Rongorongo ni Kairiiri man te Aono
Kinaakira ibon iroura e kakorakoraira n te maiu aei
Inanon uarerekera, ngai ma tariu ae uarereke ae Luke ti kakaingaa okin tamara man ana mwakuri. Ti oneira n oneara n matu ao ti ruo rikaaki n te kaintamwarake n taningaia bwa tina butimwaia n te karaati ngkana e roko. N taainako ao tamara e tutuangiira bwa e rang kukurei n noriira. E araraniira bwa ana “boto” E titirakiniira bwa e uara ara bong ao e uara tinara.
Tabetai e iremwe tamara n okira mweengara ao tia kamatuuaki iroun tinara ae moan te tamaroa. Inanon taai aikane ao e kawariira n ara ruu. Ti bubutiia n taainako bwa ena karaki ni kauaa matuura. Ti rang tatangirii ana karaki ni kaua matu. Ai bon rorongorongora naba ngaira, “Jared ao Luke” Kabanean raoi kakawakiia, bwa karaki aikai a momotikaki n te aro ae ti teuana n taainako. Jared ma Luke a rikirake bwa “ataeinimwaane aika tamaroa” ao a “mwananga n mitinare”.
Karaki aekaki aikai iai nanoia aika nano iaoia ataeinimwaane aika tabe n rikirake. Rinanon karaki aikai ao tamara e kakorakoraira bwa tina katurua kinaakira iroura iaon ana euangkerio Iesu Kristo, rikira bwa mwaane aika tamaroa aroia, ao arora ni kona n karaoia bwaai nako ake ti katuui ara iango iaoia. Ngkana ti mwamwananga n ara utu, ara karo aki toki n katuruturua nakoira bwa ngaira natin te Atua ao ti kona n tokanikai n bwaai ake ti kabotoi ara iango iaoia
I kakoauaa bwa taian karaki aikai a buoka karikirakean te nano matoa ao ni kakorakoraai ara namakin. Man reiakinara bwa antai raoi ngaira ao tera ara konabwai ae roko mai ieta, ara karo a katauraoira bwa tina karekea te nakoraoi ao te tokanikai iaon kataakira ma kangaanga nako inanon maiura.
Ngaira ni kabane natin te Atua. Ngkana ti oota raoi n kinaakira mai ieta, e na buokiira n tokanikai iaon kangaanga ao ti na kona n karaoia rinerine aika tamaroa riki. E buokiira n “iango n tiretio” bwa bukina ti aki ti oota bwa antai ngaira, ma ti oota naba n bukin rokora ikai ao e aera kai iai te kakaitara.
Beretitenti Russell M. Nelson e a tia n reireiniira teniua koaua aika kakawaki aika a na buokiira n katauraoi ibukin te maiu ae akea tokina:
-
Te moan, reiakina te koaua bwa antai raoi ngkoe.
-
Kauoua, reiakina te koaua bwa tera ae a tia ni katauraoia ibukim Tamam are i Karawa ao Natina.
Ngke e taetae Beretitenti Nelson “. . . arom n iangoia bwa antai raoi ngkoe e kona n rooti angiin am rinerine ake kona karaoi”. Beretitenti Nelson e a tia ni katerei teniua boton kinaakin te amata: ngaira natin te Atua, kauoua, ngkai membwa ngaira n te Ekaretia, ngaira natin te berita ae tabu, ao te kateniua, ngaira ana reirei Kristo. Kinaakira aika a karekea nakoira te rikirake n te maiu n tamnei nakon te “bonon iken tamneira”.
Ngke te rooia ngai ae kairake, I aki toki n kakaterea kinaakiu bwa ngai te “rooia”. Ma engae n anne, te karaoa te tua, ma tiaki ngai te tua. I kunea bwa kinaai bwa “ana reirei Kristo”, e toki kakakoroan maiu n te ekaretia, te mwakuri, mweengau, ao n tain waaki ni kakukurei ma I kabotoi au rinerine iaon au konabwai ae akea tokina. I kakoaua bwa ngai te kainaba, te tama, te rao, ao te roia ae e a tamaroa riki man anne.
Inanon riki aika bati n nako, ngke I Beretitenti n te titeiki, temanna ara bitiobi ae maeka i Christchurch e uruaki mwengana n tain te angibuaka ao e a mwamwaingiing inanon taai aika bati. I titirakina te mmwaane ae tamaroa aio bwa e kanga aron n keiakina uotana n tain te kangaanga aio. Inanon te tai anne, e kauringai bwa ngai ma ana utu ataia ae ngaiia natin te Atua, ao ake aia raraoma bwa ataia te Atua ena katauraoi bwaai ni kabane ibukiia ao ena tararuaia.
Reiakinaia natira bwa antai ngaiia ena buokiia n tauraoia ibukin te maiu are akea tokina. E taekinaki n Taeka n Rabakau 22:6: “Reireia te tei aroarona ae riai, Ao ngkana e a unim’ane ao e bon aki kitanna.”
Ngkana ti reiakiniia natira ana babaire Tamara are i Karawa n raonaki ma kinaakina ao konabwaia mai karawa, ti reireiniia bwa a tangiraki, bwa a kakawaki, ao konabwaia mai karawa n riki n ai aron Tamaia are i Karawa. Ngkana ti maiuakina ae kaineti raoi ma koaua aikai ti kaotia nakoia natira, kairake, ao kairake n ikawai bwa ti kona n tokanikai iaon kangangan te maiu ao n rikirake ao ni kukurei inanon maiuakinan ana euangkerio Iesu Kristo.
E taku Moomon, “Nooria bon Ngai ana reirei Iesu Kristo, are Natin te Atua, I a tia ni weteaki irouna bwa N na taekina ana taeka i buakoia ana botanaomata, bwa e aonga n reke irouia te maiu are aki totoki.” N te kibuntaeka aio ao Moomon e korakora tibwauaan kinaakina, ana kakoaua, ao boto n iango. Ngkai kairake a butimwaai ana taeka Moomon n te ririki aio, aki ti katomaia ma Tamara are i Karawa ao Iesu Kristo n aia mwakuri ae mai karawa ma e katamaroaki riki aia katauraoi ni kaitarai kangaanga ao kakaitara inanon te maiu ae mamate.
E aki tabe bwa ti kairake ke tia kara, ma ti riai n ururingii n tainako ana taeka n reirei ae korakora Unimwane Dieter F. Utchdorf:
“. . . konabwaira e aki reke man mwaitin te tai are ti tatanako iai ma man mwaitin te tai are ti teirake iai, taebubuira, ao n reitinako n waakinako.”