“Ana Rongorongo te Atua Nakoiu,” Riaona, Turai 2024.
Bwanaaia Aika Itiaki ni Boong aika Kaitira
Ana Rongorongo te Atua Nakoiu
Akea au kakoaua n Ana Boki Moomon nikarokoa te Uea e taetae nakoiu rinanon ana boki Ereman.
Kariaia n te tamnei iroun te tia korokaraki
Ngke e kaoai raoraou nakon Ana Ekaretia Iesu Kristo ibukiia Aika Itiaki ni Boong aika Kaitira inanon 2020, I kariai ma te raraoma. N te moan, I aki nang namakinna bwa kanga te tabo ae I riai n mena iai, ma I bon reitinako n kaea te bootaki n toa. N tokina, I a bwabetitoaki.
I aki oota, ma e ngae n anne, te botoniango are karekean te kakoaua ae taekinaki irouia kain te Ekaretia. Ngai ma mitinare aika taian titita ti a tia n warekii tabeua kiibu man koroboki aika tabu, ma I bon tuai man kakauka Ana Boki Moomon ibon irou. E ngae ngke e nang korakora aia kakamwakuri membwa n te Ekaretia n butimwaeai ao ni kateimatoaai, inanon taina ao I manga ririmwi n roko n taromauri, I aki iriiri boowi ao n manga okira arou n maiuakina te maiu n rabwata.
Ao n te bong teuana ao I a namakina te bitaki ao ea rawawata nanou. I namakinna bwa I a tia n tiotionako, maiuakin te maiu n rabwata, ao ni kakauntabai bwaai aika kaineti ma te Atua. I ataia ae ea bure kawaiu. Inanon menau n te namakin aio, I tarai booki aika tabu ake iaon au kainiwene.
I wewete nakon te Atua bwa e na taetae nakoiu. I karaoa au tataro ae uarereke ao man tataninga ma bon akea te bwai ae I ongo. I kainnanoa karauakin nanou ao kaotaakiu.
Ngkanne I ongo te bwai teuana. I aki ataia bwa e kaoti mai iaa te bwai are I ongo bwa man au iango ke mai taningau, ma I ongo te taeka ae kangai “Ereman 3:27.” I ataia bwa ana boki Ereman e mena n ana Boki Moomon, ngaia are I anai au booki aika tabu ao I nakon te taibora ibukin kanoan te boki ni kakaea bwa mena iai.
Te bwai are I warekia imwiina bon te rongorongo mairoun te Atua nakoiu ibukin te tai anne inanon maiu: “Ikai are ti a nooria bwa e nanoanga te Uea nakoia ni kabane ake, a na wetea arana ae tabu, ma nanoia ni koaua.”
Te kibu aio e bita au taratara ibukin au mwakuri ao ibukin ana Boki Moomon. I noria bwa au mwakuri ao kakaitaraan te Atua e bure ao I tangiria n Weteia ao n raira nanou. I ataia bwa te Atua e na aki kakeai Ana nanoanga ao ana kakabwaia mairou ngkana arona bwa I Weteia ma nanou ae koaua ao n Iriiria.
Anne aron reken au kakoaua man ana Boki Moomon—te boki ae I aki tatabe ni kan warekia ngkoa. I ataia bwa maiu te Atua, ao E taetae nakoira n boong aikai, ao ana Boki Moomon e koaua.