“Napanalanginan tungod sa Akong Pagkamatinuoron,” Liahona, Ago. 2024.
Mga Tingog sa mga Santos sa Ulahing mga Adlaw
Napanalanginan tungod sa Akong Pagkamatinuoron
Natintal ko sa paghipos sa sobra nga kwarta, apan nahinumdom ko sa tambag gikan sa akong bishop.
Paghulagway pinaagi ni Allen Garns
Niadtong 2012, wala koy trabaho. Ang akong mga paningkamot sa pagpangita og trabaho pakyas. Sa kataposan, kinahanglan kong mangutang og mga $28 sa Nigerian nga kwarta aron makapalit sa akong temporal nga mga panginahanglan.
Ang kantidad gipadala ngadto sa akong account sa usa ka lokal nga bangko. Sa dihang nadawat nako ang pahibalo sa transaksyon, miadto ko sa bangko. Gisulatan nako ang slip sa bangko ug gitunol ngadto sa cashier. Ang cashier misusi sa mga detalye sa transaksyon sa iyang computer ug matinahorong misulti nako nga molingkod.
Mga lima ka minuto gitawag ko niya ug migamit sa currency counting machine sa pag-ihap sa akong kwarta. Dayon iyang gitunol nako ang $280—dili $28! Naglibog, mihunong ko og kadiyot nga daghan kaayo og gihunahuna.
Nakamatikod sa akong pagduhaduha, ang cashier miingon, “Kinahanglan na nakong moserbisyo og laing kustomer karon.” Nagpahiyom, ako miingon, “Gihatagan ko nimo og sobra nga $252.” Dayon akong gitunol ang sobra nga kwarta.
Malipayon kaayo siya. Mipasabot siya nga kon ako mibiya pa dala ang kwarta, ang sobra nga kantidad nga iyang gihatag nako kuhaon gikan sa iyang kaugalingong suweldo.
Nanamilit ko niya, apan sa akong pagbiya sa bangko, usa ka hunahuna misulod sa akong alimpatakan: “Ikaw gago kaayo. Ang kwarta nga imong giuli makatabang unta nimo sa pagbayad sa pipila sa imong mga balayronon.”
Apan nahinumdom dayon ko sa tambag gikan sa akong bishop. Siya miingon, “Kon ikaw gihagit o gitintal, kantaha ang imong paborito nga mga himno.” Mao nga nagsugod ko sa pagkanta sa “Manunubos sa Israel,” “Pagdayeg sa Tawo,” ug “Ako Anak sa Dios.”
Paglabay sa pipila ka semana, nakadawat ko og sulat gikan sa usa ka organisasyon nga miinterbiyo nako mga tulo ka bulan na ang milabay alang sa bakante nga opisyal sa bodega. Nakahukom sila sa pagkuha nako. Niining bag-o nga trabaho, nakahimo ko sa pagbayad sa akong mga balayronon ug pag-atiman sa akong temporal nga mga panginahanglan.
Si Jesus miingon, “Kinsa kadtong kasaligan sa gagmayng butang, kasaligan usab sa dagko: Ug kinsa kadtong limbongan sa gagmayng mga butang, limbongan usab sa dagko” (Lucas 16:10). Ako mopamatuod nga ang pagkamakanunayon, hugot nga pagtuo diha sa Ginoo nga si Jesukristo, ug kaligdong mopasarang nato sa pagdawat og buhong nga mga panalangin.