Zaj Lus hauv Liyahaunas Txhua Hli, Cuaj Hlis Ntuj 2023

Kev Pab cov Neeg uas Xav Tau

Yexus kho neeg mob

Nws Kho Neeg Coob cov uas Nyias Raug Nyias Mob, los ntawm J. Kirk Richards, tsis pub luam

Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb ua raws li tus Tswv qhia kom peb pab cov neeg uas xav tau. Peb hlub lwm tus thaum peb saib xyuas lawv, pab lawv vam tau lawv tus kheej, thiab faib tej yam uas peb muaj rau lawv.

Yexus Khetos tus Yam Ntxwv

Yexus Khetos hlub, thov Vajtswv, thiab nplij cov neeg uas nyob ze Nws. Nws “mus thoob plaws qhov txhia qhov chaw thiab ua hauj lwm zoo” (Tes Hauj Lwm 10:38). Peb coj raws li Nws tus yam ntxwv thaum peb hlub, nplij, pab, thiab thov Vajtswv rau cov uas nyob ze peb. Peb yuav tau nrhiav kev kom pab lwm tus txhua lub sij hawm.

ob tug neeg taug kev

Kev Txhawb Pab

Lo lus txhawb pab nyob hauv cov vaj lug kub thiab nyob hauv tus Tswv lub Koom Txoos piav tias peb ib leeg pab ib leeg li cas. Cov uas tuav lub pov thawj hwj txais kev txib ua cov kwv tij uas txhawb pab rau tib neeg los yog tej tsev neeg nyob hauv ib pawg ntseeg los sis ceg ntseeg. Cov viv ncaus uas txhawb pab txais kev txib pab txhua tus poj niam. Cov kwv tij thiab cov viv ncaus uas txhawb pab ua tib zoo saib xyuas thiab nco txog txhua tus mej zeej hauv lub Koom Txoos.

tib neeg cog tej yub

Kev Pab Lwm Tus Vam Tau Lawv Tus Kheej

Peb pab tau lwm tus hauv peb tsev neeg thiab cov phooj ywg vam tau lawv tus kheej thaum peb yaum lawv kom nrhiav tej kev kho tau lawv tej teeeb meem uas kav ntev. Ces peb muaj peev xwm txhawb nqa lawv thaum lawv ua raws li lawv tej lub hom phiaj. Kawm ntxiv txog kev vam tau yus tus kheej nyob hauv Yim Hli Ntuj 2023 phau Liyahaunas Txoj Moo Zoo tej Ntsiab Cai zaj lus.

Kev Pab Lwm Tus

Muaj ntau yam uas peb ua tau kom pab lwm tus nyob ib puag ncig peb thiab pab tej yam uas lawv xav tau ntawm sab cev nqaij daim tawv, sab ntsuj plig, thiab sab siab ntsws. Kev kawm txog lwm tus yuav pab peb paub tias peb yuav ua li cas kom pab lawv zoo dua. Peb kuj thov Vajtswv kom coj peb txoj hau kev kom paub tias peb yuav ua li cas kom pab lawv.

cov neeg muab cov txiv sau los ua ke

Faib tej Yam uas Peb Muaj

Peb pab lwm tus thaum peb faib tej yam uas Vajtswv tau foom pub rau peb. Piv txwv hais tias, peb pub nyiaj yoo mov ntau los yog pub nyiaj dawb rau lub Koom Txoos Pob Nyiaj Pab Neeg Txom Nyem. Peb kuj pab tau hauv peb zej zog thiab thaum ua peb txoj kev hu nyob hauv lub Koom Txoos.

Lub Koom Txoos cov Thawj Coj tej Dej Num

Tus npisov saib xyuas kev tu cov neeg uas xav tau kev pab hauv nws pawg ntseeg. Nws siv tau cov nyiaj yoo mov kom pab cov mej zeej uas xav tau kev pab. Lwm tus thawj coj, tsis hais nws ob tug pab cuam thiab Koom Haum Niam Tsev thiab pawg txwj laug pawg thawj tswj hwm, pab tau cov mej zeej nrhiav tej yam uas lawv siv tau kom pab tej yam uas lawv xav tau.

Lub Koom Txoos tej Kev Pab Neeg Txom Nyem

Lub Koom Txoos pab tib neeg nyob thoob plaws lub ntiaj teb thaum raug xwm txheej ceev, ua tej yam hauv zej zog, thiab ua lwm yam lub txheej xwm xws li txoj kev ua kom dej huv thiab kev txhaj tshuaj. Yog xav kawm ntxiv, saib Dallin H. Oaks, “Pab cov Txom Nyem thiab cov Nyuaj Siab,” Liyahaunas, Kaum Ib Hlis Ntuj 2022, 6–8.

Los ntawm cov Vaj Lug Kub

“Vajtswv hlub tus uas ua siab dawb pub rau lwm tus” (2 Kauleethaus 9:7).

Peb qhia peb cov me nyuam kom pab cov neeg uas xav tau (saib Mauxiyas 4:15–16).

Peb nplij lwm tus lub siab thiab pab lawv ris lawv tej nra (saib Mauxiyas 18:8–9).

Cov Lus Zoo Nco Ntsoov

Txoj kev hu: ib txoj kev lav ris ua hauj lwm pab hauv lub Koom Txoos. Lub Koom Txoos cov thawj coj nrhiav kev tshoov siab kom paub tias tus Tswv xav kom lawv hu leej twg.

Nyiaj yoo mov: cov nyiaj uas peb pub dawb rau lub Koom Txoos thaum peb yoo mov, npaum li peb yuav siv yog tias peb yuav khoom noj rau tej pluas mov uas tsis tau noj thaum yoo mov.

Vam tau yus tus kheej: yog kev saib xyuas tej yam uas peb tus kheej thiab peb tsev neeg xav tau.

Kawm tej Yam Ntxiv

Yog koj muaj lus nug txog kev pab cov neeg uas xav tau, koj nrog koj cov cov kwv tij los sis cov viv ncaus uas txhawb pab, los sis koj cov thawj coj, los sis cov tub txib tham los tau. Koj nrhiav tau tej zaj lus hais nyob hauv lub tuam rooj sab laj los yog lwm yam kev pab txog lub ntsiab lus no nyob hauv Txoj Moo Zoo cov Ntawv (nyob ntawm ChurchofJesusChrist.org los sis nyob hauv qhov app xov tooj ntawm tes).

© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, September 2023. Language. 19047 295