« Te mau fa’aurura’a i roto i te hiero », Liahona, Tiurai 2023.

Te mau fa’aurura’a i roto i te hiero

Nā Norman Hill

Te fare o te Fatu e vāhi ïa nō te heheura’a. Pinepine noa atu tātou i te haere i te hiero, rahi noa ato’a atu tātou i te fāri’i i te heheura’a.

E ’ere te fare o te Fatu i te hō’ē fare mo’a noa i reira tātou e rave ai i te mau ’ōro’a nō te fa’aorara’a, e vāhi ato’a rā nō te heheura’a, i reira te mau fa’aurura’a rahi ’e te na’ina’i e tupu ai, i reira te mau puta i ni’a i tō tātou vairua e nehenehe ai e fa’aorahia, ’e i reira te Fatu e nehenehe ai e ha’aputapū i tō tātou ’ā’au nā roto i te mau rāve’a mana’o-’ore-hia.

E mana’o ta’a ’ē

I tō’u tāvinira’a ’ei rave ’ohipa nō te mau ’ōro’a i roto i te hiero nō Houston (Texas, Marite), ’ua tīpu’u te hō’ē pupu horo mōtō i roto i te vāhi tāpe’ara’a pere’o’o, ’e ’ua ani mai e nehenehe ānei rātou e tomo i roto i te hiero. ’Ua fa’ata’a te peresideni hiero, ’o Richard Sutton, i te pupu i te ’ōpuara’a o te hiero ’e te tītaura’a nō te hō’ē parau fa’ati’a nō te hiero nō te tomo i roto i te fare. ’Ua fa’aro’o maita’i te ta’ata arata’i ’e tōna hoa.

’Ua parau ’oia : « E mana’o ta’a ’ē tei puta mai ’a haere mai ai mātou nā pīha’i iho i terā fare ». « E’ita tā’u e nehenehe e fa’ata’a atu, terā rā, ’ua tae mai te hō’ē mana’o ta’a ’ē, i hina’aro ai au ’ia ’ite mai e aha tei fa’atupu i te reira ».

’Ua hina’aro nā ta’ata fa’aipoipo e ’ite rahi atu ā, nō reira, ’ua fa’anaho te peresideni Sutton i te fārereira’a ’e te mau misiōnare.

Hau atu i te hō’ē matahiti ’e te ’āfa i muri mai, ’ua pātōtōhia i ni’a i tōna ’ūputa nō te piha tōro’a o te peresideni Sutton, i roto i te hiero. « ’Aita ’oe e ’ite iā’u, terā rā, i’ō nei vau nā mua a’e ’e te tahi mau hoa nā ni’a i tō mātou mōtō. I terā rā tau, e mea nā rāpae noa vau ’ia hi’o mai i teie fare ». Ma te fa’a’ite i te hō’ē parau fa’ati’a nō te hiero, ’ua nā ’ō fa’ahou ’oia : « I teie mahana e ti’a iā’u ’ia hi’o nā roto ».

Te piti o te reo

I te taime ’a pi’ihia ai ’o Dean ’e ’o Bonnie Hill ’ia tāvini ’ei misiōnare ta’ata pa’ari i roto i te hiero nō Cochabamba (Pōrīvia), ’ua taiā roa ’o Bonnie. ’Aita roa atu ’oia i ha’api’i i te reo pāniora ’e ’aita ’oia i pāpū roa nō ni’a i tōna ’aravihi nō te rave i te mau ’ōro’a e tītauhia, ’aore rā nō te paraparau ia vetahi ’ē nā roto i te hō’ē reo mātau ’ore. ’Ua fafau mai te hō’ē ha’amaita’ira’a autahu’ara’a iāna ē, e ti’a iāna ’ia paraparau nā roto i te reo pāniora, i tōna vaha ’e i te pae vārua.

’Ua parau ’oia : « E’ita tā’u e nehenehe e parau rahi i te reo pāniora i rāpae i te hiero ». « I roto rā i te fare o te Fatu, e au ra e mea ’ōhie nō’u ’ia parau ».

I tōna ho’ira’a ’e tāna tāne fa’aipoipo i te fare, ’e ’ua haere i te mau ’ōro’a reo pāniora i roto i te hiero nō Ogden (Utah, Marite), ’ua parau te mau ta’ata e mea nehenehe roa tōna ta’ira’a reo.

Rave i te hō’ē ’ohipa nō te ’ite i te ’oa’oa

Tē parau nei te peresideni Russell M. Nelson : « E nehenehe tātou e fa’auruhia i te roara’a o te mahana nō ni’a i te mau ’itera’a nō te hiero ’ē nō te ’ā’amu ’utuāfare tei fāri’ihia e vetahi ’ē. Terā rā, tītauhia ia tātou ’ia rave i te hō’ē mea nō te fāri’i tātou iho i te ’oa’oa ».¹

Tē tīa’i mai nei te ’oa’oa ’e te fa’aurura’a ’e te mau muhumuhu ’e te mau ha’apāpūra’a ia tātou i roto i te hiero. Tē vai nei te hō’ē reo nō te ra’i tei parauhia ’e tei māramaramahia i reira, ’e ’aita e vai ra i te tahi atu vāhi i ni’a i te fenua nei. E fāri’i tātou i te heheura’a tā te Fatu e hina’aro e hōro’a mai ia tātou i roto i te hiero, ’eiaha noa nō mea tē haere nei tātou i te hiero, ’ia haere rā tātou i reira ma te ti’aturi e fāri’i i te heheura’a. Teie te tahi mau hi’ora’a nō te fa’aurura’a tei fāri’ihia :

’Ua imi Martin Goury nō te fenua ’Īvori i te arata’ira’a i roto i te hiero, nō te hō’ē uira’a faufa’a rahi ’e ’ua noa’a iāna te hō’ē ha’apāpūra’a fa’ahiahia ē ’ua pāhono-a’ena-hia tāna mau pure nō ni’a i te reira. Teie te parau tumu tā te Fatu i ha’api’i ia Oliver Cowdery : « ’A feruri ïa tō ’oe mana’o i te pō tā ’oe i ti’aoro mai iā’u i roto i tō ’oe na ’ā’au […] ’Aita ānei au i parau i te parau hau i tō ’oe na ’ā’au nō ni’a i teie nei ’ohipa ? » (Te Ha’api’ira’a Tumu ’e te mau Fafaura’a 6:22, 23).
Tē ora nei Randy Bronson i pīha’i iho i te hiero nō Payson (Utah, Marite) ’e ’ua rave maoro ’oia i te ’ohipa mā’imira’a ’ā’amu ’utuāfare. « E tamaiti paruparu rā tā’u ’e ’aita vau i pāpū ē, e aha tā’u e nehenehe e rave nōna. Nō reira ’aita vau e tu’u noa i tōna i’oa i ni’a i te mau tāpura i’oa nō te pure, tē pure tu’utu’u ’ore ato’a nei rā vau i roto i te hiero, ma te tāmata i te ’imi e aha tā’u e nehenehe e rave nōna. E mana’o tā’u i fāri’i nō ni’a i te mea tā’u e nehenehe e parau ’e te mea e rave nōna ».
« E metua vāhine maita’i ’oe », te parau ïa a Stephanie Fackrell Hill i te hō’ē ta’ata tāna i ’ore i mātau, i roto i te hiero nō Logan (Utah, Marite). ’Ua ui māere teie metua vāhine ’āpī : « Nāhea ’oe e ’ite ai ? ». Nā ’ō mai ra te tuahine Hill ē : « ’Ua ’ite au i te pēni o tā ’oe mau tamari’i i ni’a i tō ’oe nā rima ’e nō reira, ’ua fa’auruhia vau e te Vārua nō te parau ia ’oe ». I ’imi na ho’i teie metua vāhine ’āpī i te huna i tōna nā rima. Ma te hau, ’ua mana’o a’era ’oia ē e mea fāri’i-maita’i-hia ’oia i teie vāhi, ’aita e hi’o-’ē-ra’a.

E vāhi te hiero ’eiaha nō te tauturu noa i te fa’aorara’a i tō tātou mau tupuna, nō te fāri’i ato’a rā i te huru heheura’a e nehenehe e arata’i ia tātou ’e ia vetahi ’ē i ni’a i te ’ē’a nō te fafaura’a. ’Ua parau mai te peresideni Nelson : « Tītauhia nō tātou tāta’itahi te ha’apūaira’a pae vārua tāmau ’e te ha’api’ira’a tāmau e noa’a i roto noa i te fare o te Fatu ».² Tē ha’api’i mai nei teie mau muhumuhu ’e teie mau mana’o e tae mai i roto i tōna fare mo’a, ’ia hi’o mai tā Iesu e hi’o nei, ’ia fa’aro’o mai tāna e fa’aro’o ra, ’e ’ia ora mai tāna i ora.

Tē ora nei te ta’ata pāpa’i i Utaha, Marite.