“Rikanaan eo ej Tōl Kōj n̄an Jisōs Kraist,” Liaona, Jept. 2024.
Rikanaan eo Ej Tōl Kōj n̄an Jisōs Kraist
Rikanaan eo ejeļā kin iaļ eo kinke ejeļā Jisōs Kraist, e eo ej “iaļ eo, m̧ool, im mour eo” (Jon 14:6).
Pukot eo Juon, jān by Liz Lemon Swindle, ejjab maron̄ kape
Juon raan ikar kōraelep ilo imōn m̧ōn̄ā eo an Church Administration Builing ippān jilu ro m̧ōtta jān Jiljilimjuonn̄oul eo. Ke kemij m̧ōn̄ā, Būreejtōn Russell M. Nelson ear itok n̄an tebōļ eo am kin booļ in soup eo kijen im ba, “Imaron̄ ke kobawaj ippāmi?”
“Aaet, Būreejtōn,” kōm aolep kar uwaake. Wōn ejjab kōņan kōraelep ippen rikanaan eo?
Ke kemij m̧ōn̄ā, Būreejtōn Nelson ej kwaļok jet iaan men ko eaar iooni ilo jet laļ ko ear loļo̧k im kōnaan kin armej ro raar im̧we. Ekar lukkun jouj, meletlet, meanwōd.
Ke kōm kar kadedeļo̧k am kōraelep, ikar oktakļo̧k n̄an Būreejtōn Nelson im kar ba, “Būreejtōn, ijjab jeļā eļan̄n̄e inaaj jijet ilo ejja tebōl eo wōt ippam̧ jabdewōt iien epaak. Bōtaab jotein, inaaj lo lio pāleō im ajri ro nejū im jiron̄ er bwe ikar kōraelep ippān rikanaan eo. Ijeļā ke renaaj kajitok ippa, ‘Ta eo ear ba waj bwe kwon ba tok n̄an kem?’ Būreejtōn, ta eo kwoj kōņaan bwe in jiron̄ lio pāleō im ajr ro?”
Būreejtōn Nelson ear kalimjōk n̄a ium̧win jidik iien. Iar kijerjer in ron̄ ta eo ej ear tin ba. “Ewōr jilu wōt aō naan n̄an kwe,” ekar ba. “Ba n̄an bam̧le eo am̧ bwe ij ba , ‘Kōjparok kien ko.’”
Em̧ōj ad aolep ron̄ kapilōk in jān Būreejtōn Nelson m̧okta, bōtaab ilo iien eo, ikar en̄jake juon kam̧ool aō make, ekajoor bwe Būreejtōn Nelson ej ilo m̧ool juon rikanaan. Ikar kam̧m̧oolol e, im tokālik ilo raan eo ikar jiron̄ baam̧le eo aō ta eo ekar waļo̧k. Ajri ro nejim tokālik raar kōm̧m̧ani “Kōjparok Kien ko” kaddāp ko im likūti er ioon aijbo̧o̧k eo am im kūlaaj ko n̄an kakeememej kōm kōn ta eo Būreejtōn Nelson ekar ba.
Jen tōre eo, iar kejekļo̧kjeņ kin kapilōk eo an Būreejtōn Nelson. N̄e jej kōjparok kien ko, jej kwaļo̧k ad iakwe n̄an Jemādwōj Ilan̄ im Rilo̧mo̧o̧r eo. Jej epaakeļo̧k Erro im pād ilo iakwe eo Aer. (Lale Jon 14:21; 15:10.)
En̄jake in ippān rikanaan eo ekar kapen n̄an n̄a juon m̧ool em̧wilaļ im ļap ilo jetōb. Ilo Būraimere jej al, “Ļoor rikanaan eo; ejeļā iaļ eo.” E ejeļā iaļ eo! Rikanaan eo ejeļā iaļ eo kinke ejeļā kajeen Rilomo̧or, eo ej “iaļ eo, m̧ool eo, mour eo” (Jon 14:6). N̄e jej ļoore rikanaan eo, naaj tōlļo̧k kōj n̄an Jisōs Kraist.
Eddo eo Ekwojarjar an Rikanaan ro
Irooj ear leļo̧k juon eddo aorōk im ekwojarjar n̄an rikanaan ro aolep ilo raan ko etto im raan kein ad. Jej riit ilo jeje ko rekwojarjar bwe “ilo m̧ool Irooj Jeova ejjab kōm̧m̧an jabdewōt, n̄e m̧ae iien Ej kwaļok pepe eo An n̄an ro ri karejeran, rikanaan ro” (Josep Smith Ukok, Amos 3:7 [ilo Amos 3:7, footnote a]).
Ilo bok in Ezekiel, jej katak eļapļo̧k kōn ta eo ej aikuji jān rikanaan ro. Irooj ear kōnono n̄an rikanaan eo Ezekiel, “IIar kōm̧anm̧an eok [āinwōt] juon ri waj n̄an m̧ōn Israel; im kwōnaaj ron̄ juon naan jān lo̧n̄iō, im kwōnaaj kakkōl er kōn n̄a” (Ezekiel 33:7).
Rikanaan ro, āinwōt jet riwaj ro ioon juon tawōr, ewōr aer kean̄ ko raorōk n̄an kōnono ilo etan Irooj im kwaļok ta eo ej kōņaan bwe ren kwaļok ilo er. Irooj ej aikuj an rikanaan ro An n̄an erom em̧m̧aan in tōmak, em̧m̧aan in m̧ool, im em̧m̧aan ro rejjab mijak.
Pija in Samuel riLeman eo jān Dan Burr
Samuel riLeman eo, n̄an waanjon̄o̧k, ekar kwaļo̧k kallim̧ur elikio n̄an Jisōs Kraist ke ekar juontak ioon juon worwor im kar kean̄ n̄an riNipai ro men ko Irooj ekar likūt ilo būruōn (lale Hilamōn 13:4).
Im lo, enjeļ eo an Irooj eaar kwaļo̧ke n̄an eō, ”Samuel ear ba,“im eaar bōktok naan ko rem̧m̧an n̄an jetōb eo aō. “Im lo, kar jilkintok eō n̄an kom̧ n̄an kwaļo̧ke n̄an kom̧ barāinwōt, bwe kom̧in maron̄ bōk naan ko rem̧m̧an; bwe lo kom̧ ban kar bōk eō.” (Hilamōn 13:7).
Ekabwilōn̄lōn̄ n̄an n̄a bwe Samuel ekididān an kar kam̧ool kōn m̧ool eo—jekdo̧o̧n n̄e riNipai ro “raar kade kōn dekā ko … im… lippo̧ņ e ke eaar jutak ioon wōrwōr eo” (Hilamōn 16:2). Jej loe kain peran rot in ilo rikanaan ro, rilolo ro, im ro ribōk revelesōn ro rainin.
Kōm̧m̧an bwe Laļ in en juon Jikin Em̧m̧anļo̧k
Ejjab etto, iar ioone ruo ribelele ro ilo juon kweilo̧k eļap an stake ilo Nashville, Tennessee, USA. Kōrā eo ear juon uwaan in Kabun̄ aolepen mour eo an. Ļeo ekar jab juon membōr.
Erro kar itok ippa, im ļeo pālele ekar ba, “Ipojak in peptaij.”
Iar lukkun m̧ōņōņō in ron̄ men eo! Ikar kajitōk ippān, “Ta eo ekar oktak?
Eaar ba n̄an eō, “Ke iar ron̄ enaan eo an Būreejtōn Nelson ilo kweilo̧k eo eļap , ear ļap an lukkun im̧we eō . Innām ikar jeļā tōre eo bwe ekar juon rikanaan. Iar bōk juon naan in kam̧ool, im kiō ipojak in peptaij.”
Iar bar jeļā kajeen juon kōrā ilo Cape Coast, Ghana, eo ear bar kobatok ilo kweilo̧k eo eļap. Liin ejjan̄in kar ron̄ kōn Kabun̄ eo an Jisōs Kraist im Armej Rekwojarjar ilo Raan-ko Āliktata, bōtaab liin ekar itok limo in kōn ta eo ekar loe im ron̄ jān rikanaan ro, rilolo ro, ribōk revelesōn ro. Tokelik, lio ear kapukot Kabun̄ in. Ear loe juon m̧ōn jar im ekar ioon mijenede ro. Āliktata liin ekar peptaij. Kiiō epaak, liin ekar jilkintok pija ko pijain ilo tampeļ eo ej bōk menin letok kwojarjar eo an make.
Waanjon̄ak kein ruo rej kwaļo̧k ekōjkan an kajoor ennaan eo an rikanaan eo n̄an laļ in! Eļan̄n̄e aolep renaaj kar ron̄jake ennaan in an, laļ in enaaj kar kanooj aenōm̧m̧an. Jenaaj kar aolep kalimjōk wōt ta ko raorōk tata, ekoba ejake juon jemjerā ippāņ Jemādwōj Ilan̄ im Nejin, Jisōs Kraist, im kalōk baam̧le ko rekajoor, indeeo. Jenaaj bareinwōt erom ro rem̧m̧antata kinke jej kōjparok kien ko ruo raorōktata: iakwe Anij im iakwe ro ruturid (lale Matu 22:37–39). Jenaaj kar bōk m̧aantak Zaion, juon jukjuk in pād ijo iakwe, jim̧we, im jokkun wōt juon ej anjo̧, kōmejajaik jetōb eo an rikaļoor (lale Katak im Bujen Ko 82:14).
N̄e jej ļoor rikanaan eo, jemaron̄ jeļā bwe jej kōm̧m̧ane ta eo Anij ekōņaan bwe jen kōm̧m̧ane kinke rikanaan eo ej ļoore—im ej jipan̄ kōj ļoor—Jisōs Kraist. Kōnke kōn Jisōs Kraist, aolep men ilo mour eļapļo̧k meļeļeier. “Jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad.” Ilo ad ļoor rikanaan eo, jemaron̄ lukkun kōm̧m̧an bwe aļ in en juon jikin em̧m̧anļo̧k.
Pukōt Kōjeram̧m̧an ko kar Kalim̧m̧ur Kaki
Ke ro Rekwojarjar kar kaduwōjļo̧k er jān Kirtland, Ohio, Būreejtōnji eo Kein Kajuon ear leļo̧k maron̄ eo n̄an Oliver Granger bwe en wia kake men ko mweier im kōļļāik m̧uri ko an Kabun̄. Oliver, juon em̧m̧aan eo ettā im ear pilo itok jān an ļap an kar m̧oļļo, ear errā n̄an kom̧m̧ane jerbal in epen kinke Rikanaan Joseph Smith im ritōl ro jet kar kajitōk ippen. Oliver ear kijenmej ilo elōn̄ appan̄ ko reppen, im Irooj ear kaorõk kaarmejjete im kijejeto ko an.
“Ij keememej karejera Oliver Granger,” Irooj ekar ba. “Lo, em̧ool Ij ba n̄an e bwe etan enaaj pād ilo ememej ekwōjarjar jān epepen n̄an epepen, indeeo im indeeo. …
“…im n̄e ej wōtlo̧k enaaj bar jerkak, bwe katok eo an naaj ekwōjarjarļo̧k n̄an eō jān ļapļo̧k eo an” (Katak im Bujen Ko 117:12–13).
Oliver im kōrā eo ippen, Lydia, rekkar rejetake rikanaan eo, im Irooj ear kile bwe Oliver ear kate jon̄an wōt an maron̄ mekarta n̄e ejjab aolep ien ej tōbrak. Irooj ear kallikar aorōkin jerbal ko an jen tōbrak ko an.
Āinwōt juon mijinede im ilo m̧ool kiiō, ijjab emeejmej aō ron̄ kōn Oliver Granger, ak ej waļok etan ilo jeje ko rekwojarjar kinke ear pokake tōl eo an rikanaan eo im bōk kōjeraam̧m̧an ko kar kalim̧m̧ur kaki—etan ej pād ilo emeemej ekwōjarjar. Jej katak jān Oliver Granger bwe jekdo̧o̧n n̄e tōl eo ej itok jān juon kein jipan̄ ekowjarjar (jān rikanaan ro), ejjab lukkuun kalikkar juon iaļ emeoeo enaaj joļo̧k aolep apan̄ ko, bōtaab kallim̧ur ko rej m̧ool(lale Alma 37:17).
Ewi wāween naaj kar mour ko ad eļļan̄e ear ejjeļo̧k rikanaan ro? Rikanaan eo im ej Būreejtōn n̄an Kabun̄ in ej bōk jikin juon iaļ in kōnono eo ej kajju ikōtaan Anij im armej ro An im ej armej eo emakke ioon laļin n̄an bōk revelesōn n̄an tōl aolepān Kabun̄ in. Ej bareinwōt letok revelesōn ko aolep ien jen Anij n̄an jipan̄ kōj kōjjebwebweik appan̄ ko ad ilo raan kein. Ilo ad ļoor kapilōk ko an rikanaan eo, jemaron̄ en̄jake ainem̧m̧an, m̧ōņōņō, im tōl ilo mour ko ad ilo ad katte kōj n̄an erom̧ einwōt Jisōs Kraist. (Lale Katak im Bujen Ko 21:4–6.)
Jen bōk katak im waanjon̄o̧k ko an rikanaan ro ilo raan kein, ilo ad jeļā bwe rej rijerbal ro ium̧win pein Anij im rej tōl kōj n̄an kōjeram̧m̧an ko n̄an indeo. Ij iakwe er im jar kake er. Ij kam̧m̧oolol n̄an jeļā bwe rej kōkajoor im jipan̄ tōl kōj im bam̧le ko ad n̄an Rilomo̧r, Jisōs Kraist.