Kajoor in, Karōk eo ewānōk an Katak an Kraist
Ij karuwaineneik kom̧ n̄an āliji im āliji ami mour kōn katak ko an Kraist, n̄an kōkōm̧anm̧an, im lukkun kōttōbar im jipan̄ ro jet ilo iaļ eo aer.
Iiō ko ļo̧k, eo pāleō, Ruth; leddik eo nejim, Ashley; im n̄a kar kobaļo̧k ippān toursit ro jet ilo juon iien kayak ilo state eo an Hawaii ilo United States. Kayak ej juon wa ettā, āinļo̧k wōt juon kōrkōr im riaōņōņ ro rej jitm̧aanļo̧k im kōjerbal juon aōņōņ ruo-bōran n̄an aōņōņ m̧aanļo̧k likļo̧k ilo jait eo juon innem bar jait eo juon. Ļōmņak eo kar n̄an aōņōņōļo̧k n̄an ruo āne jidik in Oahu im bar ro̧o̧l. Ikar kōjatdikdik kōnke, āinwōt kar juon likao, ikkōn kajoor aōņōņ kōn kayak ikōtaan ļwe ko ilo toļ ko . Utiej bōro ejjab boktok men ko rem̧m̧an, ej ke?
Eo ej jineet e kōm ear letok jet kōmeļeļe ko im kwaļo̧k kayak ko kōm naaj kar kōjerbali. Rooktak jān ko ikōn kar aōņōōņ kaki m̧oktaļo̧k. Ikar aikuj in jijet ioon kayak eo, ijello̧kin jijet laļ ļo̧k ilowaan. Ke ikar iuweļo̧k ioon kayak eo, eddo eo aō ekar kōm̧m̧an aō utiejļo̧k jān eo ikōn iminene kake, im ikar elāle im jab kwoņ ilo dān.
Ke kōm kar ijjino, ekar m̧ōkaj aō aōņōņ jān Ruth im Ashely. Ālkin jidik iien, ikar ļe m̧aan jān er. Ilo aō kar utiej buruō kōn aō m̧ōkaj, iar bōjrak aō aōņōņ im kōttar er aer epaaktok. Juon ņo̧ eļap—emaron̄ 13 centimeter koear depet ikōjaan kayak eo waaō im kar ukōj eō n̄an lo̧jet. Ilo iien eo ikar kōjedtak kayak eo im kar kakkōt n̄an iuweļo̧k ioon, Ruth im Ashley raar eļļāļo̧k jān n̄a, bōtaab ikar kanooj ikkijeļo̧k n̄an bar jino aōņōņ. M̧okta jān aō maron̄ bōk kūtuwō, bar juon ņo, ņo in ilo m̧ool ekar kanooj kilep—20 centimeter kokar depet kayak eo waaō im bar okjak. Ilo iien eo ikar maron̄ in kajim̧we kayak eo, ekar kanooj maat kūtuō jon̄an ikar mijak n̄e inaaj kar jab maron̄ iuweļo̧k ioon.
Lo jekjek eo aō, eo ejjineet e kōm ekar aōņōņ tok im jibwe kayak eo waaō, kōm̧m̧an bwe en pidodoļo̧k aō iuweļo̧k ioon. Ke ekar lo bwe ekar jūb jen menwa n̄an aōņōņ makke ļo̧k iaaō, ekar aike kayak eo waaō im jino aōņōņ, ilo an aikeļo̧k n̄a ippān. Ejjab to ikar bōk kūtuwō im maron̄ aō jino aōņōņ makke iaaō. Ekar mijaļļo̧k to eo, im ikar itakļo̧k ilo āne eo kein kajuon ilo ejjeļo̧k bar jipan̄. Ke iar itakļo̧k, ikar okjakļo̧k ioon po̧k, ilo aō lukkuun m̧ōk.
Ālkin an kumi eo kar kakkije, eo ej jineet e kōm ekar unoojdikdik tok n̄an n̄a im ba, “Mr. Renlund, eļan̄n̄e kwonaaj aōņōņ wōt, ilo am̧ dāpij wōt bun̄tōn eo, ij ļōmņak kwonaaj em̧m̧an.” Ikar ļoor kapilōk eo an ilo am kar aōņōņ n̄an āne eo kein karuo innām bar ro̧o̧l n̄an jikin ijjino eo am. Ruo alen, eo ej jineet e kōm ekar aōņōņ tok im jiron̄ eō bwe ekar em̧m̧an aō “kōm̧m̧ane!” Jekdo̧o̧n ņo̧ ko reļļap rekar dāpet kayak eo waaō jān rejet, bōtaab ikar jab pedo.
Jān aō wōnm̧anļo̧k wōt im aōņōņe kayak eo, ikar dāpij bun̄tōn eo im bun̄ m̧aanļo̧k wōt, ilo aō kadikļo̧k jetn̄akin an ņo ko itaak ippa jān turejet eo. Ejja wōt pedped in katak in ej jerbal ilo mour in jetōb ko ad. Jej ejermatmat n̄e jej kadikdikļo̧k im eļap tata n̄e jej bōjrak. Eļan̄n̄e jej dāpij wōt bun̄tōn jetōb eo ilo ad “aōņōņ” m̧aanļo̧k n̄an Rilo̧mo̧o̧r eo, jej ineem̧m̧anļo̧k im ļapļo̧k ad kōjparok kōnke ad mour indeeo ej pedped ioon tōmak eo ad ilo E.
Bun̄tōn jetōb eo ej ejaak “aolepen iien ad mourilo an emakūjkūj ad ļoor katak eo an Kraist.” Ilo kōm̧m̧ane menin, Būreejtōn Russell M. Nelson ekar katakin, bwe ej kōm̧m̧ane juon “kajoor in karōk eo ewānik.” Ilo m̧ool, m̧ōttan ko an katak eo an Kraist—ko āinwōt tōmak ilo Irooj Jisōs Kraist, ukweļo̧k, delo̧n̄e juon bujen jemjerā ippān Irooj kōn peptaij, bōk menin letok eo an Jetōb Kwojarjar, im niknik n̄an jem̧ļo̧kin—jibadbad eo ejjab n̄an iooni juon wōt kōttan, im kakōļļeik ilo aer dedeļo̧k. Eļap tata, “Niknik n̄an jem̧ļo̧kin” ejjab lukkuun juon bun̄tōn ejenolo̧k jān katak eo an Kraist—men̄e ilo ad kadedeļo̧k bun̄tōn ko emān im pād bajjōk, n̄i laļlaļ, im kōttar n̄an mej. Jaab, niknik n̄an jem̧ļo̧kin ej emakūjkūj im wōnm̧anļo̧k wōt n̄an kōkōm̧anm̧anļo̧k im kōjerbali m̧ōttan ko jet an katak eo an Kraist, ejaake “eļap kajoor in karōk eo ewānik ” im Būreejtōn Nelson ekar kōmeļeļeik.
Āliji ej meļeļein bwe jej en̄jake im bar en̄jake m̧ōttan ko an katak eo an Kraist ilo aolepān mour ko ad. Āliji n̄an kōkm̧anm̧anļo̧k ej meļeļein jej ekkal ioon im em̧m̧anļo̧k kajjojo allen. Men̄e jej āliji m̧ōttan ko, jejjab baj ero̧lool wōt ilo ad ālij juon men ak ejjeļo̧k tōprak in juon wōnm̧aanļo̧k. Ijello̧kin, jej epaakeļo̧k Jisōs Kraist kajjojo iien ilo ad āliji.
Bun̄tōn eo ekūtibuuj aolep men keiniiūm̧ eo im iaļ eo. Eļan̄n̄e ikar aikuj in kōbkōb im aōņōņe kayak eo ilo iaļ eo ebōd, imaron̄ kar ejake bun̄bōn eo ejenolo̧k, bōtaab iban kar tōpar mejān kajjik eo ļōmņak in jibadōke. Ejja wōt, ilo mour in, jej aikuj “aōņōņ” m̧aanļo̧k n̄an Rilo̧mo̧o̧r eo n̄an itok n̄an E.
Tōmak eo ad ilo Jisōs Kraist ej aikuj kajoorļo̧k raan otemjeļo̧k. Ej kajoor ilo ad jar raan otemjej, ekkatak jeje ko rekwojarjar raan otemjej, kejekļo̧kjeņ ioon em̧m̧an eo an Anij raan otemjej, ukweļo̧k raan otemjej, im ļoor im̧we ko an Jetōb Kwojarjar raan otemjej. Ejja āinwōt an jab ājmour n̄an karum̧wijļo̧k ad m̧ōn̄ā m̧ae Jabōt innām kaļap ad m̧ōn̄ā ilowaan wiik otemjej, ejjab ājmour ilo jetōb n̄an naajdik naan in kam̧ool eo ad juon wōt raan ilo juon wiik.
N̄e jej bōk iood make eddo eo n̄an naan in kam̧ool ko ad, jej bōk bun̄tōn in jetōb eo im jidik kōn jidik jej ejaake pedped in tōmak eo ilo Jisōs Kraist, im katak eo an Kraist ej erom dilepān jibadbad eo an mour in. Bun̄tōn eo ej bareinwōt ekkal ilo ad kajjieon̄ pokake kien ko an Anij im ukweļo̧k. Ukweļo̧k ej lan̄lōn̄ im ej kōtļo̧k ad katak jān bōk ko ad, eo ej wāween ad eddōkļo̧k n̄an indeeo. Ejjeļo̧k kajjitōk enaaj wōr iien jenaj okjak ilo kayak ko waad im lo kōj make ijokko dān eo em̧wilaļ. Kōn uwekļo̧k, jemaron̄ bar walōtak im wōnm̧aanļo̧k wōt, jekdo̧o̧ņ jete allen ad kar wōtlo̧k. Men eo aorōk ej bwe jen jab ebbwer.
M̧ōttan eo tok juon an katak eo an Kraist ej peptaij, eo ekitbuuj peptaij kōn dān in im, kōn kapene, peptaij kōn Jetōb Kwojarjar. Ilo an peptaij kōm̧m̧an juon wōt iien, jej bar kōkāāl bujen peptaij eo ad ilo emakūjkūj n̄e jej bōk kwojkwoj eo. Kwojkwoj eo ejjab bōk jikin peptaij eo, ak ej kobaik m̧ōttan ko im̧aan ilo katak eo an Kraist—tōmak im ukweļo̧k—kōn bōk Jetōb Kwojarjar. Ilo ad ellowetak in bōk kwojkwoj eo, jej karuwaineneiktok Jetōb Kwojarjar n̄an mour ko ad, ejja āinwōt n̄e jaar peptaij im kapene. Ilo ad kōjparok bujen eo kar kōmeļeļeik ilo jar ko an kwojkwoj eo, Jetōb Kwojarjar ej erom m̧ōttad.
Ilo an Jetōb Kwojarjar kōm̧m̧an eļap oktak ilo mour ko ad, jej eddōkļo̧k im wōnm̧anļo̧k in ejaake m̧wil ko m̧wilin Kraist. Būurōd ej oktak. Itok limo eo ad n̄an kōm̧m̧an nana ej makunļo̧k. Ad aikuijn̄an kōm̧m̧an em̧m̧an ej ļapļo̧k m̧ae iien jej kōņaan wōt “n̄an kōm̧m̧an em̧m̧an wōt.” Im kōn menin jej tōpar kajoor in lan̄ eo jaikuji n̄an niknik n̄an jem̧ļo̧kin. Tōmak eo ad ej ļapļo̧k, im jej pojak n̄an āliji kajoor in, karōk eo ewānōk bar juon alen.
Bun̄tōn in jetōb eo ej wōnm̧aanļo̧k im bar kōketak kōj n̄an bar kōm̧m̧an bujen ko ippān Anij ilo im̧ōn Irooj. Bujen ko rellōn̄ rej kepaakļo̧k kōj n̄an Kraist im kōkajoorļo̧k ketaan eo ad ippān E. Kōn bujen kein, eļapļo̧k ad iaļ n̄an kajoor eo An. N̄an lukkuun kōmeļeļeiki, bujen ko an peptaij im tampeļ rejjab, ilo im kōn bujen kein make, rej unjen kajoor. Unjen kajoor ej Irooj Jisōs Kraist im Jemedwōj Ilan̄. Ilo ad kōjparok bujen ko ad, jej bōk kajoor eo an Anij ilo mour ko ad. Ilo ad mour ekkar n̄an bujen kein, ilo jem̧ļo̧kin jej erom rijolet ro n̄an aolep ko otemjej an Jemādwōj Ilan̄. Bun̄tōn eo kar waļo̧k jān mour kōn katak eo an Kraist ejjab kōkajoor wōt oktak eo an paotok eo ekwojarjar ad n̄an mejān kajjik indeeo , ak ej barāinwōt kōketak kōj n̄an jipan̄ ro jet ilo wāween ko rekkar.
Ļōmņak kōn ekōjan an eo ej jineet e kōm kar jipan̄ eō ālkin aō kar pedo ilo kayak eo. Ekar jab lam̧ōj jān ettoļo̧k kōn juon kajjitōk ejeļo̧k tokjen āinwōt , “Mr. Renlund, kwoj ita ilojet?” Ekar jab aōņōņ tok im lu eō, im ba, “Mr. Renlund, kwoban kar pād ilo jekjek in eļan̄n̄e ekar ļapļo̧k am̧ ekkeke ilo ānbwin.” Ekar jab jino aike kayak eo waaō ke ikar kajjieon̄ wōt in iuweļo̧k ioon. Ekar jab kajim̧we eō im̧aan kumi eo. Ijello̧kin, ekar letok n̄an eō jipan̄ eo ikar aikuji ilo iien eo ikar aikuji. Ekar letok n̄an eō kapilōk ke ikar pojak in bōke. Im ekar kate n̄an kōketak eō.
Ilo ad jerbal in karejar n̄an doon, jejjab aikuj in kajjitōk kajjitōk ko rejjab jipan̄ ak ba men ko ralikkar. Elōn̄ wōt armej ro me rej kakkōk rejeļā bwe rej kakkōk. Jej aikuj jab ekajet, ekajet eo ad ejjab jipan̄ ak karuwainene im ekkā an jab kobbā.
Keidi kōj make n̄an ro jet emaron̄ tōl kōj n̄an kōm̧m̧ani bōd ko rōkabūlo̧klo̧k, eļap tata eļan̄n̄e jej kōjem̧ļo̧k bwe eļapļo̧k ad armej in kabun̄ jān ro me rej kakkōt. Kain keidi in ej āinwōt kōmaļo̧n̄ ilo ejeļo̧k kejatdikdik ilo 3 meter ko in dān, lo eo m̧ōttam̧ an maļo̧n̄ ilo 4 meter ko in dān, ilo am̧ ekajete āinwōt juon rijerawiwi eļap, im en̄jake am̧ em̧m̧anļo̧k. Ālkin aolep men, jej aolep ioon̄ apan̄ ko ilo wāween ko rokkotaktak. Ejjeļo̧k juon iaad ej bōk lo̧mo̧o̧r. Jeban kar maron̄. Jekab, ilo Bok in Mormon, ekar katakin, “keememej, ālikin [am kar kōllaajrak kom̧ n̄an Anij, bwe ej ilo im kōn wōt jouj an Anij kom̧ij bōk lo̧mo̧o̧r.” Jej aolep aikuji Pinmuur eo an Rilo̧mo̧o̧r, ejjab jidik in wōt.
Jen bōktok aolep ad tūriam̧o, meanwōd, im iakwe ilo ad ikitōltōl ippān ro ipeļakiid. Ro me rej kakkōt “rej aikuj in en̄jake iakwe eo erreo an Jisōs Kraist ej waļo̧k ilo naan ko [ad] im kōm̧m̧an ko.” Ilo ad jerbal in karejar, emakijkij ad kōketak ro jet im leļo̧k jipan̄. Jekdo̧o̧n eļan̄n̄e juon ejjab pojak in bōke, jej wōnm̧aanļo̧k wōt n̄an jerbal in karejar ilo aer kōtļo̧k. Rilo̧mo̧o̧r eo ekar katakin bwe “n̄an rein kom̧ naaj wōnm̧aanļo̧k wōt im jipan̄; bwe kom̧ij jab jeļā eļan̄n̄e ak ta renaaj ro̧o̧l im ukeļo̧k, im itok n̄an Eō kōn aolepān kōttōpar in bōro, im Inaaj kōmour er; im kom̧ naaj wāween eo n̄an bōktok lo̧mo̧o̧r n̄an er.” Jerbal eo an Rilo̧mo̧o̧r ej n̄an kemour. Jerbal eo ad ej n̄an iakwe—n̄an iakwe im jerbal in karejar ilo juon wāween eo me ro jet rej epaakeļo̧k Jisōs Kraist. Juon iaan leen ko an kajoor in karōk eo ewānōk an Katak eo an Kraist.
Ij karuwaineneik kom̧ n̄an āliji im āliji ami mour kōn katak ko an Kraist, n̄an kōkōm̧anm̧an, im lukkun kōttōbar im jipan̄ ro jet ilo iaļ eo aer. Ij kam̧ool bwe katak eo an Kraist ej dilepān karōk eo an Jemādwōj Ilan̄, ej, ālkin aolep men, katak eomAn. Ilo ad kōjerbal tōmak ilo Jisōs Kraist im Pinmuur eo An, jej wōnm̧aanļo̧k ilo iaļ in bujen eo im ellowetak n̄an jipan̄ ro jet erom rikaļoor ro retiljek an Jisōs Kraist. Jemaron̄ erom̧ rijolet ro ilo aelōn̄ in kiin̄ eo an Jemādwōj Ilan̄, eo ej utiej tata ilo tiljek in mour kōn katak eo an Kraist, ilo etan Jsōs Kraist, amen. Ilo etan Jisōs Kraist, amen.