“Kev Vam Tau Yus tus Kheej Ua rau Peb Muaj Zog Ntxiv,” Liyahaunas, Yim Hli Ntuj 2023.
Zaj Lus hauv Liyahaunas Txhua Hli, Yim Hli Ntuj 2023
Kev Vam Tau Yus tus Kheej Ua rau Peb Muaj Zog Ntxiv
Qhov uas peb vam tau peb tus kheej txhais tias peb saib xyuas peb thiab peb tsev neeg peb tus kheej. Thaum peb vam tau peb tus kheej, peb haj yam muaj peev xwm ua hauj lwm rau tus Tswv thiab pab lwm tus. Tiam sis kev vam tau yus tus kheej tsis txhais tias peb kov yeej peb tej teeb meem peb tus kheej xwb. Peb thov kom phooj ywg, tsev neeg, pawg ntseeg los yog ceg ntseeg cov mej zeej, thiab cov kws muaj txuj ci thaum twg los tau.
Tej lub Ntsiab Cai txog Kev Vam Tau Yus tus Kheej
Yuav tsum kawm, mloog lus, thiab khwv ua hauj lwm kom hloov los vam tau yus tus kheej. Peb ua zoo npaum li peb ua taus kom tu peb tus kheej, thiab peb thov lwm tus los pab thaum xav tau. Tiam sis, yog peb yuav vam tau peb tus kheej tiag, peb kuj yuav tsum kawm kom ntseeg Yexus Khetos thiab. Ces thaum peb ua hauj lwm kom pab peb tus kheej, Nws yuav ntxiv dag zog rau peb.
Kev Vam Tau Yus tus Kheej ntawm Sab Ntsuj Plig
Peb yuav vam tau peb tus kheej ntawm sab ntsuj plig ntxiv thaum peb zaj lus tim khawv txog Yexus Khetos muaj zog. Peb ua li no thaum peb thov Vajtswv, kawm cov vaj lug kub, koom lub koom txoos, ua raws li cov lus txib, thiab ua lwm yam uas pab peb nyob ze dua Yexus Khetos. Yog peb paub tias Nws txaus siab pab peb ces peb yuav muaj kev ntseeg kom nyob ruaj nrees txawm yog lub neej no nyuaj heev los yog.
Kev Vam Tau Yus tus Kheej ntawm Sab Cev Nqaij Daim Tawv
Kev vam tau yus tus kheej ntawm sab cev nqaij daim tawv yog kev saib xyuas kom peb tus kheej thiab peb tsev neeg muaj tej yam rau peb lub cev nyob taus. Muaj tej yam xws li zaub mov, tsev nyob, kev noj qab nyob zoo, thiab lwm yam. Peb ua li no thaum peb kawm ntawv, kawm tej txuj ci tshiab los yog kawm ua zoo dua, khwv ua hauj lwm, siv sij hawm raws li kev muaj tswv yim, thiab siv peb cov nyiaj zoo.
Kev Vam Tau Yus tus Kheej ntawm Sab Siab Ntsws
Kev vam tau yus tus kheej ntawm sab siab ntsws yog kev txawj ua siab loj thiab muaj kev ntseeg thaum raug tej kev nyuaj siab txhawj xeeb. Peb txhua tus muaj teeb meem thiab tej yam uas tab kaum peb. Zoo siab uas txoj moo zoo qhia kom peb paub xaiv yuav ua li cas thaum peb raug tej no. Yog peb ntseeg tus Tswv thaum peb raug tej xwm txheej nyuaj ces tus Tswv yuav txhawb nqa peb kom muaj kev cia siab tiv taus lwm yam uas nyuaj.
Kev Kawm Ntawv
Peb yuav tsum kawm txhua lub sij hawm. Vajtswv xav kom peb muaj kev txawj ntse thiab muaj tej txuj ci ntxiv nyob hauv lub neej no thiab nyob hauv lub neej tom ntej. Yog peb kawm ntxiv, ces peb yuav muaj lub hwj huam ua zoo ntxiv, thiab muaj txaus noj txaus haus rau peb tus kheej, peb tsev neeg, thiab cov uas xav tau kev pab.
Cov Koob Hmoov ntawm Kev Vam Tau Yus tus Kheej
Cov yaj saub tau qhia tias thaum peb haj yam vam tau peb tus kheej, peb yuav tau koob hmoov muaj kev cia siab thiab kev kaj siab lug ntxiv. Peb yuav txawj pab peb tsev neeg thiab lwm tus uas xav tau kev pab. Thiab peb yuav tau koob hmoov muaj cib fim ntxiv thiab muaj peev xwm vam meej mus ntxiv.
Lub Koom Txoos tej Yam uas Pab Tau
Tej zaum koj ceg txheem ntseeg muaj tej pawg sib tham txog kev vam tau yus tus kheej. Tej pawg no yuav pab qhia koj txog tej lub ntsiab cai ntawm kev vam tau yus tus kheej thiab tej txuj ci xws li tswj hwm cov nyiaj los yog kev nrhiav ib txoj hauj lwm zoo dua. Koj nrhiav tau lwm yam uas pab tau hauv Txoj Moo Zoo cov Ntawv. Xaiv “Tej Phau Ntawv thiab Zaj Lus Qhia” ces “Kev Vam Tau Yus tus Kheej.”
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, August 2023. Language. 19046 295