“Nna Kanga N Onimakina Tamau are i Karawa Ngkana I Namakinna Bwa I Tei N Ti Ngai?,” Riaona, Turai 2024.
Kairake n Ikawai
Nna Kanga N Onimakina Tamau are i Karawa Ngkana I Namakinna Bwa I Tei N Ti Ngai?
I kataia bwa ena iai au onimaki ma I a bon kakaitara naba ma kangaanga aika bati. Nna kanga n teimatoa n onimakina te Uea?
Kamataata n te tamnei iroun Kathleen Peterson
A katibooai ma mitinare ake ai tariu ngke ruaiwa au ririki. I kaaina Ana Ekaretia Iesu Kristo ibukiia Aika Itiaki ni Boong aika Kaitira ma bon ti ngai maibuakoia kain au utu ni kaainna. Man te tai anne, e rikirake irou tangiran ana euangkerio Iesu Kristo. Ma e ngae n anne, n te tai teuana, onimakinan Tamau are i Karawa ao Ana koaua e rawawata irou, ao I nang kekeiaki n kataia n teimatoa n waaki nako ma te onimaki.
Maiuakina ae kaokoro ma te aonaaba bwa ana reirei Iesu Kristo e rangi ni kangaanga n taabo nako, ma te ikawai rake i Hong Kong bwa te membwa n te Ekaretia e rangi ni kangaanga riki nakon are a kaantaningaia aomata.
Teuana bukina bwa, e mwaiti aomata n te aono aei ae a ribaa te Ekaretia bwa a taku bwa e irekereke ma bwaai aika buakaka. Te taetae n Tiaina ngkoa teuana ibukin “Moomon,” ngkana e taekinaki te Ekaretia, tangina e uakaan ma te taetae n Tiaina ibukin te “riaboro.” Irouia tabeman, e karika rairakin ana koaua te Ekaretia nakon bwaai aika buakaka.
Irarikin naba anne, bukina bwa e nang mwaiti riki aaro aika a tia n kaman tei ao e karako mwaitiia membwa n te Ekareti i Hong Kong, e nang aki kangaanga namakinan ae akea raom ke ko katinanikuaki. E mwaiti aomata aika a nano uoua n te Ekaretia, n aki oota raoi n ana reirei ao n aki kan anga taningaia n ongora nakon bwaai ake a kan tibwauaia taian membwa.
I namakina korakoran taian kakaokoro aikai ngke I kairake, ma man taian taneiaia aikai, I reiakina ae bati bwa tera ae nanonaki n onimakinan Tamau are i Karawa ao Iesu Kristo.
E Boongana Maiuakinan te Euangkerio?
N te kauarinan, au tia reirei temanna raoraoia au karo. Te tia reirei aio bon te Kiritian man te aro teuana. N te tai arei, bon ti ngai kaain te Ekaretia n au kiraati, ao e nang mwaiti raou n reirei ma au tia reirei aika a nano uoua n ana Ekaretia Iesu Kristo ao taian membwa iai.
Te tia reirei aio e rangi ni korakora kakewean au onimaki irouna, ngaia are e a nang karika te nakobuaka n ara waaki bwa are ai manga raoraoia au karo.
Teuana te katooto, I rang ni nimatutu n angiin te tai n ana kiraati bwa are I kakauti n nako ni kaeka te kauti n tieminari, are ea karika raraomana bwa mwiina I aki kona uotau n au bwai n reirei. E kataa rabakau ao ni kamwaningaa ma titiraki aika kaineti ma au koaua aika I aki atai rekeia. E katabeai bwa nna warekii koroboki aika kabuakaka te Ekaretia bwa mwakoron au reirei! E kataa ana kabanea ni konaa bwa n na kiitana au onimaki.
Aio bon te tai ae e kataaki iai au onimaki. Bukin tera, ngkai I rang ni kekeiaki n kaniiai nakon Tamau are i Karawa ma Iesu Kristo, ao teimatoau e uotii riki kataakin ma kangaanga nakon maiu? Tiaki n ae nna riai ni kakabwaiaki n kawakinan taian tua ao ni kukurein nanou n aki momoti matuu ibukin au kauti nako n tieminari?
Ma te bwai ae e riki, e a rikirake n buakaka au kekeiaki n te reirei, au onimaki e a memere, ao reitakiu ma au tia reirei, au utu, ao Tamau are i Karawa a rootaki.
Inanon te tai ae uarereke, I a tabe n iangoia bwa ai bon akea uaan maiuakinan te euangkerio. I aki iriira te tieminari ao inanon taina ao I a namakina au onimaki bwa tabe n bua. E taraa riki n bebete ae nna ira are e tangiria te aonaaba bwa nna karaoia.
Rinean te Onimaki
I teimatoa n tataro nakon Tamau are i Karawa ibukin te kairiiri ao te oota. E ngae ngke e korakora te mangaongao ao te kai n nano ae I namakinna ibukin te bwai are I a mena inanona, iai te bwai inanou ae e teimatoa n onimaki. I marooro ma raoraou ake a kakaonimaki ao n kaotii au kangaanga nakoia raoraou man te ekaretia ibukin te bwai are I a rinanona, ao I kaungaaki bwa nna marooro ma au tia reirei n te tieminari ibukin au kangaanga.
E butimwaeai ma te tangira ao ni kaungaai bwa nna teimatoa n iriira te tieminari ma te nano n kakaantaninga. E berita nakoiu bwa nna noori kakabwaia ngkana I teimatoa n taua au onimaki ao n onimakina te Uea bwa iai aika mwaiti ae e a tia n katauraoi ibukiu ao e na katabui au kangaanga.(taraa 2 Nibwaai 2:1–2).
Ngaia are, e ngae ngke e mwaiti kangaanga ake I aitara ma ngaia, I rineia bwa nna onimaki.
Imwiin tabeua te tai, I a namakina bwa e a bitaki anuau. I aki kabotoa au iango iaon kangaanga ake i kaitarai, ma I a kabotoa au iango iaon namakinan te kakaitau ibukin te euangkerio. I a waaki ni kabotoa au iango iaon kakabwaiakiu n au utu, kinaakiu mai karawa, ao taian koaua aika akea tokiia n te euangkerio. Ao n tokin te tai, I a karekea te atatai bwa Tamau are i Karawa ao Iesu Kristo a ataa te bwai are i rinanona ao a teitei irarikiu n taainako n taai ake I namakinna bwa I maroaa.
Aio e bitii bwaai ni kabane.
I reitinako n katuka au onimaki Irouia, ni kawakin tuua, n raraira nanou ni katoa bong, ao ni karaoi bwaai aika uarereke ni katoa bong are ana tomaai Nakoia, I namakinna bwa aan au onimaki e a nano ao ni korakora.
E a bon tibwa tia naba n taekinna Beretitenti Russel M. Nelson: “Tararuaa oin am kakoaua iroun Iesu Kristo ao Ana Euangkerio. Mwakuriia. Nabeia bwa e aonga n rikirake. Boutokaa koauana. Tai kabaerekaa n aia aki kakoaua mwaane ao aine. Ngkai ko reitinako ni kamatoaan am koaua iroun Iesu Kristo bwa am moanibwai, taratarai kakai ake a na riki inanon maium.”
Ao ngke I karaoia, ao e riki te kakai.
Tera Ae Nanonaki n Onimakinan te Uea
Imwiin tabeua te tai n aki kan marooro ma au tia reirei ibukin au onimaki, ao te bong teuana ngke e a manga kawarai naba ma ana titiraki, I a namakinna bwa I a tauraoi n kaekai ma au onimaki are ea tia ni kaboouaki. I titirakinna ngkana e a tia n kaekaea teuana maibuakon ara bootaki n taromauri ke n wareka ana Boki Moomon. Ngke e kaeka bwa e tuai, I namakinna bwa nna kaota au kakoaua nakoina rinanon koaua aika bebete.
I tuangnga bwa ko bon aki kona n ataia bwa e koaua te bwai ngkana ko bon tuai rinanona mai mwaina ke ngkana ko aki ukorii kaekaaia ibon iroum. I kabwarabwara bwa I ataia bwa te euangkerio e koaua bwa I a tia n mwakuriia kaekana ao n namakinna inanou bwa e bon koaua. I kaoia bwa ena karaoia naba, ao man te tai anne, e a nakoraoi reitakira.
Kataakin au onimaki aio ngke I kairake ea tia ni katauraoai raoi bukin maiu n riki bwa ana reirei Iesu. I a tia n noori kakabwaia aika mwaiti ao berita aika kakoroaki nanoia ngke I reitinako n onimakina te Uea n aki tabe ma aia taeka aomata. E taku Niibwai, “O te Uea, I a tia n onimakiniko, ao N na onimakiniko n aki toki. N na aki katoka au onimaki iaon te iriko” (2 Nibwaai 4:34).
Ngkana aki nakoraoi bwaai ni kaineti ma are ti a tia n baireia ke ngkana ti kaitara ma kangaanga aika tiaki kantaningai, e bebete namakinana bwa Tamara are i Karawa e bweena kawaira nakon ae kairua kee ea kitaniira, ke e aki tabe ma ngaira.
Ma e aki koaua anne.
Ma ni koauana, inanon taai ni kamino nano ma kauruaki nano aikai ao I kauringaki n ae nanonaki n onimakinan te Uea n ae bwanin. Nna karika rikiu bwa ana reirei Iesu ao au onimaki bwa ana kakawaki ao n bita-maiu ao n aki riki bwa waaki aika akea nanoia. E reireiniira Beretitenti Nelsoon, “Ami onimaki ae marurung e na buokiko n rairi kakaewenako nakon waaki n rikirake.”
I kona n nora bwa e kanga rinean onimakinan Iesu Kristo ni kakabwaiaai n angaa aika a bati ao ae riaon are I kaantaningaia. Tiaki nanona bwa nna aki rinanon te nanokawaki, te kangaanga, ke te mangaongao, ma e nanonaki n ae e na iai te tabo ae nna katan nako iai ibukin karekean te rau ao kateimatooakiu.
E kauringiira ma te tangira Beretitenti Nelson, “Taiaoka kam riai n ataa aei: Ngkana a kaki baia bwaai ni kabane ke aomata ake ko onimakinia, Iesu Kristo ao Ana Ekaretia a na aki kaki baia mai iroum.”
Tera nako are ko aitara ma ngaia inanon maium, tao iango aika aki koro nanoia, kairoroakim man te aonaaba, kangaanga n am utu, kangaanga n aitara ma marurungin am iango, kangaanga ma te mwane, te uruaki n nano, te babakanikawai, ke kangaanga riki tabeua, I kaoiko bwa kona teimatoa n onimakina te Uea. E atai aki raun nanom. E kinako. E mwaiti kakabwaia aika tamaroa ae E na anganiko. Inanon naba taai aikai ngkana ko aki kan Onimakinna, rineia bwa kona karaoia. A koaua Ana berita. E na kairiko nakon te kimwareirei, te kaantaninga, ao kakai inanon taina.
E kakaraoa anne ibukiu ngkai I teimatoa n Onimakinna.