Aupurura’a ma te fa’a’oroma’i

E nehenehe tā tātou e fa’ananea i te ’aravihi ’ia fa’a’oroma’i rahi atu ā, i roto i te orara’a ’e i roto i te tāvinira’a ia vetahi ’ē.

I roto te 2 Korinetia12:7–8, tē fa’ati’a nei Paulo i tōna purera’a e toru taime ’ia tātarahia « hōē tara i roto i te tino ». ’Aita rā tāna pure i pāhonohia nā roto i te tītaura’a tei fa’a’orehia. ’Ua parau rā te Fatu iāna, « tō’u nei maita’i ’ātire ïa tā ’oe ». ’Ua fa’a’ite Paulo i te fa’a’oroma’i ’e te fa’aro’o i roto i tāna pāhonora’a : « E teie nei, e mea ’oa’oa ïa iā’u te ’ārue i tō’u paruparu, ’ia vai maīte te pūai o te Mesia i ni’a iā’u nei » (’īrava 9).

’Ua ha’api’i ato’a te Fatu ia Moroni ē, nā roto i te aroha o Iesu Mesia, e ti’a ia tātou ’ia ha’api’i mai ’e ’ia tupu i te rahi ma te pūai : « ’Ia haere mai te ta’ata iā’u nei, e fa’a’ite atu vau ia rātou i tō rātou paruparu. Tē hōro’a nei au i te paruparu i te ta’ata nei ’ia tupu tō rātou ha’eha’a ; ’e e nava’i ho’i tō’u maita’i nō te feiā ato’a i fa’aha’eha’a ia rātou iho i mua iā’u nei ’e ’ia vai ho’i tō rātou fa’aro’o iā’u nei, ’ei reira vau e fa’ariro ai i te mau mea paruparu ’ei mea pūai nō rātou » (Etera 12:27.

Aupurura’a ma te fa’a’oroma’i

Mai ia Paulo, ’ua pure te rahira’a o tātou ’ia tāmarūhia e rave rahi taime i roto i tō tātou orara’a—i te tahi taime hau atu i te toru taime. I te tahi taime ’o te taime tano ïa nō taua ha’amaita’ira’a ra ’ia hōro’ahia mai, ’e i te tahi atu mau taime, mai ia Paulo, e ha’api’ihia ’e e ha’apūaihia tātou. I te reira mau taime, e nehenehe tātou e ha’api’i mai i te fa’a’oroma’i ’e e ha’api’i mai ia tīa’i i te taime i fa’ata’ahia e te Fatu.

E hina’aro tātou i te huru Mesia ’o te fa’a’oroma’i ’a aupuru ato’a ai tātou. E nehenehe tātou e aupuru i te mau ta’ata e rave rau tāmatara’a tō rātou ’e e te fāito rau o tō rātou hāro’aro’ara’a i te ’evanelia, ’e e tītauhia te fa’a’oroma’i ’e te here nō te aupuru i te mau ta’ata ’aita rātou e fāri’i nei.

Hōho’a nā Getty Images

Fa’arahira’a i te fa’a’oroma’i

’A ha’api’i mai ai tātou ’ia ha’amātau i te Fa’aora, e ’ite maita’i a’e tātou i te ’ohipa tāna e rave nō te aupuru mai iāna. Nāhea tātou i te fa’arahi i te fa’a’oroma’i mai te huru Mesia ?

’Ia ’ite ’outou ē, ’ua rahi roa te orara’a tāhuti nei i te mau tupura’a ’o te tāmata nei i tō tātou fa’a’oroma’i, ’e e tupu mai iho ā te ’ino’ino i te tahi taime. ’A ha’amana’o ma te fa’a’ohipara’a ’e te fa’aro’o i te Fatu, e nehenehe tātou e ha’amaita’i i tō tātou huru i roto i te mau taime fifi. ’A fa’a’oroma’i ’e tā ’outou mau tauto’ora’a ’ia fa’a’oroma’i atu ā !
’A ani i te Atua i te tauturu ’ia ’ite ana’e ’outou, tē tāfifi ra ’outou ’ia fa’a’oroma’i. E nehenehe te hō’ē hutira’a aho hōhonuo ’e te hō’ē pure e tauturu i te hōpoi mai i te marū ’e te hau.
’A fa’aro’o i te pehe pae vārua fa’auru o te hōpoi mai i te hō’ē huru hau, ’o te tauturu ia ’outou ’ia upo’oti’a i ni’a i te mau mana’o fa’a’oroma’i ’ore.
’A ’ite mai i te taime tei fa’ata’ahia e te Fatu i roto i tō ’outou orara’a. E ti’a i tō tātou mau hina’aro ’e te mau hia’ai ’ia fa’atanohia i ni’a i tāna tārena.
Te fāri’ira’a i te fa’a’oroma’i ’o te hō’ē ïa huru ferurira’a. ’A ha’amana’o ē, e mea varavara te mana’o rū ’aore rā te vai-tāmau-ra’a i roto huru rūra’a i te ha’amaita’i i tō tātou orara’a.

Mau mana’o nō te aupurura’a ma te fa’a’oroma’i

I te tahi taime, tā tātou ’ohipa nō te aupurura’a ’o te tauturura’a ïa ia vetahi ’ē ’ia roa’a te fa’a’oroma’i i roto i te mau tāmatara’a. Teie te tahi mau rāve’a e nehenehe ai tātou e tauturu :

’A fa’a’ite i te ta’ata ’aore rā i te ’utuāfare ē, ’ua here tātou iāna ’e tē ha’ape’ape’a nei tātou nōna, noa atu ē tē mana’o ra ’oia, nō te mau tumu ta’a ’ē, e ’ere ’oia i te mea marū.
’A fa’a’ite ia rātou i te mau ’ohipa i tupu, ’a tītau ai ’outou i te ha’api’i mai i te fa’a’oroma’i, ’e ’ua ’ite maita’i ’outou e me fifi mau te reira. E tauturu ia rātou ’ia ’ite ē, ’aita rātou i vai ’ōtahi noa mai te mea e tupu mai te fa’a’oroma’i ’ore ’e te ’ino’ino i roto ia rātou.
’A pure ’ia roa’a ia rātou te fa’a’oroma’i i roto i te mau tāmatara’a fifi ’e ’a fa’a’ite ia rātou ē, e fa’aro’o mai te Metua i te ao ra i tā rātou mau pure ’ia ti’a ia rātou ’ia ’ite i roto ia rātou taua pūai ra.
’Ia riro ’outou ’ei tari’a fa’aro’o ’ia hina’aro ana’e rātou i te hō’ē ta’ata nō te paraparau. Te fāri’ira’a i te hō’ē hoa hāro’aro’a ’o te hō’ē ïa o te mau rāve’a maita’i roa a’e nō te fa’a’oroma’i i te hō’ē tāmatara’a ’aore te hō’ē tupura’a teimaha.