Pagkaplag og Kahupayan diha ni Jesukristo

Niini nga bulan sa atong pagtuon sa Dali, Sunod Kanako, mabasa nato ang mahitungod sa usa ka espesyal ug talagsaong kasinatian: ang nabanhaw nga Kristo nagbisita sa Amerika ug nagdapit sa mga Nephita nga “tindog ug duol kamo ngari kanako, aron kamo mohikap pinaagi sa inyong kamot sa akong kilid, ug usab kamo mobati sa mga agi sa lansang sa akong mga kamot ug sa mga tiil, nga kamo masayod nga Ako mao ang Dios sa Israel, ug ang Dios sa tibuok yuta, nga gipatay tungod sa mga sala sa kalibotan” (3 Nephi 11:14).

Sama sa Iyang gibuhat ngadto sa mga Nephita, si Jesukristo nagdapit sa matag usa kanato sa pagduol ug pag-angkon og personal nga kasinatian uban Kaniya ug pag-ugmad og may pakigsaad nga relasyon uban Kaniya. Mapasalamaton kaayo ko nga Siya nahigugma kanato niini nga paagi ug nagtinguha nga makauban kanato. Tungod Kaniya, dili gayod kita mag-inusara. Sa akong artikulo, akong gipakigbahin nga “angay kitang makig-uban sa Ginoo sa gamhanan nga paagi pinaagi sa atong mga pakigsaad” (pahina 44). Samtang moduol kita Kaniya pinaagi sa atong inadlaw-adlaw nga mga pagpili sa pagtuman sa sagrado nga mga pakigsaad, makaugmad kita og relasyon ngadto kang Jesukristo nga magdala sa Iyang gugma ug kahupayan sa atong mga kinabuhi ug sa mga kinabuhi sa atong mga pamilya.

Gipahinumdoman kita ni Jesukristo pinaagi sa pagsul-ob sa garment sa templo human nga kita natugahan, mipasabot si Presidente Jeffrey R. Holland diha sa iyang artikulo “Ang Garment sa Balaang Pagkapari” (pahina 4). Nagpakigbahin siya sa saad sa Unang Kapangulohan nga ang pagtuman sa atong mga pakigsaad ug ang pagsul-ob sa garment makahatag nato og mas dako nga paagi sa paggamit sa proteksiyon ug gahom sa Manluluwas.

Mopamatuod ko nga ang atong Langitnong Amahan ug ang Manluluwas nahigugma kaninyo ug nga si Jesukristo mianhi alang niini mismo nga katuyoan: aron sa pagdala kanato og paghupay nga atong gitinguha. Si Jesukristo ang kahupayan.

Matinuoron,

Kristin M. Yee

Ikaduhang Magtatambag sa Kinatibuk-ang Kapangulohan sa Relief Society

Si Jesus nga nag-ayo sa buta nga lalaki — “Samtang ania pa ako sa kalibotan, ako ang kahayag sa kalibotan.”

“Human niyag sulti niini, si Jesus nangluwa sa yuta ug naghimog lapok ginamit ang laway, Unya gihidhiran niya sa lapok ang mata sa tawo,

“Ug giingnan, Lakaw, panghilam-os didto sa Linaw sa Siloam. … Busa milakaw ang tawo ug nanghilam-os ug unya mibalik siya nga makakita na.”