Aupuru ma te aroha

E nehenehe tātou e fa’atupu i te hō’ē ta’a-’ē-ra’a rahi nā roto i te fa’a’itera’a i te here ma te rāve’a mātarohia.

Hō’ē hi’ora’a nō te aroha

E pipi ’o Tabita (tei parauhia ’o Doreka) nā Iesu Mesia tei ora i Iopa. ’Ua mātauhia ’oia ’ei vahine « e rahi [tāna] ’ohipa maita’i i rave ’e te hōro’a ho’i i te tao’a » (Te ’Ohipa 9:36). ’Ua herehia ’oia nō te mea e mau ’ohipa rahi tāna i rave nō te here ia vetahi ’ē. Mai te Fa’aora, ’ua tāvini ’oia i te roara’a o tōna orara’a. Tē vai ra tōna mau ’aravihi ’e te mau tārēni tāna i fa’a’ohipa nō te fa’atupu i te ta’a-’ē-ra’a.

Hō’ē o taua mau ’aravihi ra ’o te hāmanira’a ïa i te mau pereue ’e te mau ’ahu, te tahi o te reira ’ua fa’ata’ahia nō te mau vahine ’ivi nava’i ’ore. Nō te feia tei fāri’i i tāna mau hōro’a, ’ua riro ’oia ’ei maita’i. I te haerera’a mai Petero e hi’o iāna i muri a’e i tōna pohera’a, « ti’a noa mai ra te mau vahine ’ivi i pīha’i iho iāna ma te ’oto,’e te fa’a’itera’a mai i te mau ’ahu fafao ’e te ’ahu pu i hāmanihia e Doreka, iāna i pārahi ato’a rātou ra » (Te ’Ohipa 9:39). Nō tōna putapū rahi i fa’ati’a ai ’oia iāna mai te pohe mai, tei tūra’i e rave rahi ta’ata ’ia ti’aturi i te Fa’aora (Te ’Ohipa 9:40–42).

Aupuru ma te aroha

Te aroha o te here ïa o Iesu nō tātou ’e te here tāna e tīa’i nei ’ia roa’a ia tātou nō te tahi ’e te tahi. ’O te herera’a ïa i tō tātou ta’ata tupu mai ia tātou iho (hi’o Mataio 22:37–39), ma te hōro’a ia rātou i te hō’ē ā aroha, te fa’a’oroma’i ’e te aroha o tā tātou e hina’aro nō tātou iho (hi’o Mataio 7:12). ’O te tāvinira’a ïa ia rātou, mai ia Tabita, ma te fa’a’ohipa i te mau hōro’a ’e te mau tārēni tei hōro’ahia mai ia tātou.

E nehenehe tātou e fa’atupu i te hō’ē ta’a-’ē-ra’a rahi nā roto i te fa’a’itera’a i tō tātou here nā roto i te mau rāve’a mātarohia nō tātou—noa atu e mea ’ōhie te ’ohipa tā tātou e rave. Mai te mea e mea ’aravihi ’outou i te ’ohipa nira ’ahu, e nehenehe te reira e riro ’ei rāve’a nō te aupuru, terā rā, e mea maita’i a’e paha ’outou nō te fa’atere i te hō’ē mātini tāpū ’aihere i te hō’ē mātini nira ’ahu. ’Aore rā penei a’e tō outou hōro’a ’o te ’itera’a nāhea ’ia fa’aro’o mau ’e ’ia pārahi i reira ’ei hoa mau.

Fa’ananeara’a i te aroha

Nāhea e ti’a ai ia tātou ’ia fa’ananea i te huru Mesia o te aroha ?

Te aroha o te hō’ē ïa hōro’a tā te Metua i te ao ra e hōro’a i te ta’ata ato’a e pe’e mau ia Iesu Mesia. « E pure atu i te Metua ma te pūai hope o te ’ā’au ’ia ’ī ’outou i teie nei aroha ».(Moroni 7:48).
’Ua ha’api’i mai Moromona i te aura’a o te aroha°: « E fa’a’oroma’ira’a roa tō te aroha, ’e te hāmani maita’i, e ’ore te aroha e fe’i’i, e ’ore te aroha e fa’arahi, e’ita e ’imi i te maita’i nōna iho, e’ita e riri vave, e’ita e mana’o ’ino ia vetahi ’ē, e’ita e ’oa’oa i te parauti’a ’ore ; e ’oa’oa rā i te parau mau, e fa’a’oroma’i i te mau mea ato’a ra, e fa’aro’o i te mau mea ato’a ra, e tīa’i i te mau mea ato’a ra, e ha’amāhu i te mau mea ato’a ra » (Moroni 7:45). E ’ere teie i te mau rāve’a noa nō te fa’a’ite a hea ’outou e ’ī ai i te here°; e mau huru ato’a ra te reira ’o tē tauturu i te hō’ē ’aravihi rahi a’e ’ia here, ’a fa’ananea ai tātou i te reira.
E pe’e te aumihi i te aumāuiui.¹ ’A ’imi ai tātou ’ia māramarama ia vetahi ’ē, tē hōro’a ra ïa tātou i te aroha i te hō’ē rāve’a rahi a’e nō te tupu i te rahi. ’A ha’api’ipi’i ia ’outou ’ia ui i te mau uira’a nā roto i te hō’ē rāve’a tauturu ’e te here, ’e i muri iho, ’a fa’aro’o ma te fa’a’oroma’i ’e te hāro’aro’a.
’A ha’api’ipi’i ia ’outou i te aroha. ’A hōro’a i tō ’outou taime ’e i te tahi mau rāve’a tauturu, tae noa atu i tā ’outou fa’a’orera’a hapa, i te feiā e hina’aro i te reira. ’Ua ha’api’i te peresideni Thomas°S. Monson (1927–2018)°: « ’Ia haere ’āpīpiti te fa’a’orera’a hara ma te here e ti’a ai […] E vai mātara noa te mau puta o te parau fa’ahapa. Te fa’a’orera’a hapa ana’e tē fa’aora ».²