PARAU PORO’I A TE FEIĀ FA’ATERE O TE ĀREA

Tē fāri’ira’a i te ha’apāpūra’a nō tō’u pi’ira’a ’ia tāvini

Nā Paul Whippy

Hitu Ahuru Area

E ha’amatara’a ’āpī teie nō’u, i muri a’e e 30 matahiti i te ravera’a i te ’ohipa i roto i te ’Ēkālesia, ’ua fa’atuha’ahia vau ’e ’ua ’ite a’era vau ē, ’ua rahi roa tō’u taime vata i teie nei. ’Ua riro te ravera’a i te ’ohipa nā te ’Ēkālesia a Iesu Mesia i te Feiā Mo’a i te mau Mahana Hope’a nei ’ei ha’amaita’ira’a rahi o tei tauturu rahi iā’u ’ia ’ite ē ’o vai au ’e e aha tā’u e ’ōpua nei i te rave i roto i tā’u tau fa’atuha’ara’a.

Tā’u fa’aotira’a mātāmua nō te fa’atuha’ara’a o te haerera’a ïa e fārerei i tā’u nā tamaiti e toru ’e tō rātou ’utuāfare i Utaha e ono ’āva’e te maoro. E ’āpiti mai tā’u vahine iā’u i muri a’e nō te mea tē rave noa ā ra ’oia i te ’ohipa. I te ’āva’e ’Ātopa 2019, tei Utaha vau, ’ua haere atu vau i tā’u ’āmuira’a rahi mātāmua. ’O te ’itera’a pae vārua maita’i roa a’e ïa tā’u i fāri’i i roto i te hō’ē purera’a a te ’Ēkālesia. Te mau mea ato’a tā’u i ’ite, i fa’aro’o ’e i fāri’i i roto i te pū ’āmuira’a, ’ua fa’a’ī te reira iā’u i te māuruuru ’e te here nō te ’evanelia ’e nō te mau mea ato’a tā’u i ha’api’i mai i roto i te ’Ēkālesia mai tō’u bāpetizora’ahia i te matahiti 1977.

’Ua ta’i au ’a hīmene ai au i te mau hīmene o te ’āmuira’a. ’Ua fa’ahiahia vau i te ’itera’a atu i nā peropheta ’e mau ’āpōsetolo ora e 15, i te pārahi ’āmuira’a i ni’a i te tahua i rotopū i te tahi atu mau hui mana fa’atere rahi ’e te pupu hīmene melahi a te Fare Menemene i Temple Square. E au ra ē tē mara’a noa ra te mau hīmene a te ’āmuira’a i ni’a i te ra’i, ’e ’ua hina’aro vau ’ia fa’aro’ohia tō’u reo i rotopū i nā 23 000 ta’ata ’ē atu i tae mai. ’Ua riro mau ā te reira ’ei ’ohipa fa’ahiahia mau.

I muri a’e i tō tā’u vahine haerera’a mai i Utaha, ’ua haere atu māua i California nō te fārerei i tōna ’utuāfare, ’e i reira tō’u fāri’ira’a i te hō’ē niuniu mana’o-’ore-hia nā te peresideni Ian Ardern, te Peresideni Ārea nō Patifita. ’Ua ani mai ’oia iā’u ē ’āfea vau e ho’i ai i Fiti ’e ’ua parau mai ’oia ē tē hina’aro rū ra ’oia e fārerei iā’u. ’Ua parau atu vau iāna ē e ho’i au i Utaha i te hepetoma i muri mai, nō reira ’ua parau mai te Peresideni Ardern ē e niuniu mai ’oia iā’u i taua taime ra.

’Aita vau i ta’oto maita’i i muri a’e i taua niuniu ra. ’Ua pe’ape’a tō’u ferurira’a. ’Ua taui tō’u huru tā’āto’a nō te toe’a o te mau mahana o tā’u tau fa’afa’aeara’a.

’O Carl B. Cook nō te Peresidenira’a o te Hitu ’Ahuru tei niuniu iā’u i muri iho, ’e ’ua haere māua tā’u vahine i te pū fa’aterera’a o te ’Ēkālesia nō te fārerei iāna. ’Auē ïa ha’api’ira’a ha’eha’a nō te pi’ira’ahia ’ia tāvini ’ei Hitu ’Ahuru Ārea. Noa atu ē ’aita roa atu vau i pāto’i i te hō’ē pi’ira’a i roto i nā matahiti e 42 tō’u rirora’a ’ei melo nō te ’Ēkālesia, e mea ta’a ’ē rā te reira. ’Ua teimaha roa vau i te mana’o ē, e’ita e mara’a iā’u ; ’Aita vau i mana’o ē ’ua ineine au. « Ua ta’i hua vau i mua i tā’u vahine ’e ia Elder Cook. Mai te reira mau ānei ? »

I roto i tō’u orara’a tā’āto’a ’ua fa’ahiahia vau i te mau Hui Mana Fa’atere Rahi ’e te feiā fa’atere rahi o te ’Ēkālesia—’ua mā’itihia rātou e te Atua ’e ’ua fa’aturahia nā roto i te ’Ēkālesia tā’āto’a. E tae roa mai i taua taime ra, tō’u mau pi’ira’a ato’a nō te fenua iho ïa. ’Aita roa atu vau, i roto i tō’u mau moemoeā, i mana’o noa a’e i te hō’ē pi’ira’a i roto i te ’Ēkālesia Ārea.

’Ua tauto’o vau nō te fāri’i i te mea i anihia mai iā’u, terā rā, ’ua ha’amata te fē’a’a nō ni’a i tō’u ’aravihi nō te rave i taua pi’ira’a ra i te morohi, ’e ’ua ’ī roa vau i te māuruuru nō tō’u Fa’aora, nō tōna here ’e tōna aroha. ’Ua fāri’i au i te hina’aro pāpū ’ia tāvini i te Fatu i roto i teie ti’ara’a. ’Ua riro te reira ’ei rāve’a nō’u nō te fa’a’ite i tō’u here iāna ’e i tāna ’Ēkālesia. Te pāpa’ira’a tei tae mai i roto i tō’u ferurira’a o te Ha’api’ira’a Tumu ’e te Mau Fafaura’a 82:3 : « Nō te mea ’o ’oia ’o tei hōro’ahia atu te mea rahi ra, e mea rahi ato’a ïa te tītauhia atu iāna ra… »

’Ua pāturuhia vau i te ’āmuira’a rahi nō ’Ēperēra 2020, te ’āmuira’a mātāmua roa a te ’Ēkālesia i fa’anahohia nā roto i te rāve’a natirara. ’Ua tupu atoa tā’u ha’api’ipi’ira’a ’ei hitu ’ahuru ārea ’āpī nā roto i te rāve’a natirara i te taime ’a fātata ai te COVID i te tae’ahia i tōna fāito teitei roa a’e. E semeio mau tā’u matahiti mātāmua i roto i taua pi’ira’a ra ; e mea māere mau te pāturura’a tā’u i fāri’i nō roto mai i te peresidenira’a Ārea nō Patifita, tō’u mau hoa Hitu ’Ahuru Ārea, ’e te mau Hui Mana Fa’atere Rahi tei haere mai e fārerei iā’u. ’Ua riro te rāterera’a i roto i te mau ’āmuira’a titi ’e te haere-tino-ra’a i te mau ’āmuira’a rahi ’ei mau taime fa’ahiahia nō teie taime, tei ’ī i te mau ’itera’a fa’ahiahia nō te ha’api’ira’a mai ’e te tupura’a.

Terā rā, i roto i te hōhonura’a o tō’u ’ā’au, ’ua ’aro noa ā vau, i roto ihoa rā i tō’u mau taime ferurira’a hōhonu. ’Ua ’ite noa vau i te pāpū ’ore ’e te tano ’ore i roto i tā’u tāvinira’a ’ei Hitu ’Ahuru Ārea.

E tae roa mai i te taime nō te tuha’a purera’a hope’a a te hui mana fa’atere rahi, te mau hitu ’ahuru ārea ’e te ha’api’ipi’ira’a nā te feiā fa’atere rahi i te ’āmuira’a rahi nō ’Ēperēra 2021 i fāri’i ai au i te ’itera’a pāpū pae varua tā’u i ’imi noa na mai tō’u pi’i-ra’a-hia. E’ita roa e mo’ehia iā’u taua taime ra.

Te tārena nō terā tuha’a purera’a ’oia ho’i ’ia fa’a’ite pāpū nā ’āpōsetolo ’e nā peropheta 15 nō ni’a ia Iesu Mesia. E mea hanahana mau te hanahana ’e te mo’a o teie ’ohipa. Nā te ’itera’a pāpū ’o Neil L. Andersen i taui i tō’u hi’ora’a ’e i hōro’a mai i te ha’apāpūra’a tā’u e ’imi ra.

’Ua fa’ata’a mai o Elder Andersen i tōna huru i te taime ’a pi’ihia ai ’oia i roto i te Pupu nō te Tino ’Ahuru Ma Piti ’Āpōsetolo. Tē parau ra ’oia ē i te taime mātāmua ’oia ’a pārahi ai i ni’a i te pārahiraa tā Elder Soares e fa’a’ohipa ra i teie nei, ’ua hi’o a’era ’oia i ni’a i nā 11 ’Āpōsetolo ’e te Peresidenira’a Mātāmua, ’e ’ua putapū roa ’oia i te mana’o ē e’ita e mara’a iāna. I tō’u fa’aro’ora’a ia Elder Andersen i te paraura’a i te reira, ’ua pārahi maita’i au i ni’a i tō’u pārahira’a nō te mea ’ua ’ite au ē te mea tāna i parau iho nei—’e te mea tāna e parau mai i muri iho—’ua tano maita’i ïa nō’u.

’Ua parau ’o Elder Andersen ē ’ua ’aro ’oia i teie fifi nō te tahi taime ri’i, i muri iho, ’ua haere mai ’oia : ’Ua fa’aro’o ’oia i te reo o te Fatu i te paraura’a mai ē : « Neil, ’aita ’oe i tae i reira. ’Ua nā reira vau, nō te mea ’ua here au ia ’oe, ’e ’ua ’ite au e nehenehe ’oe e taui, ’e ’ua ’ite au e nehenehe ’oe e tauturu mai iā’u i roto i tā’u ’ohipa. »

I tō Elder Andersen fa’ati’ara’a i teie ’itera’a mo’a, ’ua riro te reira ’ei mea mo’a ato’a nō’u. Terā te ha’apāpūra’a o tā’u i hina’aro.

’Ua ’ite au ē ’aita te Metua i te Ao ra ’e tāna Tamaiti i pi’i iā’u nō te hō’ē noa a’e mea tā’u i rave nō te amo i teie ti’ara’a, nō te mea rā ē ’ua here rāua iā’u. ’Ua ’ite rāua e nehenehe au e taui, ’e ’ua ’ite rāua e nehenehe au e tauturu ia rāua i roto i tā rāua ’ohipa hanahana : te fa’atupura’a i te tāhuti ’ore ’e te ora mure ’ore o tā rāua mau tamari’i pā’āto’a. (Hi’o Mose 1:39.)