« I te hope’a te hāro’aro’ara’a e aha te aura’a ’ia herehia e te Atua », Liahona, Tetepa 2023.
Feiā ʼāpī paʼari
I te hope’a te hāro’aro’ar’a e aha te aura’a ’ia herehia e te Atua
’Ua mo’e-roa-hia iā’u te pūai nō te ’itera’a i tō’u ihota’ata hanahana.
Fa’ahōho’ara’a nā Alecia Schubert
I tō’u ’āpīra’a, ’ua fa’anu’u atu tō’u ’utuāfare mai te fenua Honeteria haere atu i te fenua Heremani. ’Ua ’oa’oa roa vau i te haerera’a i reira, terā rā, ’ua riro te reira ’ei nā matahiti fifi roa a’e e iva nō tō’u orara’a.
’Ua tāfifi ri’i au i te ha’api’ira’a mai i te reo Purutia ’e ’ua vai noa te mana’o paruparu, nā te reira i fa’ariro iā’u ’ei tāpa’o nō te hāmani-’ino-ra’a. ’Ua topa roa tō’u faufa’a ta’ata i raro. I te roara’a o te tau, mai te huru ra ’aita vau i herehia, ’e e mea iti roa tō’u ti’aturira’a nō te ’ananahi. ’Ua uiui noa tō’u mana’o, e maita’i mai a’e paha te ao nei ’āhani ’aita vau ’e i te tahi taime ’ua tae ato’a mai te mana’o ’ōnohi.
Nā roto i te rāve’a ’e te tahi atu, i roto i te mau māuiui ato’a, ’ua ’ite au ’ua hōro’ahia iā’u te ora nō te hō’ē tumu, noa atu ’aita vau i ta’a hope roa te tumu. ’Ua ’ite au e nehenehe tā’u e ’ite i te māramarama o te Fa’aora noa atu ā tei te mau tau pōiri roa a’e (hi’o Etera 12:4). E au ra ’ia fāriu ana’e mai te ao nei i ni’a iā’u, ’ua ’ite au i hea ’oia e ’itehia ai ’e i te mea tāna e nehenehe e rave nō’u mai te mea e ’imi au ’iāna nā roto i te mau pāpa’ira’a mo’a, te pure ’e te ravera’a ma te maita’i roa a’e nō te riro ’ei pipi nāna. ’O te orara’a mau i tāna ’evanelia tei hōro’a mai iā’u i te tahi huru hau, ’e tei tauturu iā’u ’ia tāmau noa i roto i te reira mau tau ri’ari’a.
Hō’ē parau mau tei mo’e-roa-hia iā’u
I te hope’a, ’ua ho’i atu tō’u ’utuāfare ’e ’o vau iho i te fenua Honeteria. ’Ua roa’a tā’u parau tū’ite nō te ha’api’ira’a tuarua ’e noa atu ’ua hope tō’u mau mahana hāmani-’ino-ra’a, tē ’ere noa nei ā vau i tō’u iho faufa’a. ’Ua ha’aparuparu roa te mau hāmani-’ino-ra’a iā’u, ’e i te tahi taime tē fē’a’a noa nei ā vau i tō’u iho faufa’a.
’E ’ei feiā ’āpī pa’ari, ’ua hina’aro mau vau ’ia ti’aturu pāpū iā’u iho, nō te rave i te mau fa’aotira’a rarahi o te orara’a ’e ’ia fa’aoti i te mea tā’u e hina’aro e fa’atupu i roto i te orara’a.
’A ’aro noa ai au nō te reira, ’ua fa’auruhia vau e haere atu i te hō’ē ’āmuira’a nā te feiā ’āpī pa’ari i Europa hiti’a o te rā. ’Ua hina’aro vau i te hō’ē arata’ira’a pae vārua i roto i tō’u orara’a nō te tauturu iā’u, ’ia fa’ahōhonu i tō’u iho faufa’a ’e ’ua pure au nō te ’ite mai i te mau pāhonora’a.
I te hō’ē pō i roto i te ’āmuira’a, ’ua taratara roa nā roto i tō’u nā rima ’a ha’amata ai te ta’ata a’o nō te purera’a pae auahi i te paraparau nō ni’a i tōna hāmani-’ino-ra’a-hia i tōna tamari’ira’a. ’Ua paraparau ’oia nō te huru i tōna mana’ora’a i te hō’ē taime e mea faufa’a ’ore ’oia ’e te ’ite-’ore-hia. ’Oi’oi roa, ’ua ha’amata vau i te ta’i.
’Ua fa’ata’a mai ’oia i te mea tā’u i ora mai.
’Ua tāmau noa te ta’ata a’o i teparaparau ’e ’ua fa’a’ite mai i te parau mau ’o tāna i tāpe’a noa i roto i tōna mau tāmatara’a—hō’ē parau mau tei mo’e-roa-hia iā’u :
« E tamari’i au nā te Atua ».
Te tauahira’a i tō’u ihota’ata hanahana
I te hopera’a te purera’a, tē tahe noa ra tō’u roimata i ni’a i tō’u hōho’a mata. ’Ua ’ite mai te ta’ata a’o ’e ’ua rave mai iā’u i roto i tōna nā rima. ’Ua parau mai ’oia iā’u ē, ’aita ’oia e mea haere tino mai nō te paraparau i roto i te mau purera’a pae auahi, ’ua fa’auruhia rā ’oia ’ia feruri ē, tē vai ra hō’ē ta’ata tei hina’aro e fa’aro’o atu i tāna parau poro’i.
’O vau ïa taua ta’ata ra.
’Ua fa’a’ite mai teie ’ohipa i tupu iā’u i te ’ite hope o te Metua i te ao ra i tāna mau tamari’i, ’e ’ua ’ite pāpū maita’i nāhea e tāpae ia tātou ra, ’ia ti’a ia tātou ’ia fāri’i i te hō’ē noa a’e māramarama iti o tōna here metua maita’i roa. ’Ua ’ite ’oia e hina’aro rahi tō’u ’ia fa’aro’o i te parau poro’i a teie ta’ata a’o, ’e ’ua arata’i mai iā’u i te vāhi tano i te taime tano.
’Ua ’ite au i te parau ra, « e tamari’i au nā te Atua » i te tā’āto’ara’a o tō’u orara’a, ’ua tāvevo-hope-roa rā teie parau mau i roto i tō’u vaerua i taua taime ra. ’Ua ’ite mau iho ā vau i te aura’a o te reira ’ia riro ’ei tamari’i nā te hō’ē Atua maita’i roa ’o tei here rahi ia tātou, tei ineine i te fa’atusia i tāna iho Tamaiti ’ia nehenehe ia tātou ’ia ora fa’ahou ’e ’ia fa’aorahia i tā tātou mau hara. ’O tei here mau iā’u ’e noa atu e’ita tāna e nehenehe e pāruru noa iā’u i te mau taime ato’a i te māuiui, tei pīha’i iho ’oia iā’u i roto i te reira ’e e nehenehe ’oia e tauturu iā’u ’ia fa’a’oroma’i, ’ia upo’oti’a ’e ’ia ho’i mai iāna ra.
’Ua here ’oia iā’u i teienei ’e ’ua here tāmau noa ’oia iā’u i roto i tō’u mau matahiti fa’ari’ari’ara’a, ’a ’ite ai au ē e ’aita e ta’ata ’ē atu e rave te reira. ’Ua ’ite au i teienei ē, nō te mea ’ua ’ite maita’i au i teie parau mau i roto roa iā’u, ’ua fa’a’oti au e tāmau noa i te haere i mua.
’Ua ha’api’i iho nei te peresideni Russell M. Nelson i te mana nō te ’itera’a i tō tātou ihota’ata hanahana. ’Ua parau ’oia : « E tō’u mau hoa here, e mau tamari’i vārua mau ’outou nā te Atua. … Tera rā, ’ua nene’ihia ānei rā teie parau mau mure ’ore i roto i tō ’outou ’ā’au ?
« ’Eiaha e hape i te reira : E mea hanahana tō ’outou fāito pūai. Nā roto i tā ’outou ’imi-itoito-ra’a, e hōro’a mai te Atua ia ’outou i te tahi mau hi’ora’a nō te ta’ata tā ’outou e riro mai ».1
I teienei, ’ia uiui ana’e au i tō’u faufa’a, e fa’aha’amana’o tāmau noa vau iā’u iho ē, e tamari’i au nā te Atua ’e ’ua riro tō’u orara’a ’ei tao’a hōro’a nō ’ō mai iāna ra.
’A ha’amana’o e tamari’i ’outou nā te Atua. ’E ’eiaha roa atu ’ia mo’ehia te mana pae vārua fa’ahiahia ’o te taui i te orara’a, ’o te tae mai nā roto i te tauahira’a i teie parau mau.
Tē ora nei te ta’ata pāpa’i i Szeged, fenua Honeteria.