N̄oul iiō: in Wujilepļo̧k in Jerbal: Katak ko kar Kāāleti jān Būreejtōn Russell M. Nelson

Kiō 100 iiō rūttoin, Būreejtōn Nelson ekar jerbal 40 iiō ko āinwōt juon Rijjilōk. Men kein rej jet iaan katak ko an jān an juon Būreejtōn an Kabun̄ in.

Jino kōn Ta eo Jenej erom̧

“Jemļo̧k eo me kōj kajjojo jej kajjieon̄ in erom̧ ej n̄an bōk menin letok eo ekwojarjar an kōn kajoor ilo juon em̧ im̧ōn Irooj, liāp āinwōt baam̧le ko, tiljek n̄an bujen ko jekar kōm̧m̧ani ilo juon tampeļ me ej kōkarbab kōj n̄an menin letok eo eļaptata an Anij—me an mour indeeo. Kain̄i ko an tampeļ im bujen ko kwoj kōm̧m̧ane rej kii n̄an kōkajoorļo̧k mour eo am̧, m̧are eo am̧, im am̧ maron̄ n̄an jum̧ae menin kapo ko an rikōjdāt eo. Am̧ kabun̄jar ilo tampeļ eo im am̧ jerbal in jipan̄ ijeņ kōn rūtto ro jibum̧ im jim̧m̧am̧ me em̧ōj aer jako naaj kōjeraam̧m̧an eok im kōļapļo̧k revelesōn eo am̧ make im aenōm̧m̧an im naaj kakwojarjar kallim̧ur eo am̧ n̄an dim wōt ilo iaļ in bujen eo.”

“Ilo Ad Wōnmaanļo̧k Ippān Doon,” Liaona, Epr. 2018, 7.

Ukweļo̧k Aolep Raan

“Ejjeļo̧k juon men ej kanemkwoj eļapļo̧k, wōr tokjen, ak aorōkļo̧k n̄an juon jān ukweļo̧k eo emakijkij im ej kōm̧m̧an aolep iien im aolep raan. Ukweļo̧k ejjab juon m̧akūtkūt, ej juon wāween jerbal. Ej kii eo n̄an lem̧ōņōņō im aenōm̧m̧an ilo kōļmenļo̧kjeņ. N̄e naaj kobaļo̧k ipen tōmak, ukweļo̧k ej kōppeļļo̧k iaļ n̄an kajoor in Pinmuur eo an Jisōs Kraist.”

“Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67.

Kōm̧m̧ani im Kōjparok bujen ko.

“Aolep kōrā ro im aolep em̧m̧aan ro me rej kōm̧m̧ani bujen ko ippān Anij im kōjparok bujen kein, im ro rej bōk koņaer ilo aer erreo ilo kain̄i ko rekwojarjar an priesthood eo, ewōr aer maron̄ in deļo̧n̄e kajoor eo an Anij. Ro otemjej rej bōk mennin letok eo kwojarjar ilo m̧weo im̧ōn Irooj rej bōk juon mennin letok eo an Anij kin kajoor in priesthood eo jān wānōk eo an bujen ko aer, kobaļo̧k mennin letok in jeļāļo̧kjeņ n̄an jeļā wāwein bōk kajoor jene.”

“Menin Aurok ko an Jetōb,” Liaona, Nob. 2019, 77.

Ron̄jake Irooj

“Jemed Ilan̄ ejeļā ke n̄e jej jepooļ kōn men ko rejjab alikkar im mijak, men eo enaaj jipan̄ kōj eļaptata ej n̄an ron̄jake eo Nejin.

“Kōnke n̄e jej kappukot n̄an ron̄jake—lukkuun ron̄jake—eo Nejin, jenaaj bōk tōl n̄an jeļā ta eo n̄an kōm̧m̧ane ilo jabdewōt jekjek ko.

“Ron̄jake E,” Liaona, Māe 2020, 89.

Kāālet Bwe Anij En Anjo̧

“Ippān meļeļe eo an Hebraic kōn Israel ilo ļōmņak, jej lo bwe aiintok eo an Israel ebar wōr meļeļein. Irooj ej aiintok ro rej kōņaan bwe Anij en anjo̧ ilo mour ko aer. Irooj ej aiintok ro renaaj kālet bwe kajoor eo an Anij en unjen eo an mour ko aer n̄an kōm̧m̧an oktak.

“Anij En Anjo̧,” Liaona, Nob. 2020, 92.

Anjo̧ Ioon Laļ

“Anjo̧ ioon laļin ejjab juon men bajjōk me waļo̧k juon ak ruo raan. Ej waļo̧k aolep iien ilo ad atbokwoje tok katak eo an Kraist. Jej kōļapļo̧k tōmak ilo Jisōs Kraist jen ukweļo̧k kajjojo raan im kōjparok bujen ko me raar kapelpel kōj kōn kajoor. Jej pād ilo iaļan bujen in im jej jeraam̧m̧an kōn kajoor in jetōb, revelesōn an juon make, kōļapļo̧k tōmak, im jerbal in karejar an enjeļ raņ. Mour kōn katak ko an Kraist emaron̄ kwaļo̧k eļap kajoor n̄an kōm̧m̧an ko rerreeo, kwaļo̧k kajoor in jetōb ilo mour ko ad.”

“Anjo̧ Ioon laļ n̄an Lo Ami Kakkije,” Liaona, Nob. 2022, 97.

Kāālet n̄an Erom juon Rikaenōm̧m̧an

“Jum̧ae ej kadiwōjļo̧k Jetōb eo—aolep iien. Jum̧ae ej kapenļo̧k ļōmņak eo ebōd bwe jum̧ae ej wāween eo n̄an ņa mejļan oktak ko; bōtaab ejjamin. Jum̧ae ej juon kāālet. Kōm̧m̧an aeņōm̧m̧an ej juon kāālet. Ewōr ippam̧ anemkwoj in kāālet eo n̄an kāālet jum̧ae ak kōm̧m̧an aeņōm̧m̧an. Ij libjerjer kom̧ n̄an kālet n̄an erom̧ juon rikaenōm̧m̧an, kiiō im iien otemjej.”

“Rikaenōm̧m̧an ro Jej Aikuji,” Liaona, Māe 2023, 100.

Ļōmņak kōn Selestial

“N̄e kwoj kōm̧m̧ani kāālet ko, ij kajjitōk ippem̧ bwe kwon ļōmņak kōn jekjek in—juon erreim̧aanļo̧k eo ejjeļo̧k jem̧ļo̧kin. Likūt Jisōs Kraist m̧okta, kōnke mour indeeo eo am̧ ej pedped wōt ioon tōmak eo am̧ ilo E im ilo Pinmuur eo An. Ej barāinwōt pedped ioon am̧ pokake kien ko An. Pokake ej kōmanm̧an iaļ in n̄an juon mour elan̄lōn̄ n̄an kwe rainin im juon jineekjej eļap, ejjeļo̧k jem̧ļo̧kin ilju im jekļaj.

“Ļōmņak kōn Selestial!,” Liaona, Nob. 2023, 118.