E Kaotia Nakoiu te Atua bwa Iai Manenan Maiu

Iroun Posenai Patu, Apia, Samoa

I bwaka man te nii, ma e kamaiuai te Uea bwa I aonga n ibita maiu ao ni buokiia aomata aika a mwauku n ai arou.

Tamnei

te mwaane i aon ana kaintekateka te wiira ma ana utu

Korotamnei iroun Christine Hair

I kakioa teuana te bwabwaro n te aro ma mwaaneu ngke e a tuangai naba bwa N na tamwarakea te nii bwa N na anai tabeua moimoto ibukin te bwabwaro. I anai moimoto mai i eta n te nii, e a ti roo naba matau ao ni bwaka. I nako raoi ni bwakara nuukau ao n aki kona ni kamwainga waeu.

I uotaki nakon te onaoraki, ike a buokai iai taokita ni kamarurunga riin nuukau. Inanon teniua te namwakaina, I wene n aki kakamwakuri n te onaoraki, ao n aki naba kona n teirake teutana. Bon te tai ae rangi ni kananokawaki irou ao man kakorakai naba. I wene ao n iango bwa tera ae nang riki nakoiu ao tera ae N nang karaoia i mwiina.

Reitaki ma te Uea

I mwiin teniua te namwakaina, I a tuangaki bwa N na nako Nu Tiran ibukin karaoan te korokoro n nuukau. I mwiin au korokoro ao i a kona n tekateka nakon are ai bon ti wene naba n aki kakamwakuri. N au tai ni mena n te onaoraki i Nu Tiran, I kaitibo ma temanna te aine ae mwakuri naba ikekei. E titirakinai, “Titebo ma kanga i kinako? Titebo bwa I a tia n nooriko mai i mwaina.”

Ti a moana ara kakaraki. E bon tibwaua nakoiu taekan ana euangkerio Iesu Kristo ao n anganai ana Boki Moomon. N te moan tai, ao I bon aki warekia. I katikua irarikin au kainiwene ao n aki kumeia. Te bong teuana, I a rangi ni botu bwa ai akea te bwai ae rang kakamataku are N na matakuakinna i aon te terewition. I a noora ngkanne ana Boki Moomon iaon au taibora. I anaia ao ni kaukia ni moana au wareware.

Inanon au tai ni warekia, ao I namakinna bwa iai te bwai ae kaokoro n ana Boki Moomon bwa e bon kaonaki n taekan ana euangkerio Iesu Kristo ae koaua. Te aine are n te onaoraki e bon mwaakeni tabeua kiibu, ao teuana mai ibuakona bon Aramwa 37:37: “Reitaki ma te Uea n am waaki ni kabane, ao e na kairiko nakon ae raoiroi.”

E bon tiku inanou mwanewen te kibu ao n anganai au tai n iango. Ngkana I kan ataia raoi bwa e koaua ana Ekaretia Iesu Kristo ibukiia Aika Itiaki ni Boong aika Kaitira, ao I riai n reitaki ma te Uea. I tangiria naba ni kan roko n te ekaretia aei i bon irou.

A Mauna nako Raraoman Nanou

Ngke I a oki mai Nu Tiran, I kaoiia mitinare bwa a na reireinai. Ngke I a mataata n te euangkerio, ao I a karekea au kakoaua bwa bon ana Ekaretia Kristo. I kakaitau nakoia mitinare ake a tia n reireinai te euangkerio. N au bwabetito, a bon anganaki te kakorakoraaki n uotai nako nanon te tabo ni bwabetito—temanna e tauai bwa N na aki bwaka ao are temanna e karaoa au bwabetito.

Au bwabetito, e bon buokai ni kanakoi ni kabane au namakin n raraoma ao korakaiu. I a ataia bwa bon iai Manenan maiu ao n tangiraki iroun te Atua.

I mwain au bwabetito, I bon rootaki n te mamae kioina ngkai i kabongana au kaintekateka te wiira. I mwiin bwabetitoakiu, ao eng, I moana au kakaonimaki n roroko ni katoa Taabati ao iriiri aia waaki ni kakukurei kairake n ikawa aika a tuai ni ieini. I bon roko n iriira naba ana bwatere te titeiki, ao ni mwamwaie i aon au kaintekateka te wiira ni katoa tai are e tang iai te katangitang. I kaina naba teuana te rabwata i Samoa ibukiia ake a mwauku.

I a ataia bwa I kamaiuaki man au namakin are N nang kakarabaai n tiku ma arou. Rinanon te Ekaretia, I a karekea te kakorakoraaki bwa N na manga kona n rena riki ma aomata.

E bon buokai naba te Uea ni karikirakeai ao ni kaunga nanou bwa N na reirei teniua-te ririki n te Cambodian School of Prosthetics and Orthotics (CSPO). I aki raoi koaua bwa N na kona n ira te burokuraem aei ngkai bon akea te aomata ma ana kaintekateka te wiira ae e a tia ni kabaea arana iai. Ao eng, I kaitiboaki ma kangaanga tabeua are e a kairai iai bwa N nang nako n reirei n te CSPO i Cambodia. I riki bwa te moan mwauku n angabeeba n te burokuraem aio.

I mwain ana bwabetito, ao e bon namakina te mamae Posenai ngkai e kabonganaa te kaintekateka te wiira. Ma i mwiin bwabetitoakina, ao e taku, “I a karekea te kakorakoraaki bwa N na manga kona n rena riki ma aomata.”

Ngke I okirikaaki nako Samoa, ao e reke au tai n taetae n tain ana bwabwaro te YSA ibukin te marurung. I mwiin te bwabwaro anne, ao temanna te aine ae e mwananga nakoiu ao n taua baiu man tuangai bwa e teke nanona n au marooro. E a bon tibwa oki man ana mition Lagimanofia. Man te tai are I moan kaitibo iai ma neiei, ao I namakinna bwa e na riki bwa toau. I tataromwaaka ibukin anganakiu toau ae e na tangirai ao ni kukurei ni butimwaeai.

N au tai n iraorao ma Lagimanofia, ao e rangi n tabeakinai ao ni kariaia nanou, ao ana utu a bon rangi ni korakora aia boutoka nakoira. Ti mareaki, ao n ibitaki maiura nakon te kukurei ae akea tokina ngke ti a tabeka Posenai Jr bwa natira. E katauraoa te kawai nakoira te Atua bwa ti na tobwaia. Ti bon rangi ni kaonaki n te kukurei ngkai e a kaoti bwa raora ni maiu.

I kona ni Beku?

N te ekaretia, ao i bon weteaki bwa te kiraaka n te uoote ao n manga riki bwa te kauntira n te bitiobiriki i mwiina. I bon aki kakoaua bwa e na reke naba ana tai ni beku te aomata ae mena i aon te kaintekateka te wiira. E roko irou te namakin ae akea bonganan maiu i mwiin rekeu n te kabuanibwai, au beku n te Ekaretia e bon buokai n ataia bwa e manena maiu ao ni buokai n ataa are I kona n anganakon te Ekaretia. I kukurei n tibwangau aei bwa e bon karikirakeai ao ni kaniiai riki ma Iesu Kristo.

I a tia ni beku bwa te kauntira n te bitiobiriki, ao I tangiria ni kan kairaki n tamneina bwa I aonga ni korakora inanon tibwangau. I tangiria ni kan katauraoai raoi i mwain te Tabati. E a reke irou tatangiran warekakin booki aika tabu, ao n reke naba au tai n tibwaua au koaua. Arou ni kairiiri n te ekaretia e bon buokai bwa N na riki naba bwa te tia kairiiri n au tabo ni mwakuri. Karekean te namakin irou ae I kona ni kairiiri ao n taetae, e bon barongaai bwa N na kairiiri n taabo tabeua.

I a beku ngkai bwa te tia kairiiri n ana onaoraki Samoa i Tupua Tamasese Meaole ni mwaangana are e tabe ma kainnanoia aika a Mwauku Rabwataia. Te mwaanga are I tararuaia e bon kaainaki irouia 500 aomata ni katoa ririki ni mwamwananga ma okoia ao aia kaintekateka te wiira. Te Ekaretia, rinanon ana bootaki ni mwakuri Samoa ibukin te Mauri ao Katoki aoraki, a karekei kainnanoia Mwauku n aron te kaintekateka te wiira ao ai katoamauakiia naake a toaraa rabwataia (taraa philanthropies.ChurchofJesusChrist.org/humanitarian-services). Buoka aikai e bon buokiia aomata bwa aonga n okira aia mwakuri ao n tei toronibwai i bon irouia. E bon anganiia naba aomata te kaantaninga ni manga okira aroia are mai i mwaina.

“Au beku n te ekaretia e bon buokai n ataia bwa e manena maiu ao n ataa are I kona n anga nakon te Ekaretia,” e taku Posenai. “I kukurei n tibwangau aei bwa e bon karikirakeai ao ni kaniiai riki ma Iesu Kristo.”

Onimakina te Uea

Ngkana I tuangaki bwa tera au taeka n reirei nakoia mwauku, N na bon taekinna ni kangai, “Tai iangoia bwa mwaukum e na tuukiko man te bwai are ko uaiakinna. Kabanea nanom nakon te bwai are ko tangiria bwa e na reke iroum ao mwakuri korakora nako iai. Ngkana ko ukora ana ibuobuoki te Uea, ao e na bon kakabwaiako [taraa 2 Nibwaai 32:9].”

E kateimatoaai, au onimaki, ao ni buokai bwa N na riki bwa te aomata ae I manena n te bong aei. I kakoaua bwa I karuoaki ikai ao ni kamaiuaki bwa iai bukina. I bwaka man te nii, ma e kamaiuai te Uea bwa I aonga n ibita maiu ao ni karaoa ana mwakuri ni kamaiuia aomata aikai ni kabane. E tua nakoiu te Uea bwa I kona ni buokiia aomata aika mwaiti—n aki tabe ngkana i mwauku.