callings/missionary.

Nō roto mai i te mau pāpa’ira’a mo’a

’Ua fa’aue Iesu Mesia i tāna mau pipi ’ia fa’a’ite i te ’evanelia i te mau ta’ata ato’a (hi’o Mareko 16:15).

Te feiā e pi’ihia ’ia tāvini, e ti’a ia rātou ’ia rave i te reira ma tō rātou « ’ā’au ato’a, te pūai , te mana’o ’e te itoito » (hi’o Te Ha’api’ira’a Tumu ’e te mau Fafaura’a 4).

E roa’a ia tātou te ’oa’oa rahi ’ia tauturu ana’e tātou i te ’āfa’i ia vetahi ’ē i te ’evanelia (hi’o Te Ha’api’ira’a Tumu ’e te mau Fafaura’a 18:15–16).

Mau rāve’a tauturu nā te natirara

« Nāhea e ti’a ai iā’u ’ia fa’a’ite i te Buka a Moromona i te hō’ē hoa°? » « Nāhea vau i te fa’atu’ati i tō’u hoa i te mau misiōnare°? » ’Ua pāhonohia teie mau uira’a ’e te tahi atu mau uira’a i ni’a ChurchofJesusChrist.org/share.

Tē vai ra i roto i te Vaira’a buka ’evanelia (i ni’a ChurchofJesusChrist.org ’aore rā ma te fa’a’ohipa i te fa’anahora’a ’āfa’ifa’i) te hō’ē ’āpapara’a rāve’a tauturu ’e tae noa atu i tō tātou mau ti’aturira’a tumu. Mā’iti « Fa’a’itera’a i te ’evanelia » nō te ha’api’i rahi mai ā nō ni’a i te mea e fa’a’ite ’e nāhea ’ia fa’a’ite.

Nō te ha’api’i rahi mai ā nō ni’a i te ha’apūaira’a i te mau melo ’āpī, ’a hi’o i roto i te Vaira’a buka ’evanelia i raro a’e « Te mau buka arata’i ’e te mau pi’ira’a » ’e i muri iho « Te mau pi’ira’a pāroita ’aore rā ’āma’a ».

Ha’api’i rahi mai ā

Mai te mea e uira’a tā ’outou nō ni’a i te fa’a’itera’a i te ’evanelia, e nehenehe ’outou e paraparau i tō ’outou mau taea’e ’aore rā mau tuahine aupuru, i tō ’outou feiā fa’atere nō te pāroita ’aore rā nō te ’āma’a, ’aore rā i te mau misiōnare.