“Ang Garment sa Balaan nga Pagkapari,” Liahona, Sept. 2024.
Ang Garment sa Balaan nga Pagkapari
Isip kabahin sa pagtuga sa templo, kita gihatagan og usa ka sagrado nga pisikal nga pahinumdom sa atong mga pakigsaad—usa ka simbolo sa Manluluwas Mismo.
Detalye gikan sa Adam and Eve [Adan ug Eva], ni Douglas M. Fryer
Dili igsapayan ang pagpangandam nga sa walay pagduhaduha gihatag kanila ug ang mga pasalig nga ilang gipaningkamotan nga hinumdoman, seguradong nakapakurat kini kang Adan ug Eva ang pagbiya sa ilang paraisong Tanaman sa Eden ug paggawas ngadto sa usa ka napukan nga kalibotan.
Diha sa ligdong nga pagkaamgo, ilang nahimatngonan kon unsa ang gipasabot sa pagbaylo sa ilang malinawon, walay kabalaka nga kinabuhi ngadto sa usa ka kalibotan sa oposisyon ug singot, mga tunok ug kasubo—gisundan sa kataposan sa usa ka butang nga gitawag og kamatayon. Wala unta sila mahibalo sa sinugdanan kon unsa ang gipasabot niining tanan, apan sa wala madugay ilang nakat-onan nga ang matag adlaw makahatag og bag-ong kasakit. Sa pagkatinuod, ang labing sakit sa tanan mao ang pagkaamgo nga ilang atubangon kining tanan nga nahimulag sa ilang Amahan sa Langit—“gipahilayo gikan sa iyang atubangan,” si Moises sa ulahi magrekord.
Tungod niini nga panagbulag ug kamingaw diha sa usa ka masulob-on, magul-anon nga kalibotan, unsa ka makahupay alang kang Adan ug Eva ang paghinumdom sa usa ka butang: nga ang mga saad nahimo—usa ka butang nga sagrado ug mahangtoron nga gitawag og mga pakigsaad. Sila misaad nga sila mosunod sa Amahan sa tanang adlaw sa ilang kinabuhi, ug Siya misaad sa paghatag og usa ka Manluluwas, kinsa mohupay sa ilang kasakit ug kasubo, mobayad sa ilang mga sayop, ug modala kanila nga luwas balik ngadto sa Iyang presensya.
Apan sa unsang paagi kini nga mga mortal makahinumdom sa ilang gisaad? Sa unsang paagi sila magpabilin nga makaamgo sa ilang makuyaw nga kahimtang—makaamgo sa tanang panahon, adlaw ug gabii?!
Usa ka Pahinumdom sa Ilang mga Pakigsaad
Alang sa maong pahinumdom mihatag Siya kanila og “mga kupo nga mga panit.” Pagkanindot nga gasa ug unsa ka tukma sa panahon. Human og kaon nila ni Adan ug Eva sa gidili nga prutas, hapit dihadiha dayon sila nakabantay nga sila hubo. Una, sila naningkamot sa pagtabon sa ilang pagkahubo og mga dahon sa igos. Dayon, nahadlok nga dili pa igo, sila misulay sa pagtago gikan sa atubangan sa Ginoo. (Ang ingon nga usa ka binuang nga paningkamot mao ang ebidensya nga miepekto na ang pagkamortal!) Gikan nianang higayona hangtod karon, ang usa ka mahigugmaon nga Amahan midapit sa Iyang mga anak sa pagduol, gikan sa pagtago, ngadto Kaniya. Ug sama sa mga kupo sa mga panit kaniadto ug lainlaing mga butang sa bisti sukad, Siya sa Iyang kalooy wala mobiya kanato nga hubo apan mipasul-ob sa masulundon sa usa ka “kupo sa pagkamatarong,” usa ka pahinumdom sa atong mga saad ug mga pakigsaad. Kining “mga garment sa kaluwasan” nagsimbolo sa labing dako nga gasa sa tanan, ang Pag-ula ni Jesukristo.
Ang Garment usa ka Simbolo sa Manluluwas
Buyno, kining tanan nga panghunahuna mahitungod ni Adan ug ni Eva ug sa mga pakigsaad ug bisti, siyempre, labaw pa sa usa ka ehersisyo sa pangisip. Dili lisod ang paghunahuna unsa ang gibati ni Adan ug Eva, tungod kay kita nag-atubang usab sa kasamok niining napokan nga kalibotan. Kita usab nahibulag gikan sa presensya sa Dios, ug mas gipalayo nato ang atong kaugalingon matag higayon nga kita makalapas. Sama ni Adan ug ni Eva, gihatagan kita sa sama nga Manluluwas, si Jesukristo sa Nazaret, ang Alpa ug Omega, ang Anak sa buhi nga Dios. Sama ni Adan ug ni Eva, kita mihimo og mga pakigsaad ngadto sa Dios. Ug, isip kabahin sa pagtuga sa templo, kita gihatagan og usa ka sagrado nga pisikal nga pahinumdom sa atong mga pakigsaad—usa ka simbolo Mismo sa Manluluwas. Sa atong panahon gitawag kini og ang garment sa balaan nga pagkapari.
Ato kining isul-ob ang garment ilawom sa sinina. Bisan unsa pa ang akong mga responsibilidad, bisan unsa ang akong tahas sa kinabuhi, bisan unsa ang gikinahanglan sa mga katungdanan sa inadlaw-adlaw nga pagkinabuhi, ubos niining tanan mao ang akong mga pakigsaad—kanunay ug hangtod sa kahangtoran. Ubos niining tanan mao kadtong sagrado nga mga saad nga akong gikuptan pag-ayo. Ang garment dili ipasigarbo o ipakita sa kalibotan, ug ni ang akong mga pakigsaad. Apan kining duha akong gipabiling duol kanako—sa kaduol nga kutob sa akong mahimo. Sila hilabihan ka personal ug hilabihan ka sagrado.
Sa paghinumdom niadtong mga pakigsaad, kadtong duha ka paagi nga mga saad, atong sul-obon ang garment sa tibuok natong kinabuhi. Kini nga buhat nagpakita sa atong tinguha nga ang Manluluwas mahimong kanunay nga impluwensiya sa atong mga kinabuhi. Ang ubang mga minahal nga mga simbolo nagdepende sa panahon [periodic]. Kita gibunyagan kausa sa atong mga kinabuhi. Kita moambit sa sakramento kausa sa usa ka semana. Motambong kita sa templo kon itugot sa mga sirkumstansiya. Apan ang garment sa balaan nga pagkapari lahi: kini nga simbolo atong gitahod kada adlaw ug gabii.
Ug ingon niana ang mga pakigsaad—dili ihiklin tungod sa kasayon o kawalay pagtagad ug dili usbon aron mohaom sa mga estilo ug uso sa katilingban. Sa kinabuhi sa usa ka disipulo ni Jesukristo, ang mga pamaagi sa kalibotan kinahanglang usbon aron mahiuyon sa atong mga pakigsaad, dili sa laing paagi.
Sa dihang isul-ob nato ang garment, kita, sama sa gitudlo sa Unang Kapangulohan, nagsul-ob sa usa ka sagrado nga simbolo ni Jesukristo. Kon ingon niana ang kahimtang, nganong mangita pa man kita og pasangil aron kuhaon kana nga simbolo? Ngano nga atong ihikaw sa atong mga kaugalingon ang saad sa gahom, panalipod, ug kalooy nga girepresentaran sa garment? Sa laing bahin, sa matag higayon nga kita kinahanglan nga temporaryo nga magtangtang sa garment, kita kinahanglang matinguhaon nga isul-ob kini pag-usab, sa labing dali, tungod kay kita mahinumdom sa mga saad ug sa mga kapeligrohan nga naghatag og kahulogan sa atong mga pakigsaad. Labaw sa tanan, kita mohinumdom sa krus ug sa walay sulod nga lubnganan ni Kristo.
Ang uban posible nga mosulti og, “Anaa akoy laing mga paagi sa paghinumdom ni Jesus.” Ug ako motubag, nindot kana. Mas daghan mas maayo. Kitang tanan maghunahuna og daghang paagi kutob sa atong mahimo sa pagtuman sa atong pasalig nga “kanunay mahinumdom kaniya.” Apan sa pagbuhat sa ingon, dili matinud-anon ang tinuyo nga pagpasagad sa pahinumdom nga gihatag mismo sa Ginoo ngadto sa gitugahan, ang garment sa balaang pagkapari.
Si Jesukristo ug ang Iyang ebanghelyo mahinungdanon alang kanako. Ang tanan nakong mahangtoron nga paglaom ug pangandoy, ang tanan nga akong gimahal, gisalig ngadto Kaniya. Siya mao ang akong “lig-on nga sukaranan sa kaluwasan,” ang akong paagi sa pagduol sa akong Langitnong Amahan, ang akong bugtong paagi balik sa unsay naa nako kaniadto ug karon gusto nakong maangkon pag-usab, uban sa daghan pa. Ang Iyang gasa ngari kanato mao ang labing mahatagon nga akong nadawat sukad, ang labing mahatagon nga gihatag sukad—gipalit ingon nga kini uban sa walay kinutoban nga pag-antos, gipaabot ngadto sa walay kinutoban nga gidaghanon, gihatag uban sa walay kinutoban nga gugma. Ang mga sampinit ug mga sagbot, ang kasakit ug tumang kaguol, ang kasubo ug sala niining napukan nga kalibotan “gituhop diha kang Kristo.”
Busa akong gisul-ob ang garment sa balaang pagkapari—kada adlaw ug gabii kon angay sukad nga natugahan ko 64 ka tuig na ang milabay, sa edad nga 19—tungod kay gihigugma nako Siya ug tungod kay nagkinahanglan ko sa mga saad nga girepresentar niini.
Mga Pangutana mahitungod sa Pagsul-ob sa Garment?
Pipila kaninyo mahimong nagbasa niini nga artikulo nga naglaom nga akong tubagon ang piho nga pangutana mahitungod sa garment. Mahimo kang maglaom sa usa ka “Sa ingon miingon ang Ginoo”—o bisan usa ka “Sa ingon miingon ang Iyang mga sulugoon”—sa usa ka butang nga duol sa inyong kasingkasing. Ang imong pangutana mahimong maggikan sa usa ka personal nga kahimtang nga may kalabotan sa trabaho, ehersisyo, kahinlo, klima, kaligdong, malinis nga pasilidad, o bisan usa ka medikal nga kondisyon.
Ang pipila ka tubag niini nga mga pangutana makita diha sa temples.ChurchofJesusChrist.org ug diha sa seksiyon 38.5 sa Kinatibuk-ang Tamdanan nga Basahon. Ang kasaligan nga mga miyembro sa pamilya ug mga lider mahimong konsultahon bahin sa usa ka personal nga butang. Apan, adunay, klaro kaayo nga direksyon nga gihatag diha sa mga ordinansa sa initiatory, ug anaa hangtod sa kahangtoran ang imong Amahan sa Langit, kinsa nakaila kanimo ug nahigugma kanimo ug nakasabot sa tanan mahitungod sa imong mga kahimtang. Siya malipay nga ikaw mangutana Kaniya niini nga mga pangutana sa personal.
Litrato sa tumoy sa templo sa St. George Utah Temple
Palihog ayaw sayopa sa pagsabot. Samtang mangayo ka alang sa balaanong giya, ang Espiritu dili modasig kanimo sa pagbuhat og menos kay sa pagsunod sa panudlo nga nadawat diha sa templo ug sa propetikanhong tambag nga gipakigbahin sa Unang Kapangulohan sa ilang bag-ong pamahayag. Ang usa ka mahigugmaong Amahan dili motabang kanimo sa pagpangatarongan sa pagbuhat og mas menos kay sa imong mahimo aron sa pagpahiuyon sa Iyang mga sumbanan sa debosyon ug kaligdong nga mopanalangin kanimo karon ug sa kahangtoran. Apan nakasabot ba Siya sa imong mga pangutana, ug motabang ba Siya kanimo nga makadawat sa mga panalangin sa pagtahod sa garment ug pagtuman sa imong mga pakigsaad? Oo! Kinahanglan ba usab nga mokonsulta ka sa may katakos nga mga propesyonal sa medikal ug sa kahimsog kon gikinahanglan? Siyempre! Angay ba nimong isalikway ang sentido komon o motan-aw lapas sa marka? Ako nag-ampo nga dili ninyo buhaton.
Dili ako makatubag sa inyong matag pangutana. Dili gani ako makatubag sa matag pangutana nga ako aduna. Apan ako makahimo, isip usa ka Apostol ni Ginoong Jesukristo, sa pagsaad kaninyo sa tabang sa usa ka mahigugmaong Dios, kinsa nagtinguha sa inyong matag kalamposan ug panalangin, sa mga paagi nga dili ninyo karon matugkad o malantaw, samtang inyong gituman ang mga pakigsaad nga inyong gihimo uban Kaniya.