Kita Mopamatuod sa Atong Buhi nga Propeta

Salamat, O Dios sa propeta.

Ako mopamatuod nga si Presidente Russell M. Nelson mao ang propeta sa Dios, ug mapasalamaton ko nga ang Dios namulong ngadto kaniya. Ang gugma ni Presidente Nelson alang nato mao ang usa sa pagpakita sa gugma sa Dios. Gimahal nako si Presidente Nelson. Ang saad nga iyang gisulti gikan sa Dios.

Justine Hinautan, Pilipinas

Si Presidente Nelson nagtudlo nako nga ang labing importante nga butang karon mao ang pagpili ni Kristo pinaagi sa pagmahal ug pagtahod sa mga pakigsaad.

Ryan Hulme, New Zealand

Mapasalamaton kaayo ko sa propeta, si Russell M. Nelson. Mopamatuod ko nga siya usa ka tawo nga gitawag sa Dios sa paggiya ug sa paglig-on nato sa ulahing mga adlaw. Kon sundon nato ang iyang tambag, maayo ra ang tanan.

Nelson Almeida, Cabo Verde

Salamat, Presidente Nelson, gikan sa kinahiladman sa akong kasingkasing sa paghatag namo sa mga pulong sa kaalam gikan sa atong Langitnong Amahan. Ang Dios mopanalangin kanimo, among minahal nga propeta!

Brenda Boyle, Scotland

Salamat, Presidente Nelson, sa imong makapadasig ug makapabayaw nga mga pagtulon-an. Gimahal ka namo.

Thuong Putheary, Cambodia

Mapasalamaton kaayo ko sa gugma ug mga pagpasabot nga gihatag ni Presidente Nelson isip usa ka propeta. Ang iyang pakigpulong bahin sa templo nakapaaghat nako sa pagkuha sa akong pagtuga, ang iyang debosyonal ngadto sa mga young adult nakapahinumdom nako sa pag-ila sa akong labing importante nga pagkatawo isip usa ka anak sa Dios, ug sa iyang awhag sa pagpundok sa nagkatibulaag nga Israel mao ang kanunay nga hilisgotan sa akong pamilya ug sa komunidad sa ward. Labing importante, mitabang siya nako nga mas makapaduol ngadto sa akong Manluluwas.

Grace Burt, Estados Unidos

Gipamalandongan nako pag-ayo ang mga pagtulon-an sa atong minahal nga propeta, Russell M. Nelson. Ang iyang mga pagtulon-an nakapadasig sa akong kinabuhi. Ang iyang mapanagnaon nga mga pulong nakapaaghat nako sa pagpadayon ug sa pagsunod sa ebanghelyo nga mas hingpit niining nagkaguliyang ug nagkasumpaki nga kalibotan. Gibati nako nga luwas nga masayod nga kita adunay propeta sa atong panahon kinsa nag-awhag nato nga magbaton sa espiritu sa kalinaw, sa paglikay og panagbingkil sa atong mga kaedad. Gimahal nako ang iyang mga pagtulon-an.

Ana Montoya, Honduras

Ako adunay lig-on nga pagpamatuod nga si Presidente Russell M. Nelson mao ang propeta sa Dios alang sa ulahing mga adlaw. Ako adunay pribilehiyo sa pagsaksi sa iyang pagkamapainubsanon, sa iyang kayano, ug sa gugma nga iyang gibati alang sa mga tawo. Sa pagkatinuod, siya ang napili nga tawo sa pagpangulo sa gingharian sa Dios dinhi sa yuta niining talagsaon nga panahon. Nakapaminaw ko ug nakasunod sa iyang tambag, nga migiya nako sa pagpuyo og matarong nga kinabuhi ug pag-atubang sa mga hagit sa pagkamortal. Mibati ko og tumang gugma alang ni Presidente Nelson, ug ako nakahibalo sa iyang dili ordinaryo nga kontribusyon sa pagpalambo sa gingharian sa Dios ug sa pagpundok sa Israel pinaagi sa iyang mga inspirasyon ug mga pahibalo alang sa pagtukod og templo sa tibuok kalibotan.

David G. Fernandes, Brazil

Niadtong Agosto 24, 2019, ang propeta namulong sa Kinatsila ug misugo nato sa pagtuman sa mga sugo sa Ginoo. Gibati nako ang dako kaayo nga gugma ni Jesukristo tungod sa paningkamot sa propeta sa pagkat-on sa among pinulongan. Nasayod ko nga pinaagi sa buhi nga propeta, ang Dios nag-awhag, nagtudlo, nanalipod, naggiya, ug nanalangin kanato.

Saúl Alfredo Rojas de León, Guatemala