“Te Katauraoi ae Tamaroa ibukin te Maiu,” Riaona, Turai 2024.
Te Katauraoi ae Tamaroa ibukin te Maiu
Te bwai are a reiakinna ataeinimwaane ma ataeinnaine n aia tai ni beku n te mition e na bon kakabwaiai maiuia n aki toki.
Ngke te kairake n ataei ngai, ao I aki toki ni mataaiakina aron teia mitinare. N tain te taromauri n toa teuana n au mwaanga i Minas, Uruguay, e kaota ana koaua temanna te mitinare ao ni kaota ana namakin n te mwakuri ni mitinare. A tiku mwanewen ana marooro aikai n au iango ao i nanou.
“Te taina,” I taetae i nanou, “N na bon nako ni mitinare.”
Tabeua te tai i mwiina, ngke I riki bwa te ibonga, ao e a reke au tai n raoniia miitnare n aia tai n anga reirei. Bon te namakin ae I aki kona ni mwaninga ngke I a riki naba bwa te mitinare n au ririki ae 16!
Ngke ai 18 au ririki, tabeman kairake man au mwaanga a oki man aia mition, ao mwaaneu naba ae Ana, are e beku n ana mition i Argentina. E bon riingaki nanou n aia koaua ma aia taneiai are a tia n rinanona.
Ngke e a kaan koro 19 au ririki, I tangiria ni kan anga arau bwa N na nako ao n taetaekina ana euangkerio te Tia Kamaiu ao ni beku n Ana nne ni kureebe (taraa Reirei ao Berita aika Tabu 75:2). I katauraoai ao ni kanakoi beeban au mition. Ngke e a roko te wewete, I kauka te reta are e tiainaaki iroun Beretitenti Spencer W. Kimball ao n nooria bwa ngaia N na beku n te Uruguay/Paraguay Mition. N na karaoa au beku n oin au taetae! I kukurei ngkai e kona n reke au tai ni katanoata “te rongorongo ae raoiroi ae moan te kakimwareirei, ae te euangkerio ae akea tokina” (Reirei ao Berita Aika Tabu 79:1).
I mwananga inanon uoua te aoa n te bwati ni kakioa aobitin te mition i Montevideo, Uruguay. E katabuai ni kaokoroai te beretitenti n te mition bwa te mitinare ngai n ana Ekaretia Iesu Kristo ibukiia Aika Itiaki ni Boong aika Kaitira ao ni karekea naba toau. Man te bwakantaai anne, ao ti a waaki naba ni karebwerebwe n taian mataroa.
N ara moan tetere, ao e aki reke irou te namakin n ingainga n te mition n aron are I kaantaningaia. I karabwarabwa, bwa e reke toau ae rangi n ongotaeka ao ni mwakuri korakora are ngaia e buokai ni karekea te kimwareirei inanon ana mwakuri te Uea. Ana banna ni kakairi e bon kakabwaiaai ni karokoa banen au tai man te mition.
Ma e a kaman waaki au katauraoi ma ngkekei ibukin nanou ni kan riki bwa te tia tei ibukin au Tia Kamaiu.
E Moanaki Ni Kabane man Bwain Kamatoakin te Neketai
N Tianuare 1962, ngke onoua au ririki ni maiu, a roko mitinare ni kawara ana titooa tamau bwa a kakaea onean mwiin bwain kamatoakin aia neketai ae bua. Ngke a mena ikekei, ao a ongo ana katangitang n te kitaa temanna te aomata. Ngke a titiraki ibukin te aomata anne, ao e a kaoiia naba tamau bwa a na roko n noora raoraona aio.
N aia tai ni marooro, a titiraki naba tamau ma raoraona nakoia bwa a rabakau ni katanga te kitaa ke a kabi. E taku temanna te mitinare bwa iai ongona teuana. E anga te kitaa raoraon tamau nakoina ao n tuangnga bwa e na katangitang. E moana katangitangan kuuna tabeua ao ni karokoa e a raonna toana n anene ma ngaia.
Ti man kakaeakin bwain kamatoakin aia neketai mitinare are e a kairiia au utu bwa a na ongoraa n ana euangkerio Iesu Kristo. Ti rangi n itangitangiri ma mitinare aikai ao ni moana ara reirei ma ngaiia. E a unikaki koraan te euangkerio, ao ngkai e a manga tabe ni bwebwerake, e bwebwerake moa nakon tinau ae, Elsa, ao mwaaneu ae, Ana ao Stella, ao i mwiina ngai.
Man te bong anne, ao e rikirake tatangirakin te mwakuri ni mitinare n ara utu. I beku n au mition, natiu mwaane a beku naba n aia mition, ao ngkai tibura a moana aia kakatauraoi ibukin aia beku n te mition, ni karekea te kateniua n roro ni mitinare n ara utu.
E bon aki bebete te katauraoi n riki bwa te mitinare. E na bon waaki te katauraoi i mwain ae tauraoi te ataeinimwaane ke te ataeinnaine nakon te marae ni mitinare. Aio aia tai karo, utu, ao taan kairiiri n te Ekaretia n riki bwa banna ni katooto ao n uaia ni beku bwa te tiim ibukin katauraoaia te roronrikirake.
Teuana te kawai ibukin katauraoaia bon reireinakiia aroia ni karaoan bwaai aika a uarereke. N aron kawakinan te mwane, te uaati ao katiraan kunnikai, te ituutu, karaneaneakin te kau, te kuuka, aroia ni marooro ma aomata, ao ai moarara riki te beku ibukiia aomata e bon buokiia n aia tai ni beku n te mition. Iriiran te Tieminari ao te Intitute e kona naba n ibuobuoki nakon aia katauraoi ao n maiuakini bwaai ake a reiakinna inanon mweengaia ke n tibwaia n te kiraati aia quorum.
E na reitinako ara boutoka e ngae ngkana a mena n aia mition. E rangi ni kakakukurei ongoraean aia namakin ara mitinare aikai ni katoa bong. Ti kona naba n rin inanon te waaki aio man ara reitaki nakoia naake a butimwaea te reirei. Te katooto, tinan temanna ara mitinare are e reireiiniia ara utu e rereitaki ma tinau ao ni koroboki nakoina inanon ririki aika bati, ni buoka tinau bwa e na teimatoa i aon kawain te berita ae tabu.
Ngkai ti ibuobuoki ni katauraoia ara mitinare n taai aika ana roko, ti riai n uringnga bwa te mwakuri ni mitinare e bon raka riki nakon katein te Ekaretia—Bon te kakao ao te wewete mai iroun te Uea (taraa Mataio 28:19). N te moan tai, ao a reireia te euangkerio Atam ao Nei Ewa. A reirei taekan te euangkerio nakoia natiia (taraa Mote 5:6– 12). “Ao ngaia are te Euangkerio e a moanna n taetaekinaki, man te moan tai, n taetaekinaki irouia anera aika a kanakoaki mai matan te Atua” (Mote 5:58).
E reitinako te mwakuri aei ni karokoa e a raka i aon 71,000 mwaitiia mitinare. Ma ti kainnanoia riki mitinare, n ae mwaiti riki, bwa na tei i moa—bwa taanga ni mitinare ao membwa.
Tera ae Ti Kona n Reiakinna n ara Mition
Ngke I mena n au mition, I a moanna n taneiai ma te anua ni mitinare ao ni kananoa riki au iango i aon ara rongorongo are ti na tibwaia. I teimatoa n namakinna bwa e koaua te euangkerio, ao e matoatoa nanou ni kan ataa koauana. I tataro, I aki mamatam, I kamatebwai, I mwakuriia, ao n tataninga te kaeka.
N te bong teuana n ara tai n anga reirei, ao I tibwaua rongorongon Iotebwa Timiti ma ana Moan Kaotioti:
“I noora te oota i aon atuu, ae raka riki otana nakon otan taai, are e ruo ni karaurau ni karokoa e bwaka nako aou. …
“Ngke e ruo te ota i aou ao I noriia uoman aomata, ae akea aron kabotauan raneaneaia ma mimitongiia, n tei n taarere i etau. Temanna mai ibuakoia e taetae nakoiu, ni weteai n arau ao n taku, ni kotea are temanna—Natiu ae Tangiraki Teuaei. Ongo Irouna!” (Iotebwa Timiti—Rongorongo 1:16–17).
N te tai anne, I namakina ana kamatoa te Tamnei ae Raoiroi nakoiu bwa e bon koaua te bwai ae I reireia. Te burabeti Iotebwa Timiti e bon noora te Tama ao te Nati, ao ana Boki Moomon bon ana taeka te Atua, n raonaki ma te Baibara, a kakoaua te Tia Kamaiu. I namakina te rau ae uotaki nako nanou. E teimatoa n tiku inanou, e ngae ngke e bwakanako te ririki are I namakinna iai.
Au beku n te mition e buokai ni karekea au beeba ae bubura i aon te maiu n tamnei. Te bwai are a reiakinna ataeinimwaane ma ataeinnaine n aia tai ni beku n te mition e na bon kakabwaiai maiuia n aki toki. Ibuakon bwaai aika mwaiti, ao a na bon reiakinna:
-
Aroia ni kamatebwai, n tataro, n anga reirei, ao ni maiuakin reirein te euangkerio ni katoa bong.
-
Aroia ni maeka ma toaia inanon 24 te aoa ni katoa bong.
-
Aroia n tararua marurungin rabwataia.
-
Aroia ni karaoan aia babaire.
-
Aroia ni karikirakea aia konabwai ni kairiiri.
-
Aroia n reitaki ma aomata.
-
Aroia n ukora, ni kakauongo, ao ni kairaki ni bwanaan te Tamnei ae Raoiroi.
Kairake n ataeinimwaane ao n ataeinnaine ake a beku n aia mition a na bon anganaki te kakorakoraaki bwa a na tauraoi ni kaaitarai kakaewenako n te maiu aei ngkana a teimatoa ni maiuakin bwaai ake a reirei iai n aia mition.
Aio bon te Tai
N aron are reireia, ara burabeti ae tangiraki, Beretitenti Russell M. Nelson:
“Bon akea tetaina n rongorongon te aonaaba ngke ataakin ara Tia Kamaiu e a rangi ni kakawaki nakon temanna ao ni kaineti nakon tamneia aomata nako. Iangoa aron baitiin te urubwai n te kakaiangatoa ni kabutaa te aonaaba—ao naake ti bon kinaia inanon maiura—a na kona ni buokaki ngkana ti bane n rineia n iriira Iesu Kristo ao n ongo Ana reirei.”
Aio bon te tai ni kaoti bannara ma nanora ni kan tibwaua ana euangkerio Iesu Kristo. Aio bon aia tai ara kairake ni katauraoiia ni beku bwa taan anga reirei ke ni beku n anganano n te mition n ana taanga ni buaka te Uea. E kainnanoiko te aonaaba! Kakorakorai bubuaniwae aika aki konamaki, tabekirake baai, ao koaua n am anga reirei (taraa Reirei ao Berita aika Tabu 81:5).
Tera ke ti mwaing ao ni mwakuri nakon te kakao mairoun te Uea aei bwa ti na kaotiota te koaua ma korakora:
“Nooria, I tua nakoimi bwa kam riai n nako ni beku …
“Tabekaarake bwanaam n ai aron tangin te buu, ni katanoata te koaua ni kaineti ma taian kaotioti ma tuua ake I a tia n angani ngkami.
Ao, ngkana kam kakaonimaki … ao kam baunaki ma te karineaki, ao te mimitong, ao te aki maamate, ao te maiu ae akea tokina” (Reirei ao Berita aika Tabu 75:3–5).