“Garment eo an Priesthood eo Ekwojarjar,” Liaona, Jept. 2024.
Garment eo an Priesthood eo Ekwojarjar
Āinwōt juon m̧ōttan mennin letok kwojarjar eo, em̧ōj letok n̄an kōj juon kakeememej eo epen kōn bujen ko ad—juon kakōļļe in Rilo̧mo̧o̧r Emake.
Kōmeļeļe ko jān Adam im Iv, jān Douglas M. Fryer
Jekdoon kōppopo ko im kar ilo m̧ool kōm̧m̧an im jon̄an aer kar kajjieon̄ keememej n̄an bōk lōke, eaar maron̄ kar juon menin bwilōn̄ n̄an Adam im Iv n̄an etal jān jikin kallip Eden eo elukuun aiboojoj im diwōjļo̧k n̄an juon laļ in jab wānōk.
Kōn juon jeļā eo epen, rekar kile m̧eļeļein n̄an likūt mour eo aer im ej jo̧kne, inem̧m̧an n̄an juon laļ in jum̧ae im menokadu, kālōkōk im liejļo̧ļ—rej tokālik tōl ļo̧k n̄an juon men ņa etan mej. Rekar jab maron̄ kar jeļā ilo kar jinoin ta m̧eļeļein men kein wōj, ak ejjab to rekkar katak bwe kajjojo raan emaron̄ boktok menin kaen̄tanaan ko rekāāl. Em̧ool, men eo eaar kabūrom̦ōjtata kar ilo aer jeļā bwe renaaj jelm̧ae aolep men kein ilo aer jenolo̧k jen Jemeer Ilan̄—“m̧wijkōkļo̧k jān im̧aan mejān Anij,” Moses enaaj tokālik jeje kake .
Reim̧aanļo̧k n̄an jenolo̧k im ajjimakeke in ilo juon laļ eo apan̄, kaen̄tanaan, ewi jon̄an kaenōm̧m̧an eo ilo an Adam im Iv kar maron̄ ememej juon men: bwe kallim̧ur ko em̧ōj kar kōm̧m̧an—juon eo ekwojarjar im ej n̄an indeeo ņa etan bujen ko.” Rekar kallim̧ur bwe renaaj kar pokake Jemed ilo aolep raan in mour ko aer, im E ekar kallim̧ur n̄an boktok juon Rilomo̧o̧r, eo enaaj bōk ioon e metak im būromōj, pinmuur kōn bwōd ko aer, im karo̧o̧l ļo̧k er n̄an Ippān ilo kōjparok.
Ak ekōjkan an armej rein maron̄ keememej kallim̧ur ko aer? Ewi wāween aer dāpdep im jeļā kake jekjek eo aer ekauwatata—jeļā ilo aolep iien, raan im bon̄?!
Juon kakeememej kōn Bujen ko Ad
Āinwōt juon kein kakeememej E eaar leļo̧k “nuknuk n̄an liboboik ānbwinnier.” Juon kar menin leļo̧k eo ejenolo̧k im kar jejjot kitien. Ālkin wōt aer kar m̧ōn̄ā jen leen wōjke kar kemoiki, Adam im Iv rekar m̧ōkaj aer jeļā bwe rekelwaan. Ilo jinoin, rekar kajjieon̄ kaliboboik ānbwinnier kōn bōllōk in wōjke. Tokālik, kōn aer mijak n̄e rej likjab wōt, rekar kajjieon̄ in tilekeek jān Irooj. (Wāween in e bwebwe eaar juon kakōļeļ bwe mour in wabanban im mej eaar jino bōk jikin!) Jān tōre eo n̄an rainin, Jemed eo ej iakwe kōj ekar kūr ajri ro Nejin n̄an itok, waļo̧ktok jān kitileekek, n̄an Ippān. Im kōn kūlin menin mour ko rekar kaliboboik ānbwiner tōre ko im ko jet kōjerbali āinwōt nuknuk m̧aantak jen iien ko, E kōn an tūriam̧o̧ ekar jab kōtļo̧k bwe jen kelwaan bōtaab kar kanuknuk ro rej pokake kōn juon “nuknuk eo ekwojarjar,” juon kakeememej kōn bujen im kallim̧ur ko ad. “Garment in lomo̧o̧r” kein rej kakōļļe in menin letok eo eļap im aorōktata, Pinmuur eo an Jisōs Kraist.
Garment Eo Ej Kakōļļe in Rilomo̧o̧r.
Ekwe, aolep ļōmņak kein kōn Adam im Iv im bujen ko im nuknuk rej, aaet, jet ko raorōkļo̧k jān baj kōļmenļo̧kjen kaki wōt. Ejjab pen n̄an ad kōļmenļo̧kjen kake wāween eo Adam im Iv rekar en̄jake, kōnke kōj jej barāinwōt jelm̧ae apan̄ ko ilo mour in jata in. Kōj barāinwōt em̧ōj ad bar jenolo̧k ļo̧k jān im̧aan mejān Anij, im jej kōttoļo̧k kōj make aolep iien jej jerawiwi. Āinwōt Adam im Iv, em̧ōj letok n̄an kōj ejja Rilo̧mo̧o̧r in wōt, Jisōs Kraist jān Nazareth, Alpha and Omega, eo Nejin Anij eo ej mour. Āinwōt Adam im Iv, jekar kōm̧m̧an bujen ko ippān Anij. Im, āinwōt juon m̧ōttan mennin letok kwojarjar eo an tampeļ, em̧ōj letok ad juon kein kakeememej eo ekwojarjar im pen kōn bujen ko—juon kakōļļe in Rilo̧mo̧o̧r Make. Ilo raan kein ad jej ņa etan garment eo an priesthood eo ekwojarjar.
Jej kōņake garment in itulowaan nuknuk ko ad itulūk. Jabdewōt eddo ko aō, jabdewōt jerbal ko ij kōm̧m̧ani ilo mour in, jabdewōt jerbal ko remenin aikuij n̄an kajjojo raan, tumwilaļ in men kein wōj ej pād bujen ko aō—aolep iien im n̄an indeeo. Tumwilaļ in aolep men kein ej kallim̧ur ko rekwojarjar im ij lukkuun kate eō n̄an dāpdep n̄ani. Garment eo ejjab emmejaja ak waļok n̄an kemjāje im̧aan mejen laļin, im ejja āinwōt in n̄an bujen ko aō. Bōtaab ij dāpij tok aoleper ippa—im kepaaki n̄an eō jon̄an wōt ao maron̄. Rej kanooj in ekwojarjar im aorōk ippa.
Ilo ad kakeememej bujen ko, kallim̧ur kein im rej jerbal ippān doon, jej ekkōņak garment ilo aolepen mour ko ad. Wāween in ej kwaļok ikdeleel eo ad ilo Rilo̧mo̧o̧r bwe en juon eo ej unjen kōm̧m̧an oktak ilo mour ko ad. Kakōļļe ko jet raorōk rej jenolo̧k ilo iien ko aer. Jej peptaij juon alen ilo mour ko ad. Jej bōk kwojkwoj eo juon alen ilo kajjojo wiik. Jej etal n̄an tampeļ eo ilo iien ko rekkar im jejjōt. Bōtaab garment eo an priesthood eo ekwojarjar ejenolo̧k: kōkaļļe in jej kautiej e kajjojo raan im bon̄.
Im en̄iin ej wāween ko an bujen ko—rejjab jenolo̧k kōn kōņaan ko ak jūrilo̧k in jerbal im rejjab kōkaduikļo̧k pedped ioon style im kōl ko an juon jukjukin pād. Ilo mour an juon rikaļoor an Jisōs Kraist, wāween ko an laļin rej aikuij oktak im ļoor wōt karōk ko an bujen ko an, jab āinjuon.
N̄e jej kōņak garment eo, kōj jej, āinwōt an Būreejtōnji eo Kein Kajuon katakin, jej kōņak juon kakōļļe ekwojarjar an Jisōs Kraist. Ilo wāween in, etke jenaaj tin maron̄ jekpen ņae n̄an witikļak kōkaļļe in? Etke jenaaj tin make kōjekdoon kōj jen kajoor in kallim̧ur, kōjparok, im tūriam̧ eo garment in ej bōk jikin. Ijoke, jabdewōt iien jej aikuj bwe jen witikļak garment eo ilo jet iien, jej aikuij m̧akaj in bar kōņake, ilo iien eo em̧ōkajtata, kōnke jej keememej kallim̧ur im kauwōtata ko me ej letok eļap meļeļe ko n̄an bujen ko ad. Ilōn̄ in men otemjej, jej ememej debwāāl im lōb eo ejjeļo̧k kobban an Jisōs Kraist.
Jet remaron̄ ba, “Ewōr jet wāween ko ippa n̄an keememej Jisōs.” Innām inaaj uwaak, elukkuun em̧m̧an. Eļapļo̧k an em̧m̧an n̄e ej lōn̄ļo̧k. Jen aolep ļōmņak kōn aolep wāween ko jemaron̄ kajjieon̄ n̄an dāpdep wōt n̄an “keememej E iien otemjej.” Ak ilo ad kōm̧m̧ane menin, enaaj jab jim̧we n̄an ad kōjekdoon ilo ad meļeļe kakeememej eo Irooj Make eaar letok n̄an eo ekar bōk menin letok kwojarjar, garment eo an Priesthood eo Ekwojarjar.
Jisōs Kraist im gospel eo An relukkun aorōk ippa. Aolep kōjatdikdik im kōttopar ko aō, aolep men ko ij kaorōki, rej pedped ioon E. E ej “jeban lom̧o̧o̧r eo aō,” iaļ eo aō n̄an ippān Jemed Ilan̄, iaļ eo aō emake n̄an ta eo iaar tokje ilo kar juon tōre im kio ij kōņaan bar tokje, ippān ko jet rebar ellōn̄. Menin letok eo an n̄an kōj ej juon men eaorōktata iaan aolep ko im em̧ōj ao kar bōki, ej juon men eaorōktata kar letok—eo kar wiaki āinwōt kar kōn en̄taan ejjeļo̧k jem̧ļo̧kin, kaetokļo̧k n̄an juon nōmba eo ejjeļo̧k jem̧ļo̧kin, ajje tok kōn juon iakwe eo ejjeļo̧k jem̧ļo̧kin. Kālōklōk im mar ko, en̄taan im liejļōļ, būrom̧ōj im jerawiwi ko an laļin rej aolep kar maat im “waran̄ļo̧ki ilo Kraist.”
Kōn menin ikar kōņak garment eo an Priesthood eo Ekwojarjar—aolep raan im bon̄ ilo jejjet jān ke ikar bōk mennin letok kwojarjar 64 iiō ko remootļo̧k—ilo dettan iiō in 19—kōnke ij iakwe E im kōnke ij aikuiji kallim̧ur ko ej jutak kaki.
Kajjitōk ko kōn Ekōņak Garment?
Jet iaami remaron̄ riit i article in ilo kōjatdikdik bwe imaron̄ uwaake juon kajjitōk eo kake garment. Komaron̄ kōjatdikdik kake juon “Lo Irooj ar ba”—ak barāinwōt juon “Lo rijerbal eo An ar ba”— kōn juon men eo eped buruōm̧. Kajjitōk ko am remaron̄ jarjar tok jān juon jekjek eo kōj pād ie ak ej tok jen jerbal eo am̧, exercise, kareoeo, mejatoto, karbab, jikin karreo ko, ak barāinwōt juon nan̄inmej.
Jet uwaak ko n̄an jet iaan kajjitōk kein repād ilo temples.ChurchofJesusChrist.org im ilo section 38.5 ilo Bok in Bōk Meļeļe Eļap. Jemaron̄ kepaak ro uwaan baam̧le im kepaake ritōl ro kōn juon jekjek kōj make jej jelm̧ae. Ijoke, ewōr, kein tōl ko rej allikar ilo kain̄i ko litoki, im Jemed Ilan̄ eo ej n̄an indeeo im indeeo ej pād, eo ejelā kake eok im iakwe eok im emeļeļe aolep jekjek ko kwoj iooni. Enaaj kanooj m̧ōņōņō n̄e konaaj make leļo̧k kajjitōk kein n̄an E.
Pija in spire eo an St. George Utah Tampeļ
Jouj im jab pok. Ilo am̧ kōttōpar tōl eo ekwojarjar, Jetōb eo eban im̧we eok n̄an kōm̧m̧an dikļo̧k jān ļoor kipel ko litok jān tampeļ im tōl eo an rikanaan eo letok jān Būreejtōnji eo Kein Kajuon ilo ennaan eo aer ekāāltata. Juon baba eo eļap iakwe ippān eban jipan̄ eok arto artake ta eo edikļo̧k jān jon̄an eo komaron̄e n̄an ekkeijel ļo̧k ippān jon̄o̧k in wujlepļo̧k im erreo eo an im enaaj kōjeraam̧m̧an eok kiiō im indeeo. Ak ej ke meļeļe kake kajjitōk ko am̧, im E enaaj ke jipan̄ eok bōk kōjeraam̧m̧an ko itok jen am̧ kautiej garment eo im kōjparok bujen ko am? Aaet! Kwoj ke aikuij bar pukōt jipan̄ ippān ro rej tijem̧ļo̧k ilo ājmour im taktō ilo iien ko aikuij? Aaet! Kwoj ke aikuij kajejtokjen men eo ej allikar n̄an meļeļe ak reilo̧k ellā jān kakōļļe eo? Ij jar bwe kwon jab.
Ijjab maron̄ uwaake aolep kajjitōk ko am̧. Ijjab maron̄ uwaake aolep kajjitōk ko aō. Bōtaab imaron̄, āinwōt juon rijillōk an Irooj Jisōs Kraist, kallim̧ur eok kōn jipan̄ eo an Anij eo ej iakwe kōj, eo ej kappukot am̧ bōk kōjeraam̧m̧an, ilo wāween ko im kojjab maron̄ meļeļe ak lo, ilo am̧ kōjparok bujen ko am̧ kwar kōm̧m̧ani Ippān.