“Xya Hnub uas Qhia txoj Moo Zoo,” Ntxiv Dag Zog rau cov Tub Hluas Ntxhais Hluas, Xya Hli Ntuj 2023.
Zaj Lus hauv phau Ntxiv Dag Zog rau cov Tub Hluas Ntxhais Hluas Txhua Hli, Xya Hli Ntuj 2023
Xya Hnub uas Qhia txoj Moo Zoo
Koj qhia tau txoj moo zoo los ntawm tej txoj kev uas tsis txawv thiab yooj yim hais. Koj puas muaj cuab kav ua li no?
Thaum peb sib tham txog kev hais peb zaj lus tim khawv, ntau zaus peb ua tim khawv hauv kev sib ntsib txais lub cim nco txog los sis lwm txoj kev sib ntsib. Tiam sis cov thawj coj tau yaum kom peb “nrhiav cib fim kom qhia txog nej txoj kev ntseeg thaum nej tham nrog tib neeg los ntawm tej txoj kev uas tsis txawv thiab yooj yim hais.”1
Nyob hauv kev siv zog rau xya hnub nram qab no, koj yuav ua tej yam sib txawv hais tau koj zaj lus tim khawv txhua hnub rau ib lub lim tiam. Koj ua tau tej no pib ntawm qhov twg los tau, los sis koj tawm tswv yim tshiab ntawm koj tus kheej los tau thiab! Koj puas muaj cuab kav ua li no?
Cov duab los ntawm Emily Davis
Hnub 1: Lub Tsev Koom Txoos
Xav seb puas ua tim khawv hauv kev sib ntsib yoo mov thiab hais lus tim khawv nyob hauv lub tsev koom txoos yog tias koj txaus siab ua li ntawd. Yog tsis ua li ntawd, tej zaum koj yuav xav ua tim khawv hauv lub tsev koom txoos thaum koj koom tej chav kawm hnub Sunday thiab nyob hauv seminary. Tej lus uas koj hais ntawd muaj peev xwm txhawb nqa lwm tus thiab txhawb nqa lawv zaj lus tim khawv ib yam li yuav txhawb nqa koj li.
Hnub 2: Cov Phooj Ywg
Koj tau kawm dab tsi hauv lub tsev koom txoos thaum hnub Sunday? Koj puas tau nyiam tej yam uas ib tug neeg hais nyob hauv nws zaj lus hauv kev sib ntsib txais lub cim nco txog los sis nyob hauv koj chav kawm txoj kev sib tham? Tej zaum zaj nkauj qhib yog ib zaj nkauj qhuas Vajtswv uas koj nyiam tshaj. Qhia ib tug phooj ywg txog qhov ntawd! Ces nug lawv seb lawv ua dab tsi thaum hnub Saturday thiab Sunday ib yam thiab.
Hnub 3: Sib Tham hauv Internet
Kev sib tham hauv internet yog ib qho chaw zoo kom qhia txog tej yam ntawm sab ntsuj plig uas tsis txawv thiab yooj yim hais. Hnub no rau txoj kev siv zog no, cia li xav seb puas sau ib nqe txog:
-
Ib nqe vaj lug kub uas koj nyiam heev.
-
Ib nqe lus uas txhawb yus lub siab los ntawm lub tuam rooj sab laj.
-
Ib txoj kev xav los sis ib yam dhau los ntawm sab ntsuj plig.
-
Ib yam uas koj nyiam los sis ua Vajtswv tsaug txog tus Cawm Seej.
-
Ib txoj kev Nws tau pab koj tsis ntev tas los los sis ib yam uas koj nyiam txog Nws thiab vim li cas.
Hnub 4: Ntaus Ntawv Los Xa Vidi-aus
Xa ib zaj lus txhawb nqa ib tug phooj ywg los ntawm kev ntaus ntawv los sis vidi-aus. Tej zaum koj yuav xav xa ib zaj lus los ntawm lub rooj sab laj uas koj xav tias lawv yuav nyiam, qhia lawv ib yam uas koj nyiam txog lawv, los sis qhia txog koj txoj kev ntseeg Yexus Khetos. Piv txwv hais tias, tej zaum lawv yuav xav paub txog Leej Txiv Saum Ntuj Ceeb Tsheej txoj kev hlub lawv. Koj yeej qhia tau lawv tim ntsej tim muag thiab!
Hnub 5: Kev Pab Lwm Tus
Tej zaum koj yuav xav paub seb vim li cas kev pab lwm tus yog ib txoj kev hais koj zaj lus tim khawv. Tus Thwj Tim Povlauj tau qhia Timautes tias, “Ua koj lub neej rau cov ntseeg xyaum, tsis hais tej lus uas koj hais, tej hauj lwm uas koj ua, hlub lwm tus, muab siab rau ntseeg thiab ua neeg zoo” (1 Timautes 4:12). Yog li ntawd koj qhia tau koj txoj kev ntseeg dhau los ntawm koj tus yam ntxwv, thaum koj pab lwm tus ib yam li tus Cawm Seej yuav pab lawv.
Hnub 6: Tej Txuj Ci Kos Duab thiab Ntaus Nkauj
Tej lub sij hawm tib neeg siv tej txuj ci kos duab ntaus nkauj kom qhia tias lawv xav li cas thiab muaj dab tsi hauv lawv lub siab. Koj siv tau txoj kev kos duab, khoom puab, paj lus, cov nkauj, los sis lwm yam txuj ci kom qhia tias koj xav li cas txog Yexus Khetos thiab Nws txoj moo zoo.
Hnub 7: Kev Lam Sib Tham
Tsis txhob ntshai kom qhia tias koj ntseeg dab tsi thaum koj lam sib tham nrog lwm tus, ib yam li koj yuav qhia txog lwm yam kev xav txog ib yam ntsiab lus dab tsi.
Koj kuj hais tau txog tej yam ntxim saib ntxim ua hauv lub Koom Txoos los sis ib nqe vaj lug kub uas koj twb nyeem tsis ntev tas los, tiam sis koj hais tau txog lwm yam uas tsis tseem ceeb npaum li cas ntawd thiab. Piv txwv hais tias:
-
Yog tias koj nyiam saib toj roob hauv pes, cia li qhia tias koj ua Vajtswv tsaug rau tej yam uas Nws tau tsim rau lwm tus.
-
Tej zaum koj twb hnov tus ntsuj plig tsis ntev tas los. Qhia ib tug phooj ywg txog lub sij hawm ntawd yog tias tsis yog ib yam uas koj khaws rau koj tus kheej xwb.
-
Nrhiav tej lus piv txwv txog txoj moo zoo nyob hauv ib phau ntawv los sis movie, thiab qhia txog koj tej lub tswv yim.
Tsis Txawv thiab Yooj Yim Hais
Thaum koj nrhiav tau tej kev txawv kom qhia txog koj txoj kev ntseeg, ces yeej yuav haj yam yooj yim rau koj hais. Tej zaum koj yuav tsis txaus siab ua thaum xub thawj, tiam sis tsis ua li cas! Nco ntsoov tias, koj zaj lus tim khawv yeej yog ib yam uas tsis txawv rau koj—yog ib feem ntawm koj tus kheej. Kev ua tim khawv yeej yuav tsis txawv thiab. Koj yuav tsum hais me ntsis ntxiv txhua hnub.
Koj yuav ua li cas kom hais koj zaj lus tim khawv hnub no?
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, July 2023. Language. 19045 295