Tamneiu e Tangiria ni kan Mena Ikekei

Iroun London Brinhall, ana Maekatin te Ekaretia

Te karaki are I matennanoia man koroboki aika tabu e kaeka kainnanou ni kan kaaniai nakon Tamau are i karawa ao Natina.

Tamnei

Kauaokin Iesu Kristo

Te Kauaoki, iroun Harry Anderson

N te taina ao I roko n te tembora ma teuana te titiraki ae mena i nanou: “Tamau are i karawa, e uara au kekeiaki n te euangkerio?”

N te wiiki anne ao I a kunea bwa kabwakau are I rinanona e bon taabangaki. Ai aron Nibwaai, I namakina te rawawata n te bure are mena irou. Ma, ai aron naba Nibwaai, I ataia bwa antai ae N na onimakinna. (Taraa 2 Nibwaai 4:18–19.) Au kaantaninga bwa kabanean au tai ma te Uea inanon Ana Auti n te moaningabong anne e na bon buokai ni kabua te namakin are irou.

I kakauongo raoi n tain te tetere n te entaumente ao n namakina te kakaitau ibukin te korakora ma te atatai are e anga nakoiu. Ma ngke I a rin inanon te ruu ae te Tiretio, I teimatoa n namakinna bwa e rawawata nanou. N na kanga n ataia bwa I tei irarikin te Uea?

I tekateka ao n iango inanona tabeua te miniti ao e roko, te namakin ni bwara n nano, ao ni moanna n teirake. Ma iai te bwai ae katikai ni kaokai, are e a tineai bwa N na tiku i aon au kaintekateka. “I aki kan nako,” I iango.

I taratara nako inanon te ruu ao n noora tamnein Iesu Kristo ae katobibiaki irouia anera, ma baina ni butimwaai nakoiu. E roko n au iango mwanewen te kibu teuana ae kangai: “Tamneiu e tangiria ni kan mena ikekei” (taraa Aramwa 36:22).

I karaua naba n iangoa raoi kakawakin te kibu aei ni karakinan Aramwa. Ibukin ana bure, ake ngkoa, Aramwa e iangoia bwa te tei imatan te Atua “bon te maaku ae aki kona ni kabwarabwaraki” (Aramwa 36:14). Ma i mwiin rairakina nakon Kristo, e noora te Atua ni katobibiaki irouia anera, ao “Tamneina e tangiria ni kan mena ikekei.” Iangoakin te kibu aei irou e bon rangi n tamaroa. Ana kekeiaki Aramwa ae uarereke n ukora te Uea e bon bita nanona.

I namakinna bwa I aki kan kitana te ruu ae te Tiretio, ai aron Aramwa, tamneiu e tangiria ni kan mena ikekei—n te tembora ao i mwiina ma Tamau are i karawa ao Iesu Kristo ni mweengau i karawa. E kauringai au kibu ae mamate nanou iai te Tamnei ae Raoiroi n tuangai bwa e noora nanou te Atua. I kauringaki bwa e ngae ngkana I kabwaka, e butimwaea au kekeiaki te Uea ni kan kaaniai ma Ngaia. E ataia bwa I tangiria ni kan mena ikekei.